Pfuna Vanhu Leswaku Va Yingisa Xikwembu
1. Hi yihi broxara leyi humesiweke eka Ntsombano wa Muganga lowu a wu ku, “Mfumo Wa Xikwembu A Wu Te!” naswona i yini leswi endlaka leswaku yi va xitirhisiwa lexi pfunaka?
1 Eka Ntsombano wa Muganga lowu a wu ku, “Mfumo Wa Xikwembu A Wu Te!” ku humesiwe broxara leyintshwa leyi nge, Yingisa Xikwembu Kutani U Hanya Hilaha Ku Nga Heriki. Tanihi leswi yi nga riki na rungula ro tala, yi nga hundzuluxeriwa hi ku hatlisa ni hi ndlela yo olova. Entiyisweni loko broxara leyi yi humesiwa hi Xinghezi, ana se a yi hundzuluxeriwile hi tindzimi ta 431.
2. I vamani lava nga ta vuyeriwa hi broxara leyi?
2 Kahle-kahle i vamani lava nga ta vuyeriwa hi broxara leyi? Xiya swiyimo leswi landzelaka leswi talaka ku endleka emisaveni hinkwayo:
• Muhuweleri la burisanaka ni n’wini wa muti, swi nga ha endleka eka riendzo ro sungula kumbe eka riendzo ro vuyela, u xiya leswaku n’wini wa muti a nga dyondzekanga kumbe a nga swi koti kahle ku hlaya.
• Muhuweleri u chumayela vanhu lava vulavulaka ririmi leri nga riki ni minkandziyiso yo tala kumbe ri nga riki ni minkandziyiso leyi nga hundzuluxeriwa. Kumbe vanhu vo tala ensin’wini va tsandzeka ku hlaya ririmi leri va kotaka ku ri vulavula.
• Muhuweleri la chumayelaka vanhu lava nga twiki ensin’wini hi ririmi ra mavoko.
• Mutswari loyi a navelaka ku dyondzisa n’wana wa yena ntiyiso kambe n’wana loyi a nga se swi kota kahle ku hlaya.
3. Broxara leyi nge, Yingisa Xikwembu Kutani U Hanya Hilaha Ku Nga Heriki yi hleriwe njhani?
3 Ndlela Leyi Rungula Ra Yona Ri Hleriweke Ha Yona: Broxara leyi nge, Yingisa Xikwembu Kutani U Hanya Hilaha Ku Nga Heriki yi endleriwe ku dyondza ni vanhu lava nga swi kotiki kahle ku hlaya kumbe lava ha dyondzaka ku hlaya. Ehenhla ka tluka rin’wana ni rin’wana leri sungulaka dyondzo, hi le ximatsini ku ni xivutiso lexi hlamuriwaka eka matluka wolawo. Ku engetela eka swifaniso, ku ni tinhlamuselo ni matsalwa lama kombisiweke. Eku heteleleni ka matluka yo tala ku ni bokisi leri pendiweke leri nga ni tinhla leti engetelekeke ni Matsalwa lama kombisiweke lama ku nga buriwaka ha wona, kambe swi ta ya hi vuswikoti bya xichudeni.
4. Hi rini laha hi nga fambisaka broxara leyi naswona njhani?
4 Ndlela Yo Yi Tirhisa: U nga ha fambisa broxara leyi loko u ri entirhweni wa yindlu ni yindlu nkarhi wun’wana ni wun’wana loko u vona yi ta vuyerisa, hambi loko yi nga fambisiwi n’hweti yoleyo. (Vona bokisi leri nge, “Ndlela Leyi Yi Nga Fambisiwaka Ha Yona.”) U nga ha yi siyela munhu eka riendzo ro vuyela hi ku va u n’wi byela leswaku u lava ku n’wi komba swin’wana ivi u vula hi ku n’wi nyika yona. U nga ha hlaya na yena rungula ni matsalwa lama fambisanaka ni xifaniso xin’wana ni xin’wana lexi mi bulaka ha xona.
5. Hi nga xi pfuna njhani xichudeni xa Bibele leswaku xi endla nhluvuko?
5 Pfuna Xichudeni Leswaku Xi Endla Nhluvuko: Hakanyingi bulo ra n’wina ri ta endla leswaku xichudeni xi navela ku dyondza ni ku hlaya lerova xi kota ku nghenisa vutivi hi Yehovha ni loko xi ri xoxe. (Mat. 5:3; Yoh. 17:3) Hambiswiritano, xichudeni xi ta va xi nga si swi lunghekela ku ya eku khuvuriweni loko mi heta ku dyondza broxara leyi. U fanele u tlulela eka buku leyi nge, Leswi Bibele Yi Swi Dyondzisaka kumbe nkandziyiso wun’wana lowu fanelekaka lowu nga ta endla leswaku xi twisisa Bibele ku antswa.
6. Ha yini u tlangela xitirhisiwa lexi lexintshwa lexi hi nga ta xi tirhisa ensin’wini?
6 Loko vanhu va lava ku hanya hilaha ku nga heriki va fanele va yingisa Hosi ya vuako hinkwabyo. (Esa. 55:3) Naswona ku rhandza ka Yehovha hi leswaku “vanhu va mixaka hinkwayo,” ku katsa ni lava nga kotiki ku hlaya va dyondza ku n’wi yingisa. (1 Tim. 2:3, 4) Mayana ndlela leyi hi xi tlangelaka ha yona xitirhisiwa lexi hi nga dyondzisaka vanhu ha xona leswaku va yingisa Xikwembu!
[Bokisi leri nga eka tluka 7]
Ndlela Leyi Yi Nga Fambisiwaka Ha Yona
Komba n’wini wa muti matluka 2-3 kutani u ku: “Xana u nga swi tsakela ku hanya misaveni leyi langutekaka hi ndlela? [Yimela nhlamulo.] Matsalwa ma tshembisa [kumbe buku yo kwetsima] leswaku ku nga ri khale Xikwembu xi ta endla leswaku misava yi saseka kutani ku va ni ku rhula naswona vusweti kumbe vuvabyi a swi nge he vi kona. Xiya leswi hi faneleke hi swi endla leswaku hi hanya endhawini yoleyo. [Hlaya Esaya 55:3, leyi kombisiweke ehenhla ka tluka 3.] Leswi swi hi byela leswaku ‘hi ya eka’ Xikwembu naswona hi xi ‘yingisa.’ Kambe hi nga xi yingisa njhani Xikwembu?” Pfula eka matluka 4-5 kutani mi burisana hi nhlamulo ya kona. Loko a nga ri na nkarhi, n’wi siyele broxara kutani u endla malunghiselelo yo tlhela u vuya leswaku mi ta bula hi tinhlamulo leti nga eka yona.