Xikwembu Xa Khathala Hi Wena
BIBELE i buku leyi humaka eka Xikwembu leyi nga ni nkongomiso lowu nga hi pfunaka. A hi buku ya nkongomiso wa swa rihanyo kambe yi nga hi pfuna hi tindlela to tala leswaku hi langutana ni swiyimo leswi vangaka ntshikilelo, swi kavanyetaka ndlela leyi hi ehleketaka hayona, swi hi vavisaka mintlhaveko, swi hi twisaka ku vava emirini ni le miehleketweni.
Xa nkoka swinene, Bibele yi hi tiyisekisa leswaku Muvumbi wa hina Yehovha Xikwembu,a wa yi twisisa miehleketo ni ndlela leyi hi titwaka hayona ku tlula mani na mani. U lava ku hi pfuna hi lwisana ni swiphiqo leswi hi langutanaka na swona. Hi xikombiso, xiya tindzimana timbirhi ta le Bibeleni leti chavelelaka:
“Yehovha u le kusuhi ni lava tshovekeke timbilu; u ponisa lava hetiweke matimba.”—PISALEMA 34:18.
“Mina, Yehovha Xikwembu xa wena, ndzi khoma voko ra wena ra xinene, loyi a ku byelaka a ku, ‘U nga chavi. Ndzi ta ku pfuna.’”—ESAYA 41:13.
Yehovha u hi pfuna njhani leswaku hi langutana ni swiphiqo swa miehleketo? Hilaha u nga ta swi vona hakona eka tinhlokomhaka leti landzelaka, Yehovha u swi kombise hi tindlela to tala leswaku wa khathala hi hina.
a Yehovha i vito ra Xikwembu.—Pisalema 83:18.