Timbhoni Ta Yehovha—Ti Ni Ripfumelo, Xiyenge 2: Ku Vonakala A Ku Voninge

Endzhaku ka loko Makwerhu Rutherford ni vanghana vakwe va ntshunxiwile ekhotsweni hi 1919, a ka ha ri ni ntirho wo tala lowu a wu fanele wu endliwa hi Swichudeni swa Bibele. Hilaha hi swi voneke hakona eka vhidiyo leyi nge Timbhoni Ta Yehovha—Ti Ni Ripfumelo, Xiyenge 2: Ku Vonakala A Ku Voninge, Swichudeni swa Bibele a swi ta va ni vakaneti vo tala, ndlela leyi swi ma twisisaka ha yona Matsalwa a yi ta ya yi kula naswona ripfumelo ra swona a ri ta ringiwa. (Swiv. 4:18; Mal. 3:1-3; Yoh. 15:20) Endzhaku ko hlalela vhidiyo leyi, xana u nga swi kota ku hlamula swivutiso leswi landzelaka?

(1) Xana Swichudeni swa Bibele swi tirhise tindlela tihi ku va swi hangalasa mahungu lamanene? (2) I yini leswi tivisiweke eka mintsombano yo hlawuleka leyi veke kona hi 1931 na 1935? (3) Hi rihi rungula ra nkoka leri a ri ri eka nkandziyiso wa Xihondzo xo Rindza xa November 1, 1939? (4) Hlamusela leswi humeleleke eMadison Square Garden loko Makwerhu Rutherford a ri karhi a nyikela nkulumo leyi nge “Hulumendhe Ni Ku Rhula.” (5) Ha yini nkulumo ya Makwerhu Knorr leyi nge “Ku Rhula—Xana Ku Ta Khomelela?” a yi tsakisa swinene? (6) Xana Timbhoni ta Yehovha ti endle yini hi 1942 leswaku ti kota ku ndlandlamuxa ntirho wa tona wo chumayela? (7) Hlamusela tin’wana ta tinyimpi ta swa nawu leti lwiweke eUnited States, Canada ni le Greece. (8) Xana hi byihi vuyelo lebyi Giliyadi yi veke na byona eka ku ndlandlamuxa ntirho wo chumayela? (9) Hi wihi ntirho wa nkoka lowu sunguleke hi 1946 naswona ha yini? (10) Hi wahi magoza lawa Timbhoni ta Yehovha ti ma tekeke leswaku ti tiyiseka leswaku mahanyelo ya tona ya pfumelelana ni milawu ya Bibele? (11) Hlamusela ku cinca kun’wana loku endliweke hi va-1970 leswaku ku endliwa nhlengeletano yi fambisana ni Bibele. (12) Xana vhidiyo leyi yi ku pfune njhani leswaku u swi twisisa kahle leswaku Yehovha hi yena a lawulaka nhlengeletano leyi naswona i ya yena? (13) Xana vhidiyo leyi yi ku tiyise njhani ku tiyimisela ka wena ku va u ya emahlweni u hisekela ku chumayela ku nga khathariseki swihinga? (14) Xana hi nga yi tirhisa njhani vhidiyo leyi leswaku hi pfuna maxaka ya hina, Swichudeni swa Bibele ni vanhu van’wana?

Siku rin’wana ni rin’wana leri hundzaka ri endla matimu eka Timbhoni ta Yehovha. I yini leswi tirhekhodo ti nga ta swi vula hi ku tikarhata ka hina entirhweni wa nsimu? Hilaha vamakwerhu va hina va endleke hakona enkarhini lowu hundzeke, onge na hina hi nga ya emahlweni hi hisekela ku endla leswaku ‘ku vonakala ku voninga’!—2 Kor. 4:6.