“Marito Lawa . . . Ma Fanele Ma Va Embilwini Ya Wena”

Vatswari va fana ni varisi. Va fanele va va khathalela swinene vana va vona, lava nga hambukaka endleleni hi ku olova ivi va hlaseriwa. (Swiv. 27:23) Vatswari va nga swi endla njhani sweswo? Siku ni siku, va fanele va tinyika nkarhi wa ku vulavurisana ni vana va vona leswaku va ta tiva leswi nga etimbilwini ta vona ni leswi va swi anakanyaka. (Swiv. 20:5) Nakambe, vatswari va fanele va aka ripfumelo ra vana va vona hi swilo leswi nga tshwiki, leswaku ri ta tiya swinene. (1 Kor. 3:10-15) Vhidiyo leyi nge, “Marito Lawa . . . Ma Fanele Ma Va Embilwini Ya Wena” yi kombisa ndlela leyi swi nga swa nkoka ha yona ku va ni vugandzeri bya ndyangu nkarhi ni nkarhi. Yi hlaleleni tanihi ndyangu, kutani mi bula hi swivutiso leswi landzelaka.

(1) I yini leswi endleke leswaku ndyangu wa ka Maswanganyi wu nga ha swi hisekeli swilo swa moya? (2) Ha yini matshalatshala yo sungula lama endliweke hi Makwerhu Maswanganyi yo va ni vugandzeri bya ndyangu ma nga fambanga kahle? (3) Hi yihi milawu ya le Matsalweni leyi nga ku pfunaka ku kurisa vana? (Det. 6:6, 7) (4) I yini lexi nga endlaka leswaku endyangwini ku va ni ku vulavurisana lokunene? (5) I yini leswi vana va lavaka leswaku vatswari va vona va titsona swona? (6) Makwerhu Mdaka ni nkatakwe va ve ni nkucetelo lowunene eka ndyangu wa ka Maswanganyi hi ndlela yihi? (Swiv. 27:17) (7) I yini leswi nhloko ya ndyangu yi faneleke yi swi endla ka ha ri emahlweni leswaku vugandzeri bya ndyangu byi ta famba kahle? (8) Makwerhu Maswanganyi u endle yini leswaku a lulamisa xiyimo endyangwini wakwe? (9) Ha yini swi ri swa nkoka leswaku vugandzeri bya ndyangu byi va kona nkarhi ni nkarhi? (Efe. 6:4) (10) Hi swihi swilo swin’wana leswi nga endliwaka eka vugandzeri bya ndyangu? (11) Makwerhu Maswanganyi u n’wi pfune njhani Wisani hi moya wo rhula ni hi ku tiyimisela leswaku a xiya nkoka wo endla leswinene? (Yer. 17:9) (12) Makwerhu Maswanganyi ni nkatakwe va kanerisane njhani na Basani leswaku va n’wi pfuna ku endla xiboho lexinene mayelana ni vuxaka bya yena na Nyiko? (Mar. 12:30; 2 Tim. 2:22) (13) Makwerhu Maswanganyi ni nkatakwe va ri kombise njhani ripfumelo loko va endla mindzulamiso evuton’wini bya vona? (Mat. 6:33) (14) Vhidiyo leyi yi swi kombisa njhani leswaku i swa nkoka leswaku tinhloko ta mindyangu ti khathala hi vuxaka lebyi mindyangu ya tona yi nga na byona ni Xikwembu? (1 Tim. 5:8) (15) I yini leswi wena tanihi nhloko ya ndyangu u tiyimiseleke ku swi endla?

XITSUNDZUXO EKA TINHLOKO TA MINDYANGU: Drama leyi ya manguva lawa yi tlangiwe etinhlengeletanweni ta xifundzha hi 2011. Hi nkarhi wolowo, xana u vone swi fanerile leswaku ku va ni ku cinca eka vugandzeri bya n’wina bya ndyangu? Sweswi ke? Loko ku laveka mindzulamiso yo karhi, hi kombela leswaku u khongela hi mhaka leyi leswaku ndyangu wa wena wu ta vuyeriwa hilaha ku nga heriki.—Efe. 5:15-17.