“Va Tsaka Lava Tshamaka Va Tshembekile” Eka Yehovha

1-2. (a) Mifumo yin’wana yi endle yini leswaku yi lwisana ni vanhu va Yehovha kambe vanhu vakwe va endle yini? (b) Loko hi xanisiwa swi nga hi tisela ntsako hi ndlela yihi? (Nakambe hlamusela leswi nga eka xifaniso lexi nga eka xifunengeto.)

SWESWI ntirho wa hina a wu pfumeleriwi kumbe wu yirisiwile ematikweni yo tlula 30 emisaveni hinkwayo. Eka man’wana ya matiko wolawo, valawuri va pfalele vamakwerhu ejele. Xana va fela yini? A va endlanga nchumu naswona Yehovha a nga va voni nandzu. Va fela ntsena ku va va dyondza Bibele, va chumayela van’wana ni ku ya etinhlengeletanweni ta vandlha. Nakambe a va katseki eka swa tipolitiki. Hambiloko ma kanetiwa, malandza lawa yo tshembeka ya Xikwembu ma tshame ma tshembekileb ni ku kombisa leswaku ma tinyiketerile eka Yehovha. Ma endla sweswo ma tsakile!

² Swi nga endleka u swi vonile swifaniso swa Timbhoni leti nga na xivindzi naswona u swi xiyile leswaku ta n’wayitela. Ti tsakile hikuva ta swi tiva leswaku Yehovha u tsakile hikwalaho ka leswi ti tshembekeke eka yena. (1 Tikr. 29:17a) Yesu u te: “Va tsaka lava xanisiweke hikwalaho ka leswo lulama. Tsakani swinene hikuva hakelo ya n’wina i yikulu.”—Mat. 5:10-12.

VA HI VEKELE XIKOMBISO

3. Hi ku ya hi Mitirho 4:19, 20 vaapostola va Yesu va endle yini loko va xanisiwa naswona hikwalahokayini?

³ Vamakwerhu va xanisiwa ku fana ni vaapostola va Yesu lava a va fela ku chumayela hi Yesu. Hi ku phindhaphindha, vaavanyisi va le khoto ya le henhla ya Vayuda “va va leris[e] leswaku va tshika ku vulavula hi vito ra Yesu.” (Mit. 4:18; 5:27, 28, 40) Vaapostola va endle yini? (Hlaya Mitirho 4:19, 20.) A va swi tiva leswaku Yesu u va ‘lerise leswaku va chumayela vanhu ni ku nyikela vumbhoni lebyi heleleke’ hi Kreste. (Mit. 10:42) Kutani vayimeri va vona ku nga Petro na Yohane, hi xivindzi va vule leswaku va ta yingisa Xikwembu ku nga ri vaavanyisi volavo naswona va vule leswaku a va nge tshiki ku vulavula hi Yesu. Kutani a swi fana niloko va vutisa vaavanyisi volavo va ku, ‘Xana mi vula leswaku swileriso swa n’wina swi tlakukile eka swa Xikwembu?’

4. Hilaha swi kombisiweke hakona eka Mitirho 5:27-29, hi xihi xikombiso lexi vaapostola va xi vekeleke Vakreste hinkwavo va ntiyiso naswona hi nga va tekelela njhani?

⁴ Vaapostola va vekele Vakreste hinkwavo va ntiyiso xikombiso lexinene naswona se i khale va ri karhi va xi landzela ku nga ku “yingisa Xikwembu tanihi mufumi ku tlula vanhu.” (Hlaya Mitirho 5:27-29.) Endzhaku ka loko va biwile hikwalaho ka leswi a va tshembekile, vaapostola va hume ekhoto leyikulu ya Vayuda va “tsakile hikuva a va tekiwa va faneriwa hi ku xaniseka hikwalaho ka vito ra Yesu” naswona va ye emahlweni va chumayela!—Mit. 5:40-42.

5. Hi swihi swivutiso leswi hi faneleke hi swi hlamula?

⁵ Xikombiso lexi vaapostola va hi vekeleke xona xi hi endla hi tivutisa. Hi xikombiso, vaapostola va swi kotise ku yini ku yingisa Xikwembu ku tlula vanhu hi nkarhi lowu fanaka va yingisa xileriso xa Matsalwa xa leswaku va ‘yingisa lava fumaka?’ (Rhom. 13:1) Hi nga “titsongahata ni ku yingisa mifumo ni valawuri” njhani hilaha muapostola Pawulo a vuleke ha kona, hi hala tlhelo hi tshembeka eka Xikwembu tanihi mufumi wa hina loyi a tlakukeke?—Tito 3:1.

“LAVA FUMAKA”

6. (a) I vamani “lava fumaka” lava hlamuseriweke eka Varhoma 13:1 naswona hi fanele hi tirhisana na vona njhani? (b) Hi swihi leswi vafumi va pfumeleriweke ku va na swona?

⁶ Hlaya Varhoma 13:1. Eka ndzimana leyi, xiga “lava fumaka” xi kombetela eka vafumi lava nga ni matimba naswona va lawulaka van’wana. Vakreste va fanele va yingisa vafumi volavo. Va endla leswaku ku va ni ku rhula ni ku tlhela va endla leswaku milawu yi yingisiwa naswona mikarhi yin’wana va sirhelela vanhu va Yehovha. (Nhlav. 12:16) Hi lerisiwa leswaku hi hakela swibalo, muthelo, hi va komba xichavo ni ku va xixima loko va swi lava. (Rhom. 13:7) Hambiswiritano, vafumi lava va ni matimba hileswi Yehovha a va nyikeke wona. Yesu u yi veke erivaleni mhaka leyi loko a konanisiwa hi Ndhunankulu ya le Rhoma Pontiyo Pilato. Loko Pilato a byela Yesu leswaku u ni matimba ya ku endla leswaku a dlayiwa kumbe a nga dlayiwi, Yesu u n’wi byele a ku: “Loko Xikwembu a xi nga ku nyikanga wona a wu nga ta va ni matimba eka mina.” (Yoh. 19:11) Hilaha a swi ri hakona hi Pilato vafumi ni van’watipolitiki lava nga kona namuntlha va ni vulawuri lebyi pimiweke.

7. Hi le ka swiyimo swihi laha hi nga fanelangiki hi va yingisa vafumi naswona i yini leswi va faneleke va swi tiva?

⁷ Vakreste va yingisa milawu ya vafumi leyi nga lwisaniki ni milawu ya Xikwembu. Kambe a hi va yingisi loko va lava hi endla leswi Xikwembu xi nga swi laviki kumbe loko va hi alela ku endla leswi Xikwembu xi swi lavaka. Hi xikombiso, va nga ha lava leswaku majaha ma ya lwela tiko.c Kumbe va nga ha yirisa Bibele ni minkandziyiso ya hina leyi sekeriweke eBibeleni ni ku hi alela ku ya chumayela ni ku gandzela swin’we. Loko va tirhisa vulawuri bya vona hi ndlela yo biha, hi ku xanisa vadyondzisiwa va Kreste, va ta tihlamulela eka Xikwembu. Yehovha wa va vona!—Ekl. 5:8.

8. Hi kwihi ku hambana eka lava “fumaka” ni le ka loyi a “tlakukeke” naswona hikwalahokayini ku hambana loku ku ri ka nkoka?

⁸ Lava “fumaka” va endla swo tala leswinene ni ku va ni matimba yo lawula van’wana. Kambe sweswo a swi vuli swona leswaku a va swi endli swihoxo ni leswaku va tlakukile. Kambe ku ni Loyi a hetisekeke naswona a tlakukeke eka vafumi hinkwavo ku nga Yehovha Xikwembu. Xiga lexi nge, “Loyi a Tlakukeke” lexi tirhiseriwaka ku fundza Yehovha Xikwembu xi humelela ka tsevu eBibeleni.—Esa. 57:15; Dan. 7:18, 22, 25, 27; Hos. 11:7.

“LOYI A TLAKUKEKE”

9. Muprofeta Daniyele u vone yini eswivonweni?

⁹ Muprofeta Daniyele u vone swivono leswi kombiseke ku tlakuka ka Yehovha loku tlulaka ka vafumi lavan’wana. Daniyele u sungule hi ku vona swivandzana swa mune leswikulu leswi yimelaka mimfumo leyi fumeke khale ku nga Babilona, Meda-Peresiya, Grikiya, Rhoma ni mfumo lowu sweswi wu nga le ku fumeni ku nga wa Manghezi ni Maamerika. (Dan. 7:1-3, 17) Hiloko Daniyele a vona Yehovha Xikwembu a tshame exiluvelweni xakwe ehubyeni ya le tilweni. (Dan. 7:9, 10) Leswi muprofeta yoloye wo tshembeka a swi voneke endzhaku ka sweswo, swi fanele swi va xilemukiso eka vafumi va namuntlha.

10. Hi ku ya hi Daniyele 7:13, 14, 27, i vamani lava Yehovha a va hlawulaka leswaku va fuma misava naswona leswi swi kombisa yini ha Yena?

¹⁰ Hlaya Daniyele 7:13, 14, 27. Xikwembu xi tekela vanhu vuhosi xi byi nyika lava byi va faneleke ni lava nga ni matimba. Xi byi nyika vamani? Xi byi nyika “loyi a fanaka ni n’wana wa munhu” ku nga Yesu Kreste ni “vakwetsimi va Loyi a Tlakukeke” ku nga lava 144 000 lava nga ta “fuma hilaha ku nga heriki.” (Dan. 7:18) Swi le rivaleni leswaku Yehovha hi yena “Loyi a Tlakukeke” hikuva hi yena ntsena a ri yexe la nga ni matimba yo endla sweswo.

11. Hi swihi swin’wana leswi Daniyele a swi tsaleke leswi kombisaka leswaku Yehovha u tlakukile eka matiko?

¹¹ Leswi Daniyele a swi voneke exivonweni swi fambisana ni nchumu wun’wana a nga wu vula eku sunguleni. Daniyele u te, “Xikwembu xa le tilweni . . . , xi susa tihosi xi tlhela xi veka tin’wana.” U tlhele a tsala leswaku “La Nge Henhlahenhla i Mufumi emfun’weni wa vanhu, nileswaku u wu nyika un’wana ni un’wana loyi a n’wi rhandzaka.” (Dan. 2:19-21; 4:17) Xana ku tshame ku va ni nkarhi lowu Yehovha a suseke tihosi a ti siva hi tin’wana? Ina!

12. Nyika xikombiso xa ndlela leyi Yehovha a suseke tihosi emfun’weni enkarhini lowu hundzeke. (Vona xifaniso.)

¹² Yehovha se u swi kombisile leswaku u tlakukile eka “vafumi lava nga kona.” Xiya swikombiso swinharhu. Faro wa le Egipta u endle vanhu va Yehovha mahlonga naswona hi ku phindhaphindha u ale ku va tshunxa. Kambe Yehovha u va tshunxile ivi a nwerisa Faro eLwandle ro Tshwuka. (Eks. 14:26-28; Ps. 136:15) Hosi Belxatsara u endle nkhuvo ivi a “titlakus[a] eka Hosi ya matilo” ni ku “dzunisa swikwembu swa silivhere ni swa nsuku” ematshan’weni yo dzunisa Yehovha. (Dan. 5:22, 23) Kambe Xikwembu xi yi tsongahatile hosi yoleyo leyi nga ni manyunyu. “Hi vusiku byebyo” Belxatsara u dlayiwile naswona mfumo wakwe wu nyikiwe Vameda ni Vaperesiya. (Dan. 5:28, 30, 31) Hosi Heroda Agripa Wo Sungula wa le Palestina u endle leswaku muapostola Yakobo a dlayiwa ivi a pfalela muapostola Petro ejele hi xikongomelo xa leswaku na yena a dlayiwa. Kambe Yehovha a nga n’wi pfumelelanga Heroda leswaku a ya emahlweni na makungu yakwe. ‘Ntsumi ya Yehovha yi n’wi bile’ naswona u file.—Mit. 12:1-5, 21-23.

13. Nyika xikombiso xa ndlela leyi Yehovha a hluleke ntlawa wa tihosi.

¹³ Nakambe Yehovha u kombise leswaku u tlakukile eka ntlawa wa tihosi. U lwele Vaisrayele ni ku va pfuna leswaku va lovisa tihosi ta 31 ta Vakanana leti hlanganeke ni ku hlula tindhawu letikulu eTikweni leri Tshembisiweke. (Yox. 11:4-6, 20; 12:1, 7, 24) Nakambe Yehovha u hlule Hosi Beni-hadadi ni tihosi ta 32 ta Vasiriya leti lweke ni Vaisrayele.—1 Tih. 20:1, 26-29.

14-15. (a) Hosi Nebukadnetsara na Dariyosi va vule yini hi vuhosi bya Yehovha? (b) Mupisalema u vule yini hi Yehovha ni hi vanhu Vakwe?

¹⁴ Hi ku phindhaphindha, Yehovha u swi kombisile leswaku hi Loyi a Tlakukeke! Loko Hosi Nebukadnetsara wa le Babilona a tinyungubyise hi ‘matimba ya yena, ndhuma ni ku xiximeka kakwe’ ematshan’weni yo titsongahata ivi a dzunisa Yehovha tanihi Loyi a faneriwaka hi ku dzunisiwa, Xikwembu xi endle leswaku a hlangana nhloko. Endzhaku ka loko miehleketo ya Nebukadnetsara yi vuyile u “dzunis[e] La Nge Henhlahenhla” naswona se a a pfumela leswaku “ku fuma ka [Yehovha] i ku fuma ka nkarhi lowu nga riki na makumu.” U tlhele a ku: “A nga kona loyi a nga n’wi sivelaka.” (Dan. 4:30, 33-35) Endzhaku ka loko Daniyele a ringiwile naswona Yehovha a n’wi ponisile ekheleni ra tinghala, Hosi Dariyosi u te: “[Vanhu] va fanele va chava Xikwembu xa Daniyele. I Xikwembu lexi hanyaka, lexi xi nga ta va kona hilaha ku nga heriki. Mfumo wa xona a wu nge pfuki wu lovisiwile, xi ta fuma hilaha ku nga heriki.”—Dan. 6:7-10, 19-22, 26, 27.

¹⁵ Mupisalema u te: “Yehovha u pfilunganye makungu ya matiko; u onhe tipulani ta vanhu.” U tlhele a ku: “Ra tsaka tiko leri Xikwembu xa rona ku nga Yehovha, vanhu lava a va hlawuleke leswaku va va ndzhaka yakwe.” (Ps. 33:10, 12) Hakunene hi ni xivangelo lexi twalaka xo va hi tshembeka eka Yehovha!

NYIMPI YO HETELELA

16. I yini leswi hi nga tiyisekaka ha swona hi nkarhi wa “nhlomulo lowukulu” naswona hikwalahokayini? (Vona xifaniso.)

¹⁶ Hi twile hileswi Yehovha a swi endleke enkarhini lowu hundzeke. Kutani, i yini leswi hi nga swi langutelaka ku nga ri kahle? Hi nga tiyiseka leswaku Yehovha u ta ponisa malandza yakwe yo tshembeka hi nkarhi wa “nhlomulo lowukulu.” (Mat. 24:21; Dan. 12:1) U ta endla leswi loko Gogo wa Magogo ku nga matiko lama hlanganeke a hlasela malandza yo tshembeka ya Yehovha emisaveni hinkwayo. Hambiloko matiko wolawo lama hlanganeke ma katsa swirho wa 193 swa Nhlangano wa Matiko, a ma nge wu voni ntlangu eka Loyi a Tlakukeke ni mavuthu yakwe ya le tilweni! Yehovha u tshembisa leswi: “Ndzi ta titlakusa ndzi tikwetsimisa, ndzi titivisa emahlweni ka matiko yo tala; ma ta swi tiva leswaku hi mina Yehovha.”—Ezek. 38:14-16, 23; Ps. 46:10.

17. Bibele yi tshembisa leswaku ku ta endleka yini hi tihosi ta misava ni lava tshembekaka eka Yehovha?

¹⁷ Armagedoni yi ta va kona endzhaku ka loko Gogo a hlasele vanhu va Xikwembu naswona Yehovha u ta lovisa “tihosi ta misava hinkwayo.” (Nhlav. 16:14, 16; 19:19-21) Kutani “lavo lulama hi vona ntsena lava nga ta tshama emisaveni kutani lava tshamaka va tshembekile va ta sala eka yona.”—Swiv. 2:21.

HI FANELE HI TSHAMA HI TSHEMBEKILE

18. I yini leswi Vakreste vo tala va ntiyiso va tiyimiseleke ku swi endla naswona hikwalahokayini? (Daniyele 3:28)

¹⁸ Se swi endla malembe Vakreste vo tala va ntiyiso va veka hambi ku ri vutomi bya vona ekhombyeni ni ku lahlekeriwa hi ntshunxeko wa vona hileswi va rhandzaka Yehovha tanihi Mufumi wa vona loyi a Tlakukeke. Vakreste lava va tshembekile naswona va tiyimisele ku tshama va tshembekile ku fana ni Vaheveru vanharhu lava ponisiweke ekheleni ra ndzilo hileswi va tshameke va tshembekile eka Loyi a Tlakukeke.—Hlaya Daniyele 3:28.

19. I yini leswi Yehovha a nga ta swi languta loko a avanyisa vanhu vakwe naswona hi fanele hi endla yini sweswi?

¹⁹ Mupisalema Davhida u tsale hi ndlela leyi swi nga swa nkoka hayona ku tshembeka eka Xikwembu, u te: “Yehovha u ta gweva vanhu. Ndzi avanyise Yehovha hi ku ya hi ku lulama ka mina.” (Ps. 7:8) Nakambe Davhida u tsale a ku: “Onge ku tshembeka ni ku lulama swi nga ndzi sirhelela.” (Ps. 25:21) Nchumu wa nkoka swinene i ku tshama hi tshembekile eka Yehovha hambi ko endleka yini evuton’wini bya hina! Kutani hi ta titwa ku fana ni mupisalema loyi a tsaleke a ku: “Va tsaka lava tshamaka va tshembekile, lava hanyaka hi nawu wa Yehovha.”—Ps. 119:1.