Ku Phayona

Hi tirhisa matimba ya hina hi ndlela leyinene hi ku endlela Yehovha leswi engetelekeke. (1Ko 9:26) Nkarhi lowu saleke i wutsongo, hikwalaho, ku tiyimisela ku endla swo karhi swi ta hi pfuna ku tirhisa nkarhi wa hina hi vutlhari. (Ef 5:15, 16) Eka vugandzeri bya ndyangu, bulani hi leswi mi tiyimiseke ku swi endla eka lembe lerintshwa ra ntirho. Xibukwana lexi xa tinhlengeletano xi ni tinhlokomhaka leti nga mi pfunaka, leti vulavulaka hi leswi mi nga tiyimiselaka ku swi endla.​—Yk 1:5.

Hi xikombiso, xana ndyangu wu nga pfunana leswaku un’wana ekaya a phayona nkarhi hinkwawo? Loko u vona onge u nge swi koti ku fikelela tiawara leti lavekaka, vulavula ni maphayona lama nga le ka xiyimo xo fana ni xa wena. (Swiv 15:22) Kumbexana mi nga rhamba phayona eka vugandzeri bya ndyangu leswaku mi ta bula na rona. Endla xiyimiso lexi u nga kotaka ku xi fikelela. Loko ku ve u tshama u phayona, kambisisa loko swiyimo swa wena swi ku pfumelela leswaku u thlela u phayona.

Xana van’wana endyangwini va nga phayona nkarhinyana ku ringana nh’weti yin’we kumbe ku tlula? Loko u nga ri na matimba, u nga ha phayona swa nkarhinyana hi ku heta nkarhi wutsongo siku ni siku u ri ensin’wini. Loko u nga swi koti ku ya ensin’wini xikarhi ka vhiki hikwalaho ka ntirho kumbe xikolo kumbexana u nga hlawula nh’weti leyi nga ni tiholideyi kumbe leyi nga ni mahelo vhiki ya ntlhanu. Eka khalenda ya wena, hlela leswaku u lava ku byi teka rini vuphayona bya nkarhinyana kutani u endla xiyimiso.​—Swiv 21:5

HLALELANI VHIDIYO LEYI NGE, VANA . . . PHAYONA LERI NGA NI XIVINDZI KUTANI MI HLAMULA XIVUTISO LEXI LANDZELAKA:

• Ntokoko wa Aamand wu hi dyondzisa yini hi ndlela leyi Yehovha a rhandzaka ni ku kathalela lava titsonaka swo karhi leswaku va phayona?