Dyondzisa Vanhu Lava Nga Swi Kotiki Kahle Ku Hlaya
1. Hi wihi ntlhontlho lowu hi nga ha langutanaka na wona loko hi ri ensin’wini?
1 Loko hi ri karhi hi chumayela, nkarhi wun’wana swa hi tikela ku dyondzisa ntiyiso loko hi hlangana ni vanhu lava nga swi kotiki kahle ku hlaya. I yini leswi hi nga swi endlaka leswaku hi va pfuna?
2. Ha yini hi fanele hi xixima lava nga swi kotiki kahle ku hlaya naswona hi nga swi endlisa ku yini sweswo?
2 Va Xixime: Nchumu lowu Yehovha a wu tekaka wu ri wa nkoka eka munhu hileswi a nga xiswona embilwini ku nga ri dyondzo yakwe. (1 Sam. 16:7; Swiv. 21:2) Hikwalaho, a hi va languteli ehansi vanhu lava nga swi kotiki kahle ku hlaya. Swi nga ha endleka leswaku va amukela mpfuno wa hina loko hi va xixima ni ku va lehisela mbilu. (1 Pet. 3:15) Leswi swi vula leswaku a hi fanelanga hi sindzisa munhu wo tano leswaku a hlaya tsalwa kumbe ndzimana. Loko munhu wo tano a ya a ti titwisisa tidyondzo ta nkoka leti nga eBibeleni, u ta antswisa ndlela leyi a hlayaka ha yona naswona u ta kuma ntsako loko a ri karhi a hlaya Rito ra Xikwembu “hi rito ra le hansi vusiku ni nhlikanhi.”—Ps. 1:2, 3.
3. Hi tihi tindlela to dyondzisa leti hi nga ti tirhisaka leswaku hi pfuna vanhu lava nga swi kotiki kahle ku hlaya?
3 Tindlela To Dyondzisa Leti Hi Nga Ti Tirhisaka Loko Hi Fambisa Tidyondzo Ta Bibele: Swifaniso i swa nkoka eku dyondziseni naswona swi endla leswaku munhu a tsundzuka leswi a nga swi dyondza. U nga ha vutisa xichudeni xa wena leswaku xi vona yini exifanisweni lexi nga enkandziyisweni lowu mi wu dyondzaka. Kutani vutisa swivutiso leswi fambisanaka ni xifaniso xexo leswaku xichudeni xa wena xi twisisa leswi xifaniso xi swi dyondzisaka. Tirhisa matsalwa lama kandziyisaka tinhla-nkulu ta xifaniso xexo. U nga ha pfuxeta dyondzo hi ku tirhisa swifaniso. Papalata ku hlanganisa rungula ro tala hi nkarhi wun’we. Kandziyisa xihloko ni tinhla-nkulu ta dyondzo naswona papalata ku nghenisa rungula leri nga riki kona. Hlaya matsalwa hi ku kongoma eBibeleni naswona u tirhisa swivutiso ku tiyiseka leswaku xichudeni xa swi twisisa leswi swi nga hlayiwa. Leswi swi ta endla leswaku xi navela ku ya emahlweni xi antswisa ndlela leyi xi hlayaka ha yona leswaku xi ta hambeta xi tiendlela ndzavisiso hi xoxe eBibeleni.
4. Hi nga swi pfuna njhani swichudeni swa hina swa Bibele leswaku swi antswisa ndlela leyi swi hlayaka ha yona?
4 Switirhisiwa Leswi Nga Ta Va Pfuna: Vanhu vo tala lava nga swi kotiki kahle ku hlaya va tlharihile hikuva va swi kota ku khoma rungula hi nhloko. U nga ha va khutaza ku yingisela minkandziyiso ya hina leyi rhekhodiweke. Ku yingisela hi vurhon’wana loko yi hlayiwa, ku fambisana ni muhlayi hi ku khoma nkandziyiso lowu a wu hlayaka ni ku phindha marito yakwe hi rito ra le hansi, swi ta pfuna munhu yoloye leswaku a antswisa ndlela leyi a hlayaka ha yona. Nakambe munhu wo tano a nga pfuneka hi ku tirhisa broxara leyi nge Titolovete Ku Hlaya Ni Ku Tsala. Etindhawini tin’wana, vakulu va nga ha endla malunghiselelo ya leswaku ku va ni xikolo xo dyondza ku hlaya evandlheni. Onge malunghiselelo lawa ma nga hi susumetela ku va pfuna leswaku va twisisa “matsalwa yo kwetsima” lama nga ta va pfuna leswaku va ponisiwa.—2 Tim. 3:15.