Ndlela Yo Fikelela Timbilu Ta Vanhu Lava Hi Va Dyondzisaka
1. Tidyondzo ta Yesu ti endle leswaku timbilu ta vayingiseri vakwe ti khumbeka hi ndlela yihi?
1 Yesu Kreste u fikelele timbilu ta vayingiseri vakwe. Eka xiendlakalo xin’wana, timbilu ta vadyondzisiwa vakwe a ti ‘pfurha’ endzhaku ka loko a va hlamusele Matsalwa hi ndlela leyi twisisekaka. (Luka 24:32) Leswi ku yingisa Xikwembu swi faneleke swi huma embilwini, hi nga endla njhani leswaku mintlhaveko ya vanhu lava hi va dyondzisaka yi khumbeka leswaku va cinca vutomi bya vona?—Rhom. 6:17.
2. Ku va ni vuxiyaxiya ni ku twisisa swi endla leswaku mbilu ya munhu yi fikeleriwa hi ndlela yihi?
2 Vana Ni Vuxiyaxiya U Tlhela U Twisisa: Vanhu vo tala, ku va byela leswi lulameke ni leswi hoxeke ntsena a swi nge va endli va teka goza. Entiyisweni, ku xopaxopa vukhongeri bya vona hi ku va hlayela matsalwa yo tala swi nga ha endla leswaku va nga tsakeli. Leswaku hi khutaza munhu, hi fanele hi rhanga hi twisisa swivangelo swo va a pfumela eka swilo swo karhi kumbe ku endla swilo hi ndlela yo karhi. Swivutiso leswi hlawuriweke kahle, leswi lavaka vonelo ra yena, swi nga n’wi khutaza leswaku a phofula leswi a swi anakanyaka. (Swiv. 20:5) Hi ndlela yoleyo hi ta kota ku hlawula rungula leri humaka eRitweni ra Xikwembu leri nga n’wi khumbaka mbilu. Hikwalaho, hi fanele hi kombisa leswaku ha khathala hi yena hi tlhela hi n’wi lehisela mbilu. (Swiv. 25:15) Tsundzuka leswaku vanhu a va endli nhluvuko hi ndlela yo fana. Rindzela nkarhi lowu moya lowo kwetsima wa Yehovha wu nga ta kongomisa ndlela leyi va anakanyaka ha yona ni swiendlo swa vona.—Mar. 4:26-29.
3. Hi nga va pfuna njhani lava hi va dyondzisaka leswaku va hlakulela ku va ni timfanelo letinene?
3 Va Pfune Leswaku Va Hlakulela Ku Va Ni Timfanelo Letinene: Tindzimana ta le Bibeleni leti kombisaka vunene ni rirhandzu ra Yehovha ti nga pfuna lava hi va dyondzisaka leswaku va hlakulela ku va ni timfanelo letinene. Hi nga tirhisa matsalwa yo fana na Pisalema 139:1-4 kumbe Luka 12:6, 7 ku kombisa yinhla ya leswaku Xikwembu xa n’wi khathalela un’wana ni un’wana wa hina. Loko vanhu va tlangela musa lowu nga faneriwiki wa Yehovha swi suka embilwini, rirhandzu ra vona ni ku tinyiketela ka vona eka Xikwembu swi ta kula. (Rhom. 5:6-8; 1 Yoh. 4:19) Nakambe, loko va dyondza leswaku mahanyelo ya vona ma n’wi khumba Yehovha, va nga ha susumeteleka ku endla swilo hi ndlela leyi nga ta n’wi tsakisa va tlhela va n’wi xixima.—Ps. 78:40, 41; Swiv. 23:15.
4. Loko hi dyondzisa vanhu ensin’wini ya hina, hi nga swi kombisa njhani leswaku hi xixima ntshunxeko wa vona wo tihlawulela?
4 Yehovha a nga sindzisi munhu leswaku a yingisa swileriso swakwe. Ematshan’weni ya sweswo, u pfuna vanhu hi ku va komba leswaku i vutlhari ku yingisa xitsundzuxo xakwe. (Esa. 48:17, 18) Hi tekelela Yehovha loko hi dyondzisa hi ndlela leyi pfunaka vanhu leswaku va tiendlela swiboho. Loko vanhu va tibyela leswaku va lava ku cinca vutomi bya vona, loko va cinca va kuma vuyelo lebyi tekaka nkarhi wo leha. (Rhom. 12:2) Vuyelo byebyo byi ta tlhela byi va tshineta swinene eka “mukambisisi wa timbilu,” ku nga Yehovha.—Swiv. 17:3.