Xana U Na Rona Ripfumelo?

Leswaku hi tsakisa Yehovha, hi fanele hi va ni ripfumelo. Kambe Bibele yi vula leswaku “a hi vanhu hinkwavo lava nga ni ripfumelo.” (2 Tes. 3:2) Loko muapostola Pawulo a vulavula hi “lava twisaka van’wana ku vava ni lava hombolokeke,” a a kombetela eka vaxanisi vakwe lava a a lava ku ponisiwa eka vona. Kambe leswi a swi vuleke hi ripfumelo swi ni nhlamuselo leyi anameke. Vanhu van’wana a va byi tshembi vumbhoni bya leswaku ku ni Xikwembu lexi nga Mutumbuluxi. (Rhom. 1:20) Van’wana va nga ha vula leswaku va ni ripfumelo eka nchumu kumbe munhu wo karhi la nga ni matimba. Kambe sweswo a swi enelanga loko hi lava ku tsakisa Yehovha.

Hi fanele hi tiyiseka leswaku Yehovha u kona ni leswaku hi yena a “hakelaka” lava nga ni ripfumelo leri tiyeke eka yena. (Hev. 11:6) Leswaku hi va ni ripfumelo leri tiyeke, hi fanele hi pfuniwa hi moya wa Xikwembu wo kwetsima. Hi fanele hi kombela Yehovha a hi nyika moya wo kwetsima. (Luka 11:​9, 10, 13) Ndlela ya nkoka yo kuma moya wo kwetsima i ku hlaya Bibele ku nga Rito ra Xikwembu. Hi nga anakanyisisa hi tlhela hi ringeta ku tirhisa leswi hi swi dyondzeke. Loko hi endla tano, hi pfumelela moya wa Yehovha wu hi pfuna hi hanya hi ndlela leyi kombisaka leswaku hi ni ripfumelo eka yena.