“Pawulo A Nkhensa Xikwembu A Tiya Nhlana”

Loko vandlha ra le Rhoma ri twa leswaku Pawulo u le ku teni, vamakwerhu va teke riendzo ra kwalomu ka 64 wa tikhilomitara leswaku va n’wi hlanganisa. Xana rirhandzu leri va n’wi kombeke rona ri n’wi khumbe njhani? “Loko a va vona, Pawulo a nkhensa Xikwembu, a tiya nhlana.” (Min 28:15) Hambileswi Pawulo a tiveka hi ku tiyisa mavandlha lawa a ma endzela, leswi a ri ekhotsweni hi yena loyi a khutaziwa.—2Ko 13:10.

Namuntlha valanguteri va miganga va endzela mavandlha leswaku va khutaza vamakwerhu. Ku fana ni Vakreste hinkwavo, mikarhi yin’wana va karhala, va vilela ni ku hela matimba. Loko mulanguteri wa muganga ni nsati wa yena va endzela vandlha ra ka n’wina, u nga va khutaza njhani leswaku mi ta tiyisana ‘eripfumelweni’?—Rhm 1:11, 12.

• 

  Vana kona ensin’wini. Mulanguteri wa muganga wa khutazeka loko vahuweleri va va kona eka migingiriko hinkwayo ya vhiki ro hlawuleka. (1Te 1:2, 3; 2:20) U nga teka vuphayona bya nkarhinyana hi n’hweti yoleyo. U nga kombela ku tirha na yena nsimu swin’we ni nsati wa yena kumbe u famba ni un’we wa vona eka tidyondzo ta wena ta Bibele. Va tsaka loko va tirha nsimu ni vahuweleri vo hambanahambana ku katsa ni vahuweleri lavantshwa.

• 

  Va kombe malwandla. Va rhurhele ekaya ra wena kumbe u va rhamba leswaku va ta dya na wena. Loko u endla leswi, va ta swi xiya leswaku wa va rhandza hakunene. A va langutelanga swilo swa xiyimo xa le henhla.—Lk 10:38-42.

• 

  Yingisa switsundzuxo leswi a ku nyikaka swona u tlhela u swi tirhisa. Mulanguteri wa muganga hi rirhandzu u hi pfuna leswaku hi antswisa ndlela leyi hi tirhelaka Yehovha ha yona. Mikarhi yin’wana a nga hi nyika switsundzuxo. (1Ko 5:1-5) Wa tsaka loko hi n’wi yingisa hi tlhela hi titsongahata.—Hv 13:17.

• 

  Kombisa ku tlangela. Byela mulanguteri wa muganga ni nghamu yakwe ndlela leyi u khutazekaka ha yona loko u vona matshalatshala lawa va ma endlaka. U nga va byela hi nomu kumbe hi ku va tsalela.—Kl 3:15.