Ha Khutazana Hinkwerhu
1. Hi rihi lunghelo ro hlawuleka leri hi vaka na rona loko valanguteri va swifundzha ni va miganga va hi endzerile?
1 Muapostola Pawulo u tsalele vandlha ra le Rhoma a ku: “Ndzi navela ku mi vona, leswaku ndzi ta mi nyika nyiko yo karhi ya moya, mi ta tiyisiwa; kumbe, leswaku mi ta khutazana, un’wana hi ripfumelo ra un’wana, ra n’wina ni ra mina.” (Rhom. 1:11, 12) Manguva lawa, loko valanguteri va swifundzha ni va miganga va hi endzerile, va kota ku khutaza vamakwerhu va tlhela va khutazeka na vona vini.
2. Ha yini ku endza ka mulanguteri wa xifundzha ku tivisiwa ka ha ri ni nkarhi?
2 Evandlheni: Hakanyingi loko mulanguteri wa xifundzha a ta hi endzela, vandlha ri tivisiwa ka ha sele tin’hweti tinharhu. Leswi swi hi nyika nkarhi wo hlela ka ha ri emahlweni leswaku hi ta vuyeriwa hi xitalo. (Efe. 5:15, 16) Loko u tirha, kumbexana u nga ha kota ku kombela ku xwa entirhweni leswaku u ta ya ensin’wini hi vhiki ra kona. Van’wana va hlela ku va maphayona ya nkarhinyana hi n’hweti leyi mulanguteri wa xifundzha a nga ta endza ha yona. Loko u hlele ku teka riendzo, ha yini u nga cinci nkarhi wa riendzo ra wena leswaku u ta va kona hi vhiki rolero?
3. U nga endla yini loko mulanguteri wa xifundzha a endzile leswaku u ta kuma xikhutazo?
3 Xikongomelo-nkulu xa ku endza ka mulanguteri wa xifundzha i ku hi khutaza ni ku hi letela ensin’wini. Xana u nga kombela ku tirha na yena kumbe ni nsati wa yena loko a tekile? Mulanguteri wa xifundzha u tsakela ku tirha ni vahuweleri vo hambana-hambana, ku katsa ni lava nga riki na ntokoto ngopfu kumbe lava navelaka ku va ni vutshila lebyi engetelekeke ensin’wini. Hinkwerhu hi nga dyondza eka swingheniso leswi a hi dyondzisaka swona naswona hi tirhisa swiringanyeto swin’wana ni swin’wana leswi a nga ta hi nyika swona. (1 Kor. 4:16, 17) Loko u n’wi rhamba leswaku a ta dya na wena swi nga ha mi pfulela lunghelo ra leswaku mi khutazana. (Hev. 13:2) Leswi tinkulumo ta yena ti fambisanaka ni swilaveko swa vandlha, yingisela hi vukheta.
4. Xana hi nga n’wi khutaza njhani mulanguteri wa hina wa xifundzha?
4 Mulanguteri Wa Xifundzha: Muapostola Pawulo a a fana ni vamakwerhu lava a a va endzela hikuva u langutane ni swiphiqo ni ku karhateka kutani a a lava xikhutazo naswona u xi tlangerile. (2 Kor. 11:26-28) Loko vamakwerhu va vandlha ra le Rhoma va twa leswaku Pawulo, loyi hi nkarhi wolowo a a ri mubohiwa, u le ku teni, van’wana va ye eNdhawini ya ku Xavisela ya Apiyo leswaku va ya n’wi vona—laha a ku ri mpfhuka wa tikhilomitara ta 74! “Loko a va vona, Pawulo a nkhensa Xikwembu, a tiya nhlana.” (Mint. 28:15) Hilaha ku fanaka, na wena u nga n’wi khutaza mulanguteri wa wena wa xifundzha. N’wi kombise ku ‘xixima loku andzisiweke kambirhi’ hi ku n’wi seketela loko a endzile. (1 Tim. 5:17) N’wi kombise leswaku u ma tlangela hi mbilu hinkwayo matshalatshala lama a ma endlaka hikwalaho ka n’wina. Yena ni nsati wakwe va ta tsaka loko va xiya ripfumelo, rirhandzu ni ku tiyisela ka wena.—2 Tes. 1:3, 4.
5. Ha yini hinkwerhu ka hina hi lava ku khutaziwa namuntlha?
5 ‘Eminkarhini leyi ya mangava leyi swi nonon’hwaka ku langutana na yona,’ hinkwerhu ha swi lava ku khutaziwa! (2 Tim. 3:1) Sweswi endla xiboho xo va kona ni ku hlanganyela hi xitalo eka vhiki leri ro hlawuleka ro tirha ni mulanguteri wa xifundzha. Hinkwerhu ka hina—valanguteri va xifundzha ni vahuweleri—hi nga khutazana hi ndlela leyi tsakisaka. Hi ndlela yoleyo hi ta ‘hambeta hi chavelelana ni ku akana.’—1 Tes. 5:11.