Hi Nga Yi Tirhisa Njhani Buku Leyi Nge I Yini Leswi Hi Nga Swi Dyondzaka eBibeleni?

Buku leyi nge Leswi Hi Nga Swi Dyondzaka ni leyi nge Leswi Bibele Yi Swi Dyondzisaka ta yelana. Hatimbirhi ti dyondzisa rungula leri fanaka. Hambileswi buku leyi nge Leswi Hi Nga Swi Dyondzaka eBibeleni yi nga riki kona hi Xitsonga, yi olovisiwile naswona ya twisiseka. Yi endleriwe lava swi va tikelaka ku twisisa buku leyi nge Leswi Bibele Yi Swi Dyondzisaka. Buku leyi nge Leswi Hi Nga Swi Dyondzaka a yi na xiengetelo, yo va ni tinhlamuselo ta le hansi leti hlamuselaka marito yo tika lama tirhisiweke eka tindzima. Tindzima ta yona a ti na swivutiso eku sunguleni ka ndzima, naswona a ti na bokisi ra mpfuxeto. Ti hetelela hi nkatsakanyo wa ntiyiso wa Bibele lowu hlamuseriweke endzeni ka ndzima. Ku fana ni buku leyi nge Leswi Bibele Yi Swi Dyondzisaka, buku leyi nge Leswi Hi Nga Swi Dyondzaka yi nga fambisiwa nkarhi wun’wana ni wun’wana, hambiloko yi nga ri kona eka nxaxamelo wa minkandziyiso leyi fambisiwaka nh’weti yoleyo. Xana buku leyi nge Leswi Hi Nga Swi Dyondzaka hi nga yi tirhisa njhani hi ndlela leyinene loko hi fambisa dyondzo ya Bibele?

NKATSAKANYO: Vanhu vo tala va yi twisisa ndlela leyi hi fambisaka dyondzo ha yona hi ku rhanga hi hlaya tindzimana ta buku leyi nge Leswi Bibele Yi Swi Dyondzisaka ivi hi vutisa xivutiso. Hambiswiritano, swi nga endleka leswaku xichudeni a xi ri tolovelanga ririmi leri hi hlayaka na xona ha rona kumbe a xi swi koti ku hlaya. Loko swi ri tano, u nga ha tirhisa buku leyi nge Leswi Hi Nga Swi Dyondzaka. U nga tirhisa nkatsakanyo wa ndzima leswaku u fambisa dyondzo, naswona u nga khutaza xichudeni leswaku xi tihlayela ndzima hinkwayo. Hakanyingi, ntiyiso wun’wana ni wun’wana lowu nga eBibeleni mi nga wu dyondza hi nkarhi wa dyondzo leyi tekaka kwalomu ka timinete ta 15. Tanihi leswi nkatsakanyo lowu wu nga katsiki rungula leri nga eka ndzima, loyi a fambisaka dyondzo u fanele a lunghiselela kahle, a ri karhi a anakanyisisa hi swilaveko swa xichudeni xakwe. Loko loyi a fambisaka dyondzo a tirhisa ndzima, ku nga tirhisiwa nkatsakanyo leswaku ku pfuxetiwa leswi dyondziweke.

TINHLAMUSELO TA LE HANSI: Marito lama kumekaka eka tinhlamuselo ta le hansi ma xaxametiwe hi ndlela leyi ma kumekaka ha yona endzeni ka ndzima. Loyi a fambisaka dyondzo a nga hlawula loko a lava leswaku va bula hi tinhlamuselo ta le hansi leti nga eka buku leyi nge Leswi Hi Nga Swi Dyondzaka hi nkarhi wa dyondzo.