1 | Xikhongelo ‘Lahlelani Ku Vilela Ka N’wina Hinkwako Eka Xona’

BIBELE YI RI: ‘Lahlelani ku vilela ka n’wina hinkwako eka [Xikwembu], hikuva xa khathala hi n’wina.’ —1 PETRO 5:7.

Leswi Sweswo Swi Vulaka Swona

Yehovha Xikwembu wa hi rhamba leswaku hi vulavula na yena hi ndzhwalo wun’wana ni wun’wana lowu hi tikelaka emiehleketweni ni le timbilwini ta hina. (Pisalema 55:22) Swi nga ri na mhaka leswaku xiphiqo lexi hi langutaneke na xona i xitsongo kumbe i xikulu hi fanele hi khongela hi xona. Loko xi ri xa nkoka eka hina i xa nkoka ni le ka Yehovha. Ku khongela eka yena i goza ra nkoka leri nga ta hi pfuna leswaku hi va na ku rhula ka miehleketo.—Vafilipiya 4:6, 7.

Ndlela Leyi Leswi Swi Nga Hi Pfunaka Hayona

Loko hi karhata hi ntshikilelo wa miehleketo, hi nga ha titwa hi ri hexe. A hi mikarhi hinkwayo leyi vanhu van’wana va nga ta swi twisisa hi ku helela leswi hi langutanaka na swona. (Swivuriso 14:10) Kambe loko hi phofulela Xikwembu hi xikhongelo ndlela leyi hi titwaka hayona, xi ta hi yingisela hi ndlela leyi kombisaka leswaku xa hi twela naswona xa yi twisisa ndlela leyi hi titwaka hayona. Yehovha wa hi vona, wa ku tiva ku vava loku hi ku twaka ni maxangu ya hina naswona u lava hi khongela eka yena hi nchumu wun’wana ni wun’wana lowu hi karhataka.—2 Tikronika 6:29, 30.

Ku vulavula na Yehovha hi xikhongelo swi tiyisa ndlela leyi hi swi tshembaka hayona leswaku wa khathala hi hina. Hi nga ha titwa hi ndlela leyi mupisalema a titweke hayona loyi a khongeleke a ku: “U vone ku xaniseka ka mina; wa ma tiva maxangu ya mina.” (Pisalema 31:7) Ku tiva leswaku Yehovha wa swi vona leswi hi langutanaka na swona swi nga hi pfuna leswaku hi ya emahlweni hi tiyisela loko hi langutane ni mikarhi yo tika. Kambe u endla swo tala ku tlula ku vona swiphiqo swa hina. Ku tlula mani na mani wa swi twisisa leswi hi langutanaka na swona naswona u hi pfuna hi kuma nchavelelo ni swikhutazo leswi kumekaka eBibeleni.

Ndlela Leyi Bibele Yi Pfunaka Hayona Julian

Ndlela Leyi Ku Vilela Ku Ndzi Khumbaka Hayona

“Ndzi karhatiwa hi ku vilela ni vuvabyi lebyi vuriwaka obsessive-compulsive disorder (OCD). Ku vilela swi ndzi karhata hi nkarhi lowu ndzi nga wu langutelangiki. Mikarhi yin’wana ndzi titwa ndzi pfuke kahle kambe mikarhi yin’wana ndzi titwa ndzi vilela ndzi nga ri na xivangelo. Hakanyingi ndzi vilela ngopfu loko ndzi ri ni vanhu van’wana. Ndzi vilela ngopfu hileswi va swi ehleketaka hi mina.

“Lava va swi tivaka leswi ndzi karhataka va ndzi pfuna. Ndza pfumela leswaku mikarhi yin’wana leswi va swi vulaka a hi leswi a ndzi langutele ku swi twa. Kambe ndza ma tlangela matshalatshala ya vona yo ringeta ku ndzi pfuna.

“Mikarhi yin’wana ku vilela ni vuvabyi bya OCD swi endla ku va ntlhontlho ku khongela. I ntirho lowukulu eka mina ku va miehleketo ya mina yi va eka leswi ndzi swi endlaka ni ku vulavula na Yehovha hi xikhongelo. Miehleketo ya mina yi ehleketa swilo swo tala hi nkarhi wun’we lerova loko ndza ha ehleketa leswi, hi ku tsopeta ka tihlo ndzi tikuma ndzi ehleketa hi swin’wana. Loko ndzi tsandzeka ku lawula miehleketo ya mina, swa ndzi tikela ku phofulela Yehovha leswi ndzi swi ehleketaka kumbe ndlela leyi ndzi titwaka hayona.”

Ndlela Leyi Bibele Yi Ndzi Pfunaka Hayona

“Ndzi dyondze eBibeleni leswaku swikhongelo a swi bohi ku va swi leha leswaku swi ta amukeleka eka Xikwembu. Mikarhi yin’wana loko ndzi nga swi koti kahle ku vula ndlela leyi ndzi titwaka hayona ndzi khongela ntsena ndzi ku: ‘Yehovha ndzi kombela u ndzi pfuna.’ Endzhaku ka sweswo ndza swi vona leswaku Yehovha wa ndzi twisisa naswona u ndzi nyika leswi ndzi swi lavaka hi nkarhi wolowo. Ku engetela eka Xikhongelo ndzi lave mpfuno wa swa vutshunguri. Ndzi rhandza ku khensa eka leswi ndzi pfuneke, xiyimo xa mina sweswi xa antswa swinene. Swi lava matshalatshala lamakulu leswaku ndzi vulavula ni Tata wa mina wa le matilweni leswaku ndzi ta kuma mpfuno wakwe wa rirhandzu.”