Ndzi Lava Ku Tidlaya—Xana Bibele Yi Nga Ndzi Pfuna Loko Ndzi Ehleketa Hi Ku Tisunga?

Nhlamulo ya Bibele

Ina! Bibele yi huma eka “Xikwembu lexi chavelelaka lava tshikilelekeke.” (2 Vakorinto 7:6) Hambileswi Bibele yi nga riki buku yo tshungula mavabyi ya miehleketo kambe yi pfune vo tala leswaku va tshika ku ehleketa hi ku tisunga. Na wena yi nga ku pfuna.

Bibele yi nyikela switsundzuxo swihi leswi pfunaka?

● Phofulela van’wana ndlela leyi u titwaka ha yona.

Leswi Bibele yi swi vulaka: “Munghana wa ntiyiso u kombisa rirhandzu mikarhi hinkwayo, i makwenu wa ntiyiso loko u ri emaxangwini.”—Swivuriso 17:17.

Leswi tsalwa leri ri vulaka swona: Hi lava mpfuno wa van’wana loko ku ri ni swilo leswi hi tshikilelaka.

Loko u miyela hi leswi nga ku dyisiki byi rhelela, swi ta ku tshikilela lerova u nga ha koti ku swi tiyisela. Kambe loko u nga miyeli na swona, u nga titwa u antswa naswona u ta kota ni ku va ni langutelo lerinene hi xiyimo xa wena.

Ringeta leswi: Namuntlha vulavula ni un’wana, kumbexana ni xirho xa ndyangu kumbe munghana loyi u n’wi tshembaka.a U nga tlhela u tsala ndlela leyi u titwaka ha yona ehansi.
● Lava mpfuno wa madokodela.

Leswi Bibele yi swi vulaka: “Vanhu lava hanyeke kahle a va lavi dokodela, kambe u laviwa hi lava vabyaka.”—Matewu 9:12.

Leswi tsalwa leri ri vulaka swona: Hi fanele hi ya eka madokodela loko hi vabya.

Loko munhu a ehleketa hi ku tisunga ku nga ha va xikombiso xa leswaku swin’wana a swi fambi kahle emiehleketweni. Leswi swi nga khomisiki tingana loko munhu a twa ku vava emirini, munhu la tshikileriwaka hi miehleketo ya ku tisunga a nga fanelanga a khomiwa hi tingana. Mavabyi ya mianakanyo ma nga tshunguleka.

Ringeta leswi: Hatla u ya lava mpfuno eka dokodela.
● Tsundzuka leswaku Xikwembu xi na mhaka na wena.

Leswi Bibele yi swi vulaka: “Xana swindzingiri swa ntlhanu a swi xavisiwi hi tisente timbirhi? Kambe Xikwembu a xi rivali hambi ku ri xin’we xa swona. . . . Mi nga chavi; mi va nkoka ku tlula swindzingiri swo tala.”—Luka 12:6, 7.

Leswi tsalwa leri ri vulaka swona: U wa risima eka Xikwembu.

U nga titwa u ri n’wamuyexe kambe Xikwembu xa swi vona hinkwaswo leswi ku tikiselaka. Xi na mhaka na wena hambiloko u nga ha naveli ku hanya. Pisalema 51:17 yi ri: “A wu nge yi fularheli mbilu leyi tshovekeke . . . Xikwembu xanga.” Xikwembu xi lava leswaku u hanya hikuva xa ku rhandza.

Ringeta leswi: Kambisisa leswi Bibele yi swi vulaka leswi kombisaka leswaku Xikwembu xa ku rhandza. Hi xikombiso, vona ndzima 24 eka buku yo pfuneta ku dyondza Bibele leyi nge, Tshinela Eka Yehovha.
● Khongela eka Xikwembu.

Leswi Bibele yi swi vulaka: “Mi lahlela ku vilela ka n’wina hinkwako eka [Xikwembu], hikuva xa khathala hi n’wina.”—1 Petro 5:7.

Leswi tsalwa leri ri vulaka swona: Xikwembu xi lava u xi byela hinkwaswo leswi ku karhataka.

Xikwembu xi ta ku nyika ku rhula ni matimba ya ku ya emahlweni u tiyisela maxangu ya wena. (Vafilipiya 4:6, 7, 13) Hi ndlela yoleyo Xikwembu xi seketela hinkwavo lava khongelaka eka xona swi suka embilwini.—Pisalema 55:22.

Ringeta leswi: Namuntlha khongela eka Xikwembu. Loko u ri karhi u khongela tirhisa vito ra xona leri nge Yehovha, u xi byela ndlela leyi u titwaka ha yona. (Pisalema 83:18) Xi kombele xi ku pfuna u nga lahli thawula.
● Anakanyisisa hi vumundzuku lebyi hi tshembisiwaka byona eBibeleni.

Leswi Bibele yi swi vulaka: “Hi ni ntshembo lowu tanihi nsoma wa vutomi bya hina, wu tiyile naswona wa tshembeka.”—Vaheveru 6:19.

Leswi tsalwa leri ri vulaka swona: Ndlela leyi u titwaka ha yona yi nga fana ni xikepe lexi ndlengandlengisiwaka hi xidzedze, kambe ntshembo lowu hi wu kumaka eBibeleni wu nga ku tiyisa.

Ntshembo lowu a hi norho kambe wu huma eka xitshembiso xa Xikwembu xa ku susa leswi hi twisaka ku vava.—Nhlavutelo 21:4.

Ringeta leswi: Dyondza swo tala hi ntshembo lowu wa le Bibeleni hi ku hlaya dyondzo 5 ya broxara leyi nge, Mahungu Lamanene Lama Humaka Eka Xikwembu!
● Endla leswi ku tsakisaka.

Leswi Bibele yi swi vulaka: “Mbilu leyi tsakeke i murhi lowunene.”—Swivuriso 17:22.

Leswi tsalwa leri ri vulaka swona: Mimiri ya hina ya tsaka loko hi endla swilo leswi hi tsakisaka.

Ringeta leswi: Endla swilo leswi u swi rhandzaka. Hi xikombiso, yingisela vuyimbeleri lebyi tsakisaka, hlaya hi swilo leswi khutazaka kumbe u endla mitirho yin’wana ni yin’wana leyi u yi rhandzaka. Nakambe u ta tsaka loko u endlela van’wana swo karhi leswaku u va pfuna hambiloko ku nga ri swilo leswikulu.—Mitirho 20:35.
● Khathalela rihanyo ra wena.

Leswi Bibele yi swi vulaka: “Ku endla vutiolori swa pfuna.”—1 Timotiya 4:8.

Leswi tsalwa leri ri vulaka swona: Loko hi endla vutiolori, hi etlela tiawara leti ringaneke ni ku dya swakudya swa rihanyo swa hi pfuna.

Ringeta leswi: Huma u famba hi ku ganyula hambi wo swi endla swa timinete ta 15 ntsena.
● Tsundzuka leswaku ndlela leyi u titwaka ha yona ni swiyimo swin’wana swa cinca.

Leswi Bibele yi swi vulaka: “A mi swi tivi leswaku vutomi bya n’wina byi ta va njhani mundzuku.”—Yakobo 4:14.

Leswi tsalwa leri ri vulaka swona: Xiphiqo lexi hi karhata hambi ku ri lexi hi vonaka onge a hi nge endli nchumu hi xona, xi nga ha va xa xinkarhana.

Hambiloko u vona onge xiyimo lexi u nga eka xona sweswi xi tike ku tika, xi nga cinca mundzuku. Kutani lava tindlela ta ku langutana na xona. (2 Vakorinto 4:8) Xiyimo lexi ku tshikilelaka swi nga endleka xi cinca hi ku famba ka nkarhi kambe loko wo tisunga sweswo a swi nge cinceki.

Ringeta leswi: Hlaya hi vanhu va le Bibeleni lava a va kolwe hi yo oxa lerova a va navela ni ku fa, kutani u vona ndlela leyi swiyimo swa vona swi nga hetelela swi cinca ha yona swi va kahle hi ndlela leyi a va nga yi ehleketi. Twana swikombiso leswi landzelaka.

Xana ku ni vanhu lava Bibele yi boxaka leswaku a va navela ku fa?

Ina. Bibele yi hi byela hi van’wana lava entiyisweni va nga te, ‘Ndzi lava ku fa.’ Xikwembu a xi va xupulanga hikwalaho ka sweswo kambe xi va pfunile. Na wena xi ta ku pfuna.

Eliya

● A a ri mani? A ri muprofeta loyi a nga ni xivindzi. Kambe na yena mikarhi yin’wana a a hela matimba. Yakobo 5:17 yi ri: “Eliya a a ri munhu la fanaka na hina.”
● Hikwalaho ka yini a a lava ku fa? Ku ve ni nkarhi lowu Eliya a nga titwa a nga pfuni nchumu, a chava naswona a titwa a ri n’wamuyexe. Hikwalaho, u kombele Yehovha a ku: “Yehovha . . . herisa vutomi bya mina.”—1 Tihosi 19:4.
● I yini leswi n’wi pfuneke? Eliya u phofulele Xikwembu ndlela leyi a titwaka ha yona. Xikwembu xi n’wi tiyise njhani? Xikwembu xi n’wi kombe leswaku xa khathala hi yena xi tlhela xi n’wi komba ni matimba ya xona. Xi tiyisekise Eliya leswaku i wa nkoka naswona xi n’wi nyike ni mupfuni lonene.
▸ Hlaya hi Eliya: 1 Tihosi 19:2-18.

Yobo

● A a ri mani? Yobo a a ri wanuna loyi a nga ni ndyangu lowukulu a tlhela a fuwa naswona a a gandzela Xikwembu xa ntiyiso hi ku tshembeka.
● Hikwalaho ka yini a a lava ku fa? Swilo swi sungule ku n’wi fambela ximatsi hi ku copeta ka tihlo. U lahlekeriwe hi swilo hinkwaswo leswi a ri na swona. Vana vakwe hinkwavo va dlayiwe hi mhangu. U sungule ku vabya a nga ha koti nchumu. Loko ka ha ri na sweswo, ematshan’weni ya leswaku a chaveleriwa u lo soriwa a byeriwa leswaku hi yena a ti vangelaka maxangu. Yobo u te: “Ndzi venga vutomi bya mina; a ndza ha swi lavi ku ya emahlweni ndzi hanya.”—Yobo 7:16.
● I yini leswi n’wi pfuneke? Yobo u khongele eka Xikwembu a tlhela a vulavula ni van’wana. (Yobo 10:1-3) U khutaziwe hi munghana wakwe Elihu loyi a ri ni ntwelavusiwana loyi a n’wi pfuneke leswaku a va ni langutelo lerinene hi xiyimo xakwe. Kasi xa nkoka swinene, Yobo u pfumele ku lulamisiwa hi Xikwembu ni ku pfuniwa hi xona.
▸ Hlaya hi Yobo: Yobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Muxe

● A a ri mani? Muxe a a ri murhangeri wa tiko ra Israyele ra khale tlhelo muprofeta wo tshembeka.
● Hikwalaho ka yini a a lava ku fa? Muxe a ri ni ntirho wo tala swinene, a a tshamela ku xopaxopiwa naswona se a karhele. Kutani u rilele Xikwembu a ku: “Ndzi kombela u ndzi dlaya sweswi.”—Tinhlayo 11:11, 15.
● I yini leswi n’wi pfuneke? U byele Xikwembu ndlela leyi a a titwa ha yona. Xikwembu xi vevukisele Muxe ntirho hi ku n’wi lavela vapfuni leswaku a kota ku hefemula.
▸ Hlaya hi Muxe: Tinhlayo 11:4-6, 10-17.

Hi wahi matsalwa lama nga ku pfunaka leswaku u tshika ku ehleketa hi ku tidlaya?

Matsalwa lama kombisaka leswaku Xikwembu xi na mhaka na wena:

“Yehovha u le kusuhi ni lava tshovekeke timbilu; u ponisa lava hetiweke matimba.”—Pisalema 34:18.
“Loko ndzi karhateka swinene, u ndzi chavelerile u tlhela u ndzi endla ndzi tsaka.”—Pisalema 94:19.

(Nakambe hlaya Pisalema 27:10; 103:12-14; 2 Vakorinto 1:3, 4.)

Matsalwa lama kombisaka leswaku Xikwembu xa ku twisisa ku vava loku u ku twaka:

“U vone ku xaniseka ka mina; wa ma tiva maxangu ya mina.”—Pisalema 31:7.
“Nkarhi hinkwawo lowu a va twa ku vava, na yena a a twa ku vava. . . . hikwalaho ka rirhandzu ni ntwelavusiwana wakwe . . . , [u va tlakurile].”—Esaya 63:9.

Matsalwa lama kombisaka leswaku Xikwembu xi lava u tshinela eka xona ni ku khongela u xi byela ta le mbilwini:

“Mi nga vileli ha nchumu, kambe eka hinkwaswo kombelani Xikwembu hi xikhongelo leswaku xi mi pfuna, . . . kutani ku rhula ka Xikwembu loku tlulaka ku twisisa hinkwako ku ta rindza timbilu ta n’wina ni mianakanyo ya n’wina.”—Vafilipiya 4:6, 7.
“Tshinelani eka Xikwembu, kutani xi ta tshinela eka n’wina.”—Yakobo 4:8.

(Nakambe hlaya Pisalema 34:4, 15; 55:22.)

Matsalwa lama kombisaka leswaku Xikwembu xi nga ku nyika matimba:

“Eka hinkwaswo ndzi ni matimba hikwalaho ka loyi a ndzi nyikaka matimba.”—Vafilipiya 4:13.
“U nga chavi, hikuva ndzi na wena. U nga vileli, hikuva ndzi Xikwembu xa wena. Ndzi ta ku tiyisa, ina, ndzi ta ku pfuna.”—Esaya 41:10.

(Nakambe hlaya Pisalema 138:3; Esaya 40:29-31.)

U fanele u endla yini loko munghana wa wena a ku byela a ku, “Ndzi lava ku tidlaya”?

U nga swi tekeli ehansi loko munghana wa wena a ku byela leswaku u lava ku tidlaya. Pfuna munghana wa wena a vula ndlela leyi a titwaka ha yona. (Swivuriso 20:5) Loko vanhu lava tikeriwaka va vula ndlela leyi va titwaka ha yona, swi nga va pfuna leswaku va nga tisungi.
Kombisa leswaku wa khumbeka loko u ri karhi u yingisela. “Hatla ku yingisa, [u] hlwela ku vulavula.” (Yakobo 1:19) Swi twisise leswaku maxangu kumbe xitirese swi nga endla munhu a “vulavulaka leswi humeke endleleni.” (Yobo 6:2, 3) Loko munghana wa wena a vulavula handle ko ehleketa kumbe a lahlela kunene, u nga hatli u tlula kumbe u khunguvanyeka.
N’wi chavelele. Bibele yi hi tsundzuxa yi ku: “Chavelelani lava karhatekeke.” (1 Vatesalonika 5:14) U nga endli munghana wa wena a titwa onge u karhatiwa hi swilo leswi nga nyawuriki. Xixima ndlela leyi a titwaka ha yona ni leswi n’wi endlaka a titwa hi ndlela yoleyo. N’wi byele ndlela leyi a nga wa nkoka ha yona eka wena.
Byela munghana wa wena leswaku a lava mpfuno. Swivuriso 13:10 yi ri “vutlhari i bya lava lavaka xitsundzuxo.” Loko munghana wa wena a ri ni vuvabyi lebyi dlayaka a wu ta n’wi byela leswaku a ya eka dokodela. Loko munhu a ehleketa hi ku tisunga ku nga va xikombiso xa leswaku ku ni leswi n’wi karhataka emiehleketweni, kutani n’wi kombele leswaku a ya lava mfumo eka lava swi dyondzeleke. N’wi byele leswaku u nga swi tsakela ku famba na yena loko a ya lava mpfuno.
N’wi kombe leswaku wa n’wi rhandza. Bibele yi ri: “Munghana wa ntiyiso u kombisa rirhandzu mikarhi hinkwayo, i makwenu wa ntiyiso loko u ri emaxangwini.” (Swivuriso 17:17) A wu nge swi koti ku herisa maxangu ya munghana wa wena kumbe ku endla leswaku a tshika ku ehleketa hi ku tisunga. Kambe u nga swi kota ku n’wi seketela ni ku tlhela u n’wi komba leswaku wa n’wi rhandza, u nga n’wi pfuna leswaku a hundza eka swa namuntlha a langutana ni swa mundzuku, naswona ku tiva mani? Mundzuku a nga ta ni swa kahle.

Ndzi fanele ndzi endla yini loko ndzi tshame ndzi ringeta ku tidlaya?

Swa twisiseka ku va u titwa nandzu kumbe swi ku khomisa tingana. U nga twa onge a ku na loyi a twisisaka lexi endleke u ringeta ku tisunga kumbe a twisisaka mbitsi lowu u nga na wona sweswi.

Bibele ya pfumela leswaku a hi nge swi koti ku yi twisisa hilaha ku heleleke ndlela leyi van’wana va titwaka ha yona. Bibele yi ri: “Mbilu yi tiva leswi yi karhataka.” (Swivuriso 14:10; 1 Tihosi 8:38) Hambileswi vanhu lava hi rhandzaka va nga hi chavelelaka kambe a va nge swi koti hilaha ku heleleke ku fikelela timbilu ta hina. Kambe swi tive leswaku a wu wexe.

Xikwembu xi tiva leswi nga embilwini ya munhu. (2 Tikronika 6:30) Yehovha wa swi tiva leswi nga endla u vona ku tisunga ku ri ndlela yo antswa ya ku tlhantlha xiphiqo. Nakambe wa yi twisisa ndlela leyi u titwaka ha yona sweswi, kumbexana hilaha swi nga boxiwa ha kona, u titwa nandzu ni ku tlhela swi ku khomisa tingana.—Pisalema 139:1.

Hambileswi Xikwembu xi tekaka vutomi byi ri bya nkoka swinene, xi tiyimisele ku rivalela lava nga tshama va ehleketa ku tisunga. (Pisalema 86:5) Xa swi tiva leswaku vo tala lava nga tshama va ringeta ku tidlaya a va nga lavi ku fa kambe a va lava ku wisa maxangu ya vona. Yehovha u ta hi pfuna hambiloko “timbilu ta hina [to hi sola] . . . , hikuva Xikwembu i xikulu eka timbilu ta hina naswona xi tiva swilo hinkwaswo.” (1 Yohane 3:19, 20) Xikwembu xi lava ku va “Tatana la nga ni tintswalo letikulu tlhelo Xikwembu xa nchavelelo hinkwawo” eka wena.—2 Vakorinto 1:3.

a Loko emiehleketweni ya wena ko tlangatlanga mhaka ya ku tisunga ntsena naswona ku nga ri na munhu loyi u nga n’wi byelaka ndlela leyi u titwaka ha yona, fonela lava tirhaka ku pfuna vanhu lava ehleketaka hi ku tisunga endhawini ya ka n’wina.

Ndzi Lava Ku Tidlaya—Xana Bibele Yi Nga Ndzi Pfuna Loko Ndzi Ehleketa Hi Ku Tisunga?

Nhlamulo ya Bibele

Bibele yi nyikela switsundzuxo swihi leswi pfunaka?

● Phofulela van’wana ndlela leyi u titwaka ha yona.

● Lava mpfuno wa madokodela.

● Tsundzuka leswaku Xikwembu xi na mhaka na wena.

● Khongela eka Xikwembu.

● Anakanyisisa hi vumundzuku lebyi hi tshembisiwaka byona eBibeleni.

● Endla leswi ku tsakisaka.

● Khathalela rihanyo ra wena.

● Tsundzuka leswaku ndlela leyi u titwaka ha yona ni swiyimo swin’wana swa cinca.

Xana ku ni vanhu lava Bibele yi boxaka leswaku a va navela ku fa?

Eliya

Yobo

Muxe