Ndlela Yo Pfuna Vanhu Lava Nga Swi Kotiki Kahle Ku Hlaya

1. Hi wihi ntlhontlho lowu vaka kona eku dyondziseni ka vanhu lava nga swi kotiki kahle ku hlaya?

¹ Vini va miti lava nga swi kotiki kahle ku hlaya va nga ha va va swi tsakela swilo swa moya, kambe ku hlaya Bibele ni tibuku tin’wana swi nga ha va chavisa. Loko wo fambisela vanhu vo tano buku leyi nge Leswi Bibele Yi Swi Dyondzisaka to ho suka, swi nga endleka va nga yi tsakeli. Hi nga va pfuna njhani hi tlhelo ra moya? Hi vutise vahuweleri lava nga ni ntokoto va le matikweni yo tlula 20 leswaku vona va endlisa ku yini. Va hi nyike swiringanyeto leswi landzelaka.

2. Hi yihi minkandziyiso leyi tirhaka eku pfuneni ka munhu loyi a nga swi kotiki kahle ku hlaya?

² Loko xichudeni xa kona xi nga swi koti kahle ku hlaya kumbe xi nga swi koti ku hlaya, u nga ha sungula hi broxara leyi nge, Yingisa Xikwembu kumbe leyi nge Yingisa Xikwembu Kutani U Hanya Hilaha Ku Nga Heriki. Phayona rin’wana ra le United States ri komba munhu wa kona tibroxara hatimbirhi ivi ri n’wi vutisa leswaku hi yihi leyi a vonaka yi ta n’wi olovela. Rhavi ra le Kenya ri vika leswaku tibroxara leti ti pfuna swinene etikweni rolero hikuva vantima hi ntolovelo va dyondzisiwa hi ku tirhisa swifaniso ematshan’weni yo burisana hi swivutiso ni tinhlamulo. Munhu la dyondzekeke swi nga ha n’wi olovela ku pfumela ku hlaya ni ku vutisiwa swivutiso, kambe maendlelo wolawo ma nga ha endla munhu la nga dyondzangiki a titwa a nga ntshunxekanga. Loko xichudeni xa kona xi swi kota ku hlaya, vahuweleri vo tala va rhandza ku sungula dyondzo hi broxara leyi nge Mahungu Lamanene Lama Humaka Eka Xikwembu! kumbe leyi nge U Nga Va Munghana Wa Xikwembu! kumbexana buku leyi nge Buku Yanga Ya Timhaka Ta Bibele.

3. Hi swihi swilo leswi nga hi pfunaka leswaku hi kota ku dyondzisa vanhu lava nga swi kotiki ku hlaya?

³ Va Bumabumele: Vanhu lava nga swi kotiki ku hlaya va nga ha khomiwa hi tingana naswona vo tala a va titshembi. Hakanyingi goza ro sungula ro va dyondzisa ntiyiso i ku va pfuna leswaku va titwa va ntshunxekile. Vanhu vo tala lava nga swi kotiki ku hlaya va tlharihile naswona va swi kota ku dyondza. Va kombise xichavo. (1 Pet. 3:15) Va ta susumeteleka ku ya emahlweni va dyondza loko va swi vona leswaku matshalatshala ya vona i ya nkoka ni leswaku va le ku endleni ka nhluvuko hi tlhelo ra moya. Hikwalaho tshama u ri karhi u va bumabumela.

4. Hi nga va khutaza njhani vanhu lava nga swi kotiki kahle ku hlaya leswaku va lunghiselela?

⁴ Hambiloko xichudeni xi nga swi koti kahle ku hlaya, xi khutaze ku lunghiselela. Vahuweleri van’wana laha Afrika Dzonga va khutaza swichudeni swa vona ku kombela xirho xa ndyangu kumbe munghana loyi a swi kotaka kahle ku hlaya leswaku a swi pfuna. Hi nkarhi wa dyondzo, muhuweleri un’wana wa le Britain u lomba swichudeni swa yena buku ya yena eka tindzimana ti nga ri tingani leswaku a swi khutaza ku lunghiselela, leswaku swi ta vona ndlela leyi swi olovaka ha yona ku kuma tinhlamulo loko ti khwatihatiwile. Makwerhu un’wana wa le Indiya u khutaza swichudeni swa yena ku kambisisa swifaniso swa dyondzo ya vhiki leri landzelaka ivi swi anakanyisisa ha swona ka ha ri emahlweni.

5. Hi nga yi lehisa njhani mbilu loko hi fambisa dyondzo?

⁵ Lehisa Mbilu: Ku nga khathariseki leswaku u tirhisa nkandziyiso wihi, dzika ngopfu eka tinhla-nkulu naswona u pfuna xichudeni xa wena ku ti twisisa kahle. Loko ma ha sungula, swi nga va swinene ku bula timinete ta 10 ku ya eka 15. Mi nga hlayi rungula ro tala, kumbexana mi nga hlaya tindzimana ti nga ri tingani ntsena eka dyondzo ha yin’we. Lehisa mbilu loko xichudeni xa wena xi hlaya hi ku nonoka. A swi kanakanisi leswaku xi ta susumeteleka ku antswisa ndlela leyi xi hlayaka ha yona loko ndlela leyi xi tlangelaka Yehovha ha yona yi ri karhi yi kula. Leswaku u pfuna xichudeni xa wena xi endla sweswo, i swinene ku xi rhamba leswaku xi ta eminhlanganweni to ho suka.

6. Hi nga va pfuna njhani vanhu ku dyondza ku hlaya?

⁶ Loko swichudeni swa Bibele swi dyondza ku hlaya, swi ta hatla swi endla nhluvuko hi tlhelo ra moya. (Ps. 1:1-3) Vo tala va pfune swichudeni swa vona hi ku tirhisa xibukwana lexi nge Titolovete Ku Hlaya Ni Ku Tsala ku ringana timinete ti nga ri tingani loko va heta ku dyondza. Loko xichudeni xi hela matimba, kumbexana u nga endla leswaku xi titshemba hi ku boxa swilo swin’wana leswi xi dyondzeke ku swi endla. Xi tiyisekise leswaku Yehovha u ta katekisa matshalatshala ya xona, u tlhela u xi khutaza ku khongelela mpfuno. (Swiv. 16:3; 1 Yoh. 5:14, 15) Vahuweleri van’wana eBritain va khutaza swichudeni swa vona ku tivekela tipakani leti swi nga kotaka ku ti fikelela ni leti nga swi pfunaka ku endla nhluvuko—kumbexana swi rhanga swi tiva letere ro karhi, ivi swi kuma swi tlhela swi hlaya matsalwa yo karhi kutani eku heteleleni swi hlaya minkandziyiso leyi olovisiweke leyi sekeriweke eBibeleni. Hakanyingi ku pfuna vanhu leswaku va dyondza ku hlaya swi katsa ku va khutaza ku lava ku hlaya, ku nga ri ku va dyondzisa ndlela yo hlaya ntsena.

7. Ha yini hi nga fanelanga hi tshika ku va dyondzisa ntiyiso vanhu lava nga swi kotiki kahle ku hlaya?

⁷ Yehovha a nga va languteli ehansi vanhu lava nga dyondzangiki. (Yobo 34:19) Yehovha u kambisisa mbilu ya munhu. (1 Tikr. 28:9) Hikwalaho u nga tshiki ku va dyondzisa ntiyiso vanhu lava nga swi kotiki kahle ku hlaya. Ku ni minkandziyiso yo tala leyinene ngopfu leyi u nga sungulaka ku va dyondzela ha yona. Hi ku famba ka nkarhi u nga sungula ku dyondza na vona buku leyi nge Leswi Bibele Yi Swi Dyondzisaka kutani u endla leswaku va twisisa Matsalwa ku antswa.