Xana Yehovha U Ta Swi Hlamula Swikhongelo Swa Mina?

1-2. Hikwalahokayini hi nga vonaka onge Yehovha a nga swi hlamuli swikhongelo swa hina?

“KUMA ntsako lowukulu eka Yehovha, kutani u ta ku nyika leswi mbilu ya wena yi swi navelaka.” (Ps. 37:4) Lexi i xitshembiso xo tsakisa hakunene! Kambe xana hi fanele hi langutela leswaku kwala ni kwala Yehovha a hi nyika hinkwaswo leswi hi swi kombelaka? Hikwalahokayini xivutiso lexi xi ri xa nkoka? Ehleketa hi swikombiso leswi landzelaka. Makwerhu wa xisati la nga tekiwangiki u khongelela ku rhambiwa eXikolweni xa Vachumayeri va Mfumo. Kambe ku hundza malembe yo hlaya a nga si rhambiwa. Makwerhu laha riki muntshwa u kombela Yehovha leswaku a n’wi horisa eka vuvabyi lebyi n’wi khomeke leswaku a ta kota ku endla swo tala evandlheni. Kambe a nga holi. Vatswari lava nga Vakreste va khongelela leswaku n’wana wa vona a nga hambuki entiyisweni. Kambe n’wana wa vona u teka xiboho xo tshika ku tirhela Yehovha.

² Kumbexana na wena u kombele Yehovha leswaku a ku endlela swo karhi, kambe a nga se ku nyika leswi u swi kombeleke. Hikwalaho ka sweswo, u nga ha tibyela leswaku Yehovha u hlamula swikhongelo swa van’wana ku nga ri swa wena. Kumbexana u nga ha tibyela leswaku ku ni swo biha leswi u swi endleke. Makwerhu wa xisati Janiceb u tshame a titwa tano. Yena ni nuna wakwe va khongele eka Yehovha va n’wi byela leswaku va navela ku ya tirha eBethele. U ri: “A ndzi ehleketa leswaku a swi nga ta teka nkarhi leswaku hi vitaniwa eBethele.” Kambe ku hele tin’hweti ni malembe va nga si vitaniwa. Janice u ri: “Swi ndzi twise ku vava ni ku tlhela ndzi pfilunganyeka. A ndzi tivutisa leswaku ndzi endle yini xo khomisa Yehovha tingana. Ndzi khongele eka yena hi ku kongoma hi mhaka leyi. Hikwalahokayini a nga xi hlamuli xikhongelo xa mina?”

3. Hi ta bula hi yini eka nhlokomhaka leyi?

³ Mikarhi yin’wana hi nga ha tivutisa loko Yehovha a swi yingisela swikhongelo swa hina. Hambi ku ri vavanuna vo tshembeka lava hanyeke khale na vona va titwe tano. (Yobo 30:20; Ps. 22:2; Hab. 1:2) I yini lexi nga ku tiyisekisaka leswaku Yehovha u ta swi hlamula swikhongelo swa wena? (Ps. 65:2) Leswaku hi kota ku hlamula xivutiso xexo, a hi sunguli hi hlamula swivutiso leswi landzelaka: (1) Hi nga langutela yini eka Yehovha? (2) I yini leswi Yehovha a swi languteleke eka hina? (3) Hikwalahokayini swi nga lavaka hi cinca leswi hi swi khongelelaka?

HI NGA LANGUTELA YINI EKA YEHOVHA?

4. Hi ku ya hi Yeremiya 29:​12, Yehovha u hi tshembisa yini?

⁴ Yehovha u tshembisa ku yingisela swikhongelo swa hina. (Hlaya Yeremiya 29:12.) Xikwembu xa hina xi rhandza vagandzeri va xona vo tshembeka, kutani a xi nge pfuki xi honise swikhongelo swa vona. (Ps. 10:17; 37:28) Hambiswiritano, sweswo a swi vuli swona leswaku xi ta hi nyika swilo hinkwaswo leswi hi swi kombelaka. Swi nga ha lava leswaku hi rindzela misava leyintshwa leswaku hi ta kota ku kuma swin’wana swa swilo leswi hi swi kombelaka.

5. I yini leswi Yehovha a swi tekelaka enhlokweni loko a yingisela swikhongelo swa hina? Hlamusela.

⁵ Yehovha u tlhela a languta loko swikombelo swa hina swi fambisana ni xikongomelo xakwe. (Esa. 55:​8, 9) Xin’wana xa swilo leswi Yehovha a swi lavaka hi leswaku misava yi tala hi vanhu lava n’wi yingisaka hi ku swi rhandza tanihi Mufumi wa vona. Kambe Sathana u vula leswaku vanhu va nga tsaka ntsena loko va tifuma. (Gen. 3:​1-5) Yehovha u tshike vanhu va tifuma leswaku swi ta va erivaleni leswaku leswi Diyavulosi a swi vulaka i mavunwa. Kambe ku va vanhu va tifuma swi vange swiphiqo swo tala leswi hi langutanaka na swona namuntlha. (Ekl. 8:9) Ha swi twisisa leswaku enkarhini wa sweswi Yehovha a nge swi susi hinkwaswo swiphiqo leswi. Loko o swi susa, van’wana va nga ha hetelela va ehleketa leswaku vanhu va swi kota ku tifuma ni ku titlhantlhela swiphiqo swa vona.

6. Hikwalahokayini hi fanele hi tiyiseka leswaku Yehovha u ta endla swilo hi ndlela ya rirhandzu ni leyinene?

⁶ Yehovha a nga hlamula swikhongelo leswi fanaka hi tindlela to hambana. Hi xikombiso, loko Hosi Hezekiya a vabyela ku fa, u kombele Yehovha leswaku a n’wi horisa. Yehovha u xi hlamurile xikhongelo xexo hi ku va a n’wi horisa. (2 Tih. 20:​1-6) Kambe Yehovha a nga xi susanga xiphiqo lexi muapostola Pawulo a a kombela leswaku a xi susa lexi kumbexana a xi fana ni ‘mutwa lowu a ri na wona enyameni’ yakwe. (2 Kor. 12:​7-9) Nakambe ehleketa hi xikombiso xa muapostola Yakobo na Petro. Hosi Heroda a a lava ku va dlaya havumbirhi bya vona. Vandlha ri khongelele Petro naswona swi nga endleka ri khongelele na Yakobo. Hambiswiritano, Yakobo u dlayiwile loko hi hala tlhelo Petro a ponisiwe hi singita. (Mit. 12:​1-11) Hi nga ha tivutisa leswi, ‘Hikwalahokayini Yehovha a ponise Petro kambe a tshika Yakobo a dlayiwa?’ Bibele a yi hlamuseli.c Lexi hi tiyisekaka ha xona hileswaku mikarhi hinkwayo tindlela ta Yehovha a ti nge pfuki ti “hombolok[ile].” (Det. 32:4) Nakambe ha swi tiva leswaku Yehovha a a n’wi rhandza Petro na Yakobo. (Nhlav. 21:14) Mikarhi yin’wana hi nga kuma nhlamulo leyi hi nga yi langutelangiki. Kambe a hi yi soli ndlela leyi Yehovha a hlawulaka ku hlamula swikhongelo swa hina hayona hikuva ha tshemba leswaku mikarhi hinkwayo u ta hi kombisa rirhandzu ni ku swi hlamula hi ndlela leyinene.—Yobo 33:13.

7. I yini leswi hi faneleke hi swi papalata naswona hikwalahokayini?

⁷ Hi papalata ku ringanisa swiyimo swa hina ni swa van’wana. Hi xikombiso, hi nga kombela Yehovha leswaku a hi pfuna hi ndlela yo karhi kambe xikhongelo xa hina xi nga hlamuriwi. Hi ku famba ka nkarhi, hi twa leswaku un’wana u khongelele leswi fanaka naswona swi vonaka onge Yehovha u xi hlamurile xikhongelo xakwe. Sweswo swi endlekile eka makwerhu wa xisati Anna. U khongelele leswaku nuna wakwe Matthew a hola eka vuvabyi lebyi a a ri na byona bya khensa. Hi nkarhi lowu fanaka, a ku ri ni vamakwerhu va xisati vambirhi lava dyuhaleke lava na vona a va ri ni vuvabyi bya khensa. Anna u khongele hi mbilu hinkwayo a khongelela Matthew ni vamakwerhu volavo vambirhi. Vamakwerhu volavo va horile kambe Matthew u lovile. Eku sunguleni, Anna a a tivutisa loko vamakwerhu volavo va hlakarhele hileswi Yehovha a ngheneleleke. Loko ku ve swi tano, hikwalahokayini a nga xi hlamulanga xikhongelo xakwe xa leswaku nuna wakwe a hlakarhela. I ntiyiso leswaku a hi xi tivi xivangelo lexi endleke vamakwerhu va xisati va hlakarhela. Lexi hi xi tivaka hileswaku Yehovha u ta herisa ku xaniseka hinkwako naswona u swi lava hi mbilu hinkwayo ku pfuxa vanghana vakwe lava feke.—Yobo 14:15.

8. (a) Hi ku ya hi Esaya 43:​2, Yehovha u hi seketela njhani? (b) Xikhongelo xi nga hi pfuna njhani loko hi ri eswiyin’weni swo tika? (Vona vhidiyo leyi nge, Xikhongelo Xi Hi Pfuna Ku Tiyisela Swiphiqo.)

⁸ Mikarhi hinkwayo Yehovha u ta hi seketela. Leswi a nga Tata wa hina la hi rhandzaka, Yehovha a nga swi lavi ku hi vona hi xaniseka. (Esa. 63:9) Nilokoswiritano, a nga hi sirheleli emiringweni ya hina hinkwayo leyi nga fanisiwaka ni milambu ni malangavi. (Hlaya Esaya 43:2.) Hambiswiritano, u tshembisa ku hi pfuna hi “hundza exikarhi” ka miringo yoleyo. Nakambe a nge yi pfumeleli miringo yi hi vavisa hilaha ku nga heriki. Yehovha u tlhela a hi nyika moya wakwe lowo kwetsima lowu nga ni matimba leswaku wu hi pfuna hi kota ku tiyisela. (Luka 11:13; Filp. 4:13) Hikwalaho ka sweswo, hi nga tiyiseka leswaku mikarhi hinkwayo u ta hi nyika leswi hi swi lavaka leswaku hi kota ku tiyisela ni ku tshama hi tshembekile eka yena.d

I YINI LESWI YEHOVHA A SWI LANGUTELEKE EKA HINA?

9. Hi ku ya hi Yakobo 1:​6, 7, hikwalahokayini hi fanele hi tshemba leswaku Yehovha u ta hi pfuna?

⁹ Yehovha u langutele leswaku hi n’wi tshemba. (Hev. 11:6) Mikarhi yin’wana, miringo ya hina yi nga vonaka yi fana ni ntshava. Hi nga ha tlhela hi kanakana loko Yehovha a ta hi pfuna. Kambe Bibele yi hi tiyisekisa leswaku hi ku pfuniwa hi matimba ya Xikwembu hi nga “khandziya khumbi.” (Ps. 18:29) Kutani ematshan’weni yo va hi kanakana, hi fanele hi khongela hi ri ni ripfumelo, hi tshemba leswaku Yehovha u ta swi hlamula swikhongelo swa hina.—Hlaya Yakobo 1:​6, 7.

10. Nyika xikombiso xa ndlela leyi hi nga endlaka swilo hi ku pfumelelana ni swikhongelo swa hina.

¹⁰ Yehovha u langutele leswaku hi endla swilo leswi fambisanaka ni swikhongelo swa hina. Hi xikombiso, makwerhu a nga khongela eka Yehovha a kombela leswaku a n’wi pfuna a kuma masiku entirhweni leswaku a kota ku ya enhlengeletanweni ya xifundzha. Yehovha a nga xi hlamula njhani xikhongelo xexo? A nga ha nyika makwerhu xivindzi leswaku a ya vulavula ni muthori wakwe. Kambe swi ta lava leswaku makwerhu a famba a ya kombela muthori wakwe. Swi nga ha lava a kombela hi ku phindhaphindha. Kumbexana swi nga lava a cincana ni mutirhi un’wana masiku ya ku tirha. Nakambe loko swi boha, swi nga lava leswaku a tiyimisela ku teka masiku yo wisa handle ko va a hakeriwa.

11. Hikwalahokayini hi fanele hi khongela hi ku phindhaphindha mayelana ni leswi hi karhataka?

¹¹ Yehovha u langutele leswaku hi khongela hi ku phindhaphindha mayelana ni leswi hi karhataka. (1 Tes. 5:17) Yesu u vule leswaku swin’wana swa leswi hi swi kombelaka a hi nge nyikiwi swona hi ku hatlisa. (Luka 11:9) Hikwalaho, yana emahlweni u khongela! Khongela hi mbilu hinkwayo naswona hi ku phindhaphindha. (Luka 18:​1-7) Loko hi nga tshiki ku khongela, hi kombisa Yehovha leswaku hi swi lava hi mbilu hinkwayo leswi hi n’wi kombelaka swona. Nakambe hi kombisa leswaku ha tshemba ku u ta hi pfuna.

HIKWALAHOKAYINI SWI NGA LAVAKA HI CINCA LESWI HI SWI KHONGELELAKA?

12. (a) Hi xihi xivutiso lexi hi faneleke hi tivutisa xona mayelana ni swikhongelo swa hina naswona hikwalahokayini? (b) Hi nga endla yini leswaku swikhongelo swa hina swi kombisa leswaku ha n’wi xixima Yehovha? (Vona bokisi leri nge, “Xana Swikhongelo Swa Mina Swi Kombisa Leswaku Ndzi Xixima Yehovha?”)

¹² Loko hi nga swi kumi leswi hi swi khongeleleke, hi nga ha tivutisa swivutiso swinharhu. Xo sungula hi lexi nge, ‘Xana ndzi khongelela nchumu lowunene?’ Mikarhi yo tala hi ehleketa onge ha swi tiva leswi hi faneleke. Kambe swilo leswi hi swi kombelaka swi nga endleka hi ku famba ka nkarhi ku nga ri swilo leswi nga ta hi vuyerisa. Loko hi khongela hi xiphiqo xo karhi, swi nga endleka ku ri ni xitshunxo xo antswa ku tlula lexi hi xi khongelelaka. Nakambe swin’wana swa swilo leswi hi swi khongelelaka swi nga endleka swi nga fambisani ni ku rhandza ka Yehovha. (1 Yoh. 5:14) Hi xikombiso, xiya xikombiso xa vatswari lava hi vulavuleke ha vona eku sunguleni. Va khongele eka Yehovha va kombela leswaku a endla n’wana wa vona a nga hambuki entiyisweni. Xikhongelo xexo xi nga vonaka xi ri xinene. Hambiswiritano, Yehovha a nga hi sindzisi leswaku hi n’wi gandzela. U lava leswaku hinkwerhu ka hina ku katsa ni vana va hina, hi hlawula ku n’wi gandzela. (Det. 10:​12, 13; 30:​19, 20) Kutani vatswari volavo va nga kombela Yehovha a va pfuna va fikelela mbilu ya n’wana wa vona leswaku a hlawula ku rhandza Yehovha ni ku va munghana Wakwe.—Swiv. 22:6; Efe. 6:4.

13. Hi ku ya hi Vaheveru 4:​16, Yehovha u ta hi pfuna rini? Hlamusela.

¹³ Xivutiso xa vumbirhi xi ri, ‘Xana i nkarhi wa Yehovha wa leswaku a hlamula xikhongelo xa mina?’ Hi nga ha lava leswaku swikhongelo swa hina swi hatla swi hlamuriwa. Kambe entiyisweni, Yehovha u tiva nkarhi lowunene wo hi pfuna. (Hlaya Vaheveru 4:16.) Loko hi nga hatli hi kuma leswi hi swi kombeleke, hi nga vona onge nhlamulo ya Yehovha i ‘E-e.’ Kambe entiyisweni nhlamulo yakwe ku nga va, ‘Rindzanyana.’ Hi xikombiso, tlhela u ehleketa hi makwerhu luya a ha riki muntshwa loyi a khongeleleke leswaku a hola eka vuvabyi byakwe. Loko Yehovha o n’wi horisa hi singita, Sathana a a ta vula leswaku makwerhu u ya emahlweni a tirhela Yehovha ntsena hileswi a horisiweke. (Yobo 1:​9-11; 2:4) Ku engetela kwalaho, Yehovha u veke nkarhi lowu a nga ta horisa mavabyi hinkwawo. (Esa. 33:24; Nhlav. 21:​3, 4) Loko nkarhi wolowo wu nga si fika, a hi nge languteli leswaku hi horisiwa hi singita. Kutani makwerhu a nga kombela Yehovha leswaku a n’wi nyika matimba ni ku rhula ka miehleketo leswaku a tiyisela vuvabyi byakwe ni ku ya emahlweni a n’wi gandzela hi ku tshembeka.—Ps. 29:11.

14. U dyondza yini eka ntokoto wa Janice?

¹⁴ Ehleketa hi Janice loyi a khongeleleke leswaku a ya tirha eBethele. Ku hundze malembe ya ntlhanu a nga si yi twisisa ndlela leyi Yehovha a xi hlamuleke hayona xikhongelo xakwe. U ri: “Yehovha u tirhise nkarhi wolowo leswaku a ndzi dyondzisa ni ku ndzi pfuna leswaku ndzi va Mukreste lonene. A ndzi fanele ndzi ya ndzi n’wi tshemba. Ndzi antswisa ndlela leyi ndzi dyondzaka Bibele hayona. Nakambe a ndzi fanele ndzi dyondza ku va munhu la tsakeke swi nga ri na mhaka leswaku ndzi tirhela Yehovha ndzi ri kwihi.” Hi ku famba ka nkarhi Janice ni nuna wakwe va rhambiwile leswaku va va eka ntirho wo endzela mavandlha. Loko Janice a ehleketa hi swona, u ri: “Yehovha u swi hlamurile swikhongelo swa mina kambe hi ndlela leyi a ndzi nga yi langutelanga. Swi ndzi tekele nkarhi ku vona leswaku nhlamulo ya Yehovha a ku ri nyiko yo xonga kambe ndza swi tlangela leswi a ndzi kombeke rirhandzu ni musa.”

15. Hikwalahokayini swi nga ha lavaka hi angarhela loko hi khongela? (Nakambe vona swifaniso.)

¹⁵ Xivutiso xa vunharhu xi ri, ‘Xana ndzi fanele ndzi cinca leswi ndzi swi khongelelaka?’ Hambileswi swi nga swinene ku boxa hi ku kongoma leswi hi swi khongelelaka kambe hi nga kota ku tiva leswi Yehovha a lavaka hi swi endla loko hi angarhela eswikhongelweni swa hina. Ehleketa hi xikombiso xa makwerhu wa xisati la nga tekiwangiki loyi a a khongelela ku rhambiwa ku ya eXikolweni xa Vachumayeri va Mfumo. U lava ku ya exikolweni xexo leswaku a ya tirha laha ku nga ni xilaveko lexikulu xa vahuweleri. Loko a ya emahlweni a khongelela ku rhambiwa exikolweni, a nga tlhela a kombela Yehovha leswaku a n’wi pfuna a tiva swin’wana leswi a nga swi endlaka leswaku a endla leswi engetelekeke entirhweni wo chumayela. (Mit. 16:​9, 10) Endzhaku ka sweswo, a nga endla swilo leswi fambisanaka ni xikhongelo xakwe hi ku vutisa mulanguteri wa muganga loko ku ri ni vandlha ra le kusuhi leri nga ni xilaveko xa maphayona. Kumbe a nga tsalela rhavi a vutisa hi tindhawu leti nga ni xilaveko lexikulu xa vahuweleri va Mfumo.e

16. Hi nga tiyiseka hi yini?

¹⁶ Hilaha hi dyondzeke hakona, hi nga tiyiseka leswaku Yehovha u ta hlamula swikhongelo swa hina hi ndlela ya rirhandzu ni leyinene. (Ps. 4:3; Esa. 30:18) Mikarhi yin’wana a hi nge yi kumi nhlamulo leyi hi yi languteleke. Kambe Yehovha a nge pfuki a swi be hi makatla swikhongelo swa hina. Wa hi rhandza swinene. Nakambe a nge pfuki a hi tshikile. (Ps. 9:10) Hikwalaho, ‘tshama u ri karhi u tshemba’ Yehovha naswona u n’wi chululela ta le mbilwini hi xikhongelo.—Ps. 62:8.