[ku suka eximatsini ku ya exineneni] Marcelo, Yomara na Hiver. Hinkwavo va khome Bibele ya braille ya Xipaniya ya Vuhundzuluxeri Bya Misava Leyintshwa
Va Kombisiwe Rirhandzu
YOMARA ni vabuti wakwe ku nga Marcelo na Hiver va tshama ematikoxikaya eGuatemala. Yomara u sungule ku dyondza Bibele ni Timbhoni naswona hi ku famba ka nkarhi vabuti wakwe va n’wi joyinile. Kambe a ku ri ni xiphiqo. Hinkwavo ka vona a va voni naswona a va nga swi koti ku hlaya braille. Hikwalaho, loyi a a va dyondzisa Bibele a a va hlayela buku leyi a va dyondza yona ni Matsalwa ya kona.
A swi va tikela ku ya etinhlengeletanweni ta vandlha. A va nga swi koti ku famba va ri voxe va ya eHolweni ya Mfumo leyi nga ekusuhi leyi swi tekaka timinete ta 40 ku fika kona. Kambe vamakwerhu evandlheni va hlele ku va pfuna leswaku va kota ku va kona etinhlengeletanweni hinkwato ta vandlha. Loko se vamakwavo lava va sungula ku nyikiwa swiavelo swo nyikela mivulavulo, vamakwerhu va va pfune ku hlokohata mivulavulo ya vona.
Hi May 2019, tinhlengeletano ta vandlha ti sungule ku khomeriwa emugangeni wa ka vona. Hi nkarhi wolowo, vatekani lava nga maphayona a va rhurhele emugangeni wolowo. A va tiyimisele ku dyondzisa vamakwavo lava ku tsala ni ku hlaya braille hambileswi vona hi voxe vatekani lava a va nga swi koti ku swi endla sweswo. Vatekani lava va ye elayiburari leswaku va ya dyondza hi braille leswaku va ta kota ku yi dyondzisa van’wana.
Marcelo a ri karhi a hlamula etinhlengeletanweni ta vandlha
A swi tekanga tin’hweti leswaku vamakwavo lava va kota ku yi hlaya kahle braille naswona sweswo swi va pfune leswaku va kurisa vuxaka bya vona na Yehovha.a Sweswi Yomara, Marcelo na Hiver i maphayona ya nkarhi hinkwawo. Marcelo i nandza wa vutirheli. Vhiki na vhiki va tshama va khomeke hi ku tirhela Yehovha. Van’wana va tekelela ku hiseka ka vona.
Vamakwavo lava va swi khensa swinene leswi vandlha ri va kombisaka rirhandzu ni ku va seketela. Yomara u ri: “Ku sukela loko hi hlangane ni Timbhoni ro sungula, ti hi kombise rirhandzu ra ntiyiso.” Kasi Marcelo u ri: “Hi ni vanghana lavanene evandlheni ra ka hina naswona hi xiphemu xa vamakwerhu lava nga kona emisaveni hinkwayo lava rhandzanaka.” Yomara ni vamakwavo va ri langutele emahlweni siku leri va nga ta vona misava yi va paradeyisi.—Ps. 37:10, 11; Esa. 35:5.
a Broxara leyi nge, Learn to Read Braille yi endleriwe ku pfuna munhu loyi a nga voniki kumbe loyi a vonaka katsongo leswaku a dyondza ku hlaya ni ku tsala braille.