Ndlela Leyi Nyimpi Ni Madzolonga Ya Swa Tipolitiki Swi Nga Ta Herisiwa Hayona

XIKWEMBU XI TA HERISA MIFUMO YA VANHU

Xikwembu xi ta tirhisa nyimpi leyi Bibele yi yi vulaka Armagedoni leswaku xi herisa mifumo ya vanhu.a (Nhlavutelo 16:16) Hi nkarhi wolowo, “tihosi ta misava hinkwayo” ti ta hlengeletana “leswaku ti ta lwa nyimpi ya siku lerikulu ra Xikwembu xa Matimba Hinkwawo.” (Nhlavutelo 16:14) Armagedoni i nyimpi ya Xikwembu leyi nga ta herisa tinyimpi hinkwato.

Xikwembu xi ta siva mifumo ya vanhu hi Mfumo wa xona lowu nga ta fuma wu ri etilweni naswona a wu nge herisiwi. (Daniyele 2:44) Xikwembu xi hlawule N’wana wa xona ku nga Yesu Kreste leswaku a va Hosi ya wona. (Esaya 9:​6, 7; Matewu 28:18) Mfumob lowu hi wona lowu Yesu a dyondziseke valandzeri vakwe leswaku va wu khongelela. (Matewu 6:​9, 10) Vanhu hinkwavo va ta va ni vun’we ehansi ka Mfumo lowu Hosi ya wona ku nga ta va Yesu.

Ku hambana ni vafumi lava nga vanhu, Yesu a nge tirhisi vulawuri byakwe leswaku a tivuyerisa. Leswi a nga riki na xihlawuhlawu, a ku na munhu loyi a nga ta titwa a nga khomiwi kahle hikwalaho ka muhlovo wakwe, rixaka leri a humaka eka rona kumbe ndhavuko wakwe. (Esaya 11:​3, 4) Nakambe vanhu a va nge he boheki ku lwela timfanelo ta vona. Hikwalahokayini? Hikuva Yesu u ta va ni mhaka ni vuhlayiseki bya un’wana ni un’wana. “[U] ta pfuna swisiwana leswi kombelaka mpfuno, ni lava pfumalaka ni un’wana ni un’wana la nga riki na mupfuni. . . . [U] ta swi ponisa eku tshikileriweni ni le madzolongeni.”—Pisalema 72:​12-14.

Mfumo wa Xikwembu wu ta herisa matlhari hinkwawo laha misaveni. (Mikiya 4:3) Wu ta tlhela wu herisa vanhu hinkwavo vo homboloka lava rhandzaka tinyimpi ni lava endlaka leswaku ku nga vi ni ku rhula emisaveni. (Pisalema 37:​9, 10) Vanhu hinkwavo lava katsaka vavanuna, vavasati ni vana va ta titwa va sirhelelekile hinkwako laha va nga ta va va ri kona laha misaveni.—Ezekiyele 34:28.

Vanhu va ta va ni vutomi lebyi tsakisaka loko ku fuma Mfumo wa Xikwembu. Wu ta herisa swiphiqo leswi endlaka vanhu va lwa, swo tanihi vusweti, ndlala ni ku kayivela ndhawu yo tshama. Vanhu hinkwavo va ta va ni swakudya swo tala leswi nga ni rihanyo naswona va ta tiphina hi ku tshama endhawini ya kahle.—Pisalema 72:16; Esaya 65:​21-23.

Mfumo wa Xikwembu wu ta herisa swilo hinkwaswo swo vava leswi vangiweke hi nyimpi. Leswi a swi katsi ku vaviseka emirini ntsena kambe swikatsa ni swiphiqo swa miehleketo ni gome leri vangiweke hi nyimpi. Hambi ku ri lava feke, va ta pfuxiwa leswaku va tlhela va hanya laha misaveni. (Esaya 25:8; 26:19; 35:​5, 6) Mindyangu yi ta tlhela yi va swin’we naswona a yi nge he swi tsundzuki swilo swo biha leswi vangiweke hi nyimpi hikuva “swilo swo sungula [swi ta va] swi hundzile.”—Nhlavutelo 21:4.

XIKWEMBU XI TA HERISA XIDYOHO

Loko Mfumo wa Xikwembu wu fuma, vanhu hinkwavo va ta gandzela Xikwembu xi ri xin’we xa ntiyiso, ku nga Yehovhac “Xikwembu xa rirhandzu ni ku rhula.” (2 Vakorinto 13:11) Vanhu va ta dyondza ku tshama swin’we hi ku rhula. (Esaya 2:​3, 4; 11:9) Hinkwavo lava tirhisaka leswi va swi dyondzaka, a va nge he vi na xidyoho.—Varhoma 8:​20, 21.

XIKWEMBU XI TA HERISA SATHANA NI MADIMONA YAKWE

Mfumo wa Xikwembu wu ta herisa vavangi va nyimpi, ku nga Sathana ni madimona yakwe. (Nhlavutelo 20:​1-3, 10) Loko nkucetelo wa vona wo biha wu herisiwa, “ku ta va ni ku rhula.”—Pisalema 72:7.

U nga tiyiseka leswaku xitshembiso xa Xikwembu xo herisa nyimpi ni madzolonga ya swa tipolitiki, xi ta hetiseka. Xa swi navela ku herisa nyimpi naswona xi ni vuswikoti byo endla tano.

• Xikwembu xi ni vutlhari ni matimba yo herisa nyimpi ni madzolonga. (Yobo 9:4) A ku na leswi xi tsandzekaka ku swi endla.—Yobo 42:2.

• Xikwembu xi twa ku vava loko vanhu va xaniseka. (Esaya 63:9) Nakambe xi “venga un’wana ni un’wana la rhandzaka madzolonga.”—Pisalema 11:5.

• Xikwembu xa swi hetisisa leswi xi swi vulaka naswona a xi hembi.—Esaya 55:​10, 11; Tito 1:2.