Timbhoni Ta Yehovha—Ti Ni Ripfumelo, Xiyenge 1: Ti Fularhela Munyama
EBibeleni ku vonakala ku fanisiwa ni ntiyiso kasi munyama wu fanisiwa ni mavunwa. (Ps. 43:3; Esa. 5:20) Sathana u tise munyama emisaveni loko a xisa Evha naswona sweswo swi endle leswaku vanhu emisaveni hinkwayo va va emunyameni lowukulu. (Nhlav. 12:9) Vhidiyo leyi nge: Timbhoni Ta Yehovha—Ti Ni Ripfumelo, Xiyenge 1: Ti Fularhela Munyama, yi vulavula hi ndlela leyi ntiyiso wu sunguleke ku susa munyama ha yona. (Esa. 60:1, 2) Endzhaku ko hlalela vhidiyo leyi, xana u nga swi kota ku hlamula swivutiso leswi?
(1) Xana munyama lowukulu wu tumbuluke njhani endzhaku ka rifu ra vaapostola? (2) Eku sunguleni ka va-1100, hi wihi nhluvuko lowu pfuneke vanhu ku vona leswaku tikereke a ti nga dyondzisi ntiyiso? (3) I yini leswi hi swi tivaka malunghana na Henry Grew na George Storrs? (4) Hi xihi xiendlakalo lexi vangeke ku cinca evuton’wini bya Charles Russell? (5) Xana Makwerhu Russell, tata wakwe ni van’wana va yi fambise njhani dyondzo vona ya Bibele naswona hi xihi xiboho xa Matsalwa lexi va xi fikeleleke? (6) Ntlawa wa swichudeni swa Bibele wu hlangane njhani ni ntlawa wa Nelson Barbour naswona i yini lexi endleke leswaku Makwerhu Russell a wu sukela? (7) I yini lexi humeleleke hi July 1879 lexi sunguleke nguva leyintshwa ya ku tshuburiwa ka ntiyiso? (8) Endzhakunyana, swichudeni swa Bibele leswi a swi ya swi andza swi endle yini leswaku swi hangalasa mahungu lamanene? (9) Loko lembe ra 1914 ri nga si fika, Swichudeni swa Bibele a swi langutele leswaku ku humelela yini? (10) Endzhaku ka rifu ra Makwerhu Russell, hi yihi mintlhontlho leyi Swichudeni swa Bibele swi langutaneke na yona? (11) Endzhaku ka ku humesiwa ka Makwerhu Rutherford ekhotsweni swin’we ni vamakwerhu lava a a ri na vona, Swichudeni swa Bibele swi endle yini? (12) Ku hlalela vhidiyo leyi swi ku pfune njhani leswaku u twisisa u tlhela u tlangela nhlengeletano ya Yehovha? (13) Vhidiyo leyi yi ku pfune njhani leswaku u tiyimisela ku hambeta u chumayela hi ku hiseka ku nga khathariseki swiphiqo? (14) Hi nga yi tirhisa njhani vhidiyo leyi ku pfuna maxaka ya hina, swichudeni swa Bibele ni van’wana?
Mawaku ndzhaka leyinene leyi hi siyeriweke yona hi Swichudeni swa Bibele swa nkarhi lowu hundzeke! A swi hisekela ku tisa ku vonakala emisaveni leyi nga le munyameni lowukulu hi tlhelo ra moya. Onge hi nga tekelela xikombiso xa swona naswona hi “hambetani [hi] famba tanihi vana va ku vonakala!”—Efe. 5:8.