Leswi Ku Rivalela Ka Yehovha Ku Vulaka Swona Eka Wena

1. Hikwalahokayini swi nga olovi ku tiva leswi munhu a swi vulaka loko a ku wa ku rivalela?

“NDZA ku rivalela.” Swa tsakisa swinene ku twa marito wolawo, ngopfungopfu loko u endle kumbe ku vula nchumu lowu twiseke munhu un’wana ku vava. Kambe xana kahlekahle marito lama nge, “ndza ku rivalela” ma vula yini? Xana munhu loyi u n’wi twiseke ku vava u vula leswaku mi nga tlhela mi va vanghana? Kumbe xana u vula leswaku a nga ha lavi mi tlhela mi vulavula hi mhaka yoleyo? Vanhu va rivalela hi tindlela to hambanahambana leti swi nga oloviki ku ti twisisa.

2. Ndlela leyi Yehovha a rivalelaka hayona yi hlamuseriwe njhani eMatsalweni? (Nakambe vona nhlamuselo ya le hansi.)

² Ndlela leyi Yehovha a hi rivalelaka hayona yi hambane swinene ni ndlela leyi hi rivalelanaka hayona. A nga kona loyi a rivalelaka ku fana na Yehovha. Mupisalema u vule leswi hi Yehovha, “Wena wa rivalela hakunene, leswaku u ta xiximiwa.”a (Ps. 130:4) Loko Yehovha a rivalela u va a “rivalela hakunene.” U hi vekele xikombiso lexinene xa leswi ku rivalela swi nga swona. Eka swiyimo swin’wana, vatsari va Bibele va tirhise rito ra Xiheveru ku hlamusela ndlela leyi Yehovha a rivalelaka hayona, leri va nga ri tirhisiki loko va hlamusela ndlela leyi vanhu va rivalelaka hayona.

3. Ndlela leyi Yehovha a rivalelaka hayona yi hambane njhani ni leyi hina hi rivalelaka hayona? (Esaya 55:​6, 7)

³ Loko Yehovha a rivalela munhu, xidyoho xa yena u xi sula hi ku helela. Munhu yoloye a nga ha tlhela a va ni vuxaka na Yehovha. Ha swi tlangela leswi a hi rivalelaka hilaha ku heleleke hi ku phindhaphindha.—Hlaya Esaya 55:​6, 7. 

4. Yehovha u hi pfuna njhani hi twisisa leswi ku rivalela ku nga swona?

⁴ Leswi Yehovha a rivalelaka hi ndlela leyi nga faniki ni ya hina, xana hina vanhu lava endlaka swihoxo hi nga swi twisisa njhani leswi ku rivalela ku vulaka swona hakunene? Yehovha u hi pfuna hi twisisa ndlela leyi a rivalelaka hayona hi ku tirhisa swifaniso. Eka nhlokomhaka leyi, hi ta kambisisa swin’wana swa swona. Swi ta hi komba ndlela leyi Yehovha a sulaka xidyoho hayona ni ku tlhela a lunghisa vuxaka lebyi onhiweke hi xona. Loko hi ri karhi hi kambisisa swifaniso leswi, hi ta ya hi tlangela tindlela to hambanahambana leti Tata wa hina loyi a nga ni rirhandzu a hi rivalelaka ha tona.

YEHOVHA U SUSA XIDYOHO

5. Ku endleka yini loko Yehovha a hi rivalela swidyoho?

⁵ EBibeleni, mikarhi yo tala swidyoho swi fanisiwa ni mindzhwalo yo tika. Hosi Davhida u hlamusele swidyoho swakwe hi ndlela leyi: “Milandzu ya mina yi tele ngopfu; yi ndzi tika ku fana ni ndzhwalo wo tika lowu ndzi tsandzekaka ku wu rhwala.” (Ps. 38:4) Kambe Yehovha wa va rivalela vadyohi lava hundzukaka. (Ps. 25:18; 32:5) Rito ra Xiheveru leri hundzuluxeriweke ri va “rivalela” ri vula ku “tlakula” kumbe “ku rhwala.” Hi nga ha ehleketa hi Yehovha tanihi wanuna wa matimba loyi hi ndlela yo fanekisela a tlakulaka ndzhwalo wa xidyoho a wu susa emakatleni ya hina kutani a wu yisa ekule swinene.

6. Yehovha u tlakula swidyoho swa hina a swi yisa ekule na hina ku fikela kwihi?

⁶ Xifaniso xin’wana xi hi komba ndlela leyi Yehovha a swi cukumetelaka ekule hayona swidyoho swa hina. Pisalema 103:12 yi ri: “Tanihi leswi vuxa byi nga ekule ni vupeladyambu, ni swidyoho swa hina u swi veke ekule na hina.” Vuxa byi le kule swinene ni vupeladyambu. A swi nge pfuki swi hlanganile. Leswi swi vula leswaku Yehovha u teka swidyoho swa hina a swi lahlela ekule swinene na hina. Leswi swa hi tiyisekisa leswaku Yehovha u hi rivalela hi ku helela!

7. Bibele yi swi hlamusela njhani leswi Yehovha a swi endlaka hi swidyoho swa hina? (Mikiya 7:​18, 19)

⁷ Hambileswi Yehovha hi ndlela yo fanekisela a tekaka swidyoho swa hina a swi yisa ekule swinene, xana u tlhela a tshama na swona? Doo! Hosi Hezekiya u tsale leswi hi Yehovha: “U lahlele swidyoho swa mina ekule.” (Esa. 38:​9, 17) Xifaniso lexi xi kombisa leswaku Yehovha u teka swidyoho swa lava hundzukeke a swi lahlela ekule, a nga ha tlheli a swi languta. Leswi swi nga ha tlhela swi vuriwa hi ndlela leyi: “U endle onge a ndzi si tshama ndzi dyoha.” Bibele yi ya emahlweni yi kandziyisa mhaka leyi hi ku tirhisa xifaniso lexi nga eka Mikiya 7:​18, 19. (Yi Hlaye.) Laha Yehovha u hlamuseriwa onge hiloko a lahlela swidyoho swa hina evuentweni bya lwandle. Emikarhini ya khale, a swi nga koteki leswaku munhu a kuma nchumu lowu lahleriweke exidziveni xa lwandle.

8. I yini leswi se hi swi dyondzeke?

⁸ Swifaniso leswi swi hi dyondzise leswaku loko Yehovha a hi rivalela, u hi rhula ndzhwalo. Hilaha Davhida a vuleke hakona loko a ku, “va tsaka lava rivaleriweke swihoxo swa vona ni lava swidyoho swa vona swi funengetiweke; wa tsaka munhu loyi Yehovha a nga ta ka a nga xi tsundzuki xidyoho xakwe.” (Rhom. 4:​7, 8) Hakunene koloko i ku rivalela ka ntiyiso!

YEHOVHA U HLANTSWA XIDYOHO

9. I swifaniso swihi leswi Yehovha a swi tirhisaka ku hlamusela ndlela leyi a rivalelaka hayona hilaha ku heleleke?

⁹ Yehovha u tirhisa swifaniso swin’wana ku hi pfuna hi tlangela ndlela leyi a tirhisaka gandzelo ra nkutsulo ku hlantswa swidyoho swa lava hundzukaka. Hi ndlela yo fanekisela, Yehovha u vuriwa loyi a hlantswaka ni ku basisa swidyoho swoleswo, leswi endlaka mudyohi a basisiwa. (Ps. 51:7; Esa. 4:4; Yer. 33:8) Yehovha hi yexe u hlamusela mbuyelo wa kona a ku: “Hambiloko swidyoho swa n’wina swo va swo tshwuka, swi ta basisiwa swi fana ni gamboko; hambiloko swi tshwuke ku fana ni lapi ro tshwuka, swi ta fana ni voya byo basa.” (Esa. 1:18) Swa tika swinene ku susa xipatso xo tshwuka eka lapi. Kambe hi ku tirhisa xifaniso lexi, Yehovha u hi tiyisekisa leswaku swidyoho swa hina swi nga hlantswiwa swi basa lerova swi nga ha vonaki.

10. Xana Bibele yi yi hlamusela njhani ndlela leyikulu leyi Yehovha a rivalelaka hayona?

¹⁰ Hilaha swi boxiweke hakona eka nhlokomhaka leyi hundzeke, swidyoho swi fanisiwa ni ‘swikweleti.’ (Mat. 18:​32-35) Kutani mikarhi hinkwayo loko hi dyohela Yehovha swi fana ni loko hi tatisa xikweleti. Hi n’wi kolota ngopfu. Kambe loko Yehovha a hi rivalela swidyoho, swi fana ni loko a sula xikweleti lexi a hi n’wi kolota xona. A nga langutelanga leswaku hi hakela swidyoho leswi se a hi rivaleleke swona. Ku fana ni leswi munhu a tsakaka loko swikweleti swakwe swi suriwa na hina ha tsaka loko Yehovha a hi rivalela swidyoho!

11. Swi vula yini loko Bibele yi vula leswaku swidyoho swa hina swa “suriwa”? (Mitirho 3:19)

¹¹ Loko Yehovha a hi rivalela swidyoho u tlhela a swi sula hilaha ku heleleke. (Hlaya Mitirho 3:19.) Loko xikweleti xi herisiwa, hi nga ha anakanya hi munhu loyi a baka layeni ehenhla ka xikweleti xa wena lexi tsariweke ehansi. Hambiswiritano, tinomboro leti tsariweke ehansi ka layeni yoleyo ta ha vonaka. Ku endla tano, swa hambana ni loko u sula nchumu wo nkarhi. Leswaku hi twisisa xifaniso lexi swi lava hi tsundzuka leswaku inki leyi a yi tirhisiwa emikarhini ya khale a swi olova ku yi sula hi mati. Munhu a ta teka xiponci lexi tsakamaka kutani a sula marito lama tsariweke. Kutani loko xikweleti xi “suriwa” swi fana ni loko xi heriseriwa makumu. Swilo leswi a swi tsariwile eku sunguleni a swa ha vonaki. Swi fana ni loko ku nga si tshama ku endliwa xikweleti. Swi hi thova timbilu ku tiva leswaku Yehovha a ngo hi rivalela swidyoho ntsena kambe u tlhela a swi sula hilaha ku heleleke!—Ps. 51:9.

12. Hi dyondza yini eka xifaniso xa papa lerikulu?

¹² Ku ni ndlela yin’wana leyi Yehovha a yi tirhisaka ku hlamusela ndlela leyi a hi rivalelaka swidyoho hayona. U ri: “Ndzi ta funengeta milandzu ya wena ku fana ni loko yi funengetiwe hi papa.” (Esa. 44:22) Loko Yehovha a hi rivalela, swi fana ni loko a tirhisa papa lerikulu leswaku a tumbeta swidyoho swa hina swi nga ha vonaki.

13. Hi titwa njhani loko Yehovha a hi rivalela swidyoho?

¹³ Xana swifaniso leswi swi hi dyondzisa yini? Loko Yehovha a hi rivalela, a hi fanelanga hi tshamela ku titwa nandzu. Swidyoho swa hina swi rivaleriwe hi ku helela hikwalaho ka ngati ya Yesu Kreste. Swi fana ni loko swi nga si tshama swi endliwa. Loko hi hundzuka eswidyohweni swa hina, leyi i ndlela leyi Yehovha a hi rivalelaka hayona.

YEHOVHA U TLHELA A VA MUNGHANA WA HINA

14. Hikwalahokayini hi fanele hi tshemba ndlela leyi Yehovha a rivalelaka hayona? (Nakambe vona swifaniso.)

¹⁴ Ndlela leyi Yehovha a hi rivalelaka hayona yi endla hi tlhela hi va vanghana va yena. Yi hi pfuna hi papalata ku tshamela ku tivona nandzu. A hi fanelanga hi chava leswaku Yehovha wa ha hi hlundzukerile naswona u lava ndlela yo hi xupula. A nge pfuki a swi endlile sweswo. Hikwalahokayini hi fanele hi tshemba loko Yehovha a vula leswaku wa hi rivalela? Yehovha u byele muprofeta Yeremiya a ku: “Ndzi ta va rivalela xihoxo xa vona naswona a ndzi nge he xi tsundzuki xidyoho xa vona.” (Yer. 31:34) Loko muapostola Pawulo a vulavula hi marito wolawo, u tirhise xiga lexi fanaka a ku: “A ndzi nge he swi tsundzuki swidyoho swa vona.” (Hev. 8:12) Kambe sweswo swi vula yini hakunene?

15. Swi vula yini ku va Yehovha a nga ha swi tsundzuki swidyoho swa hina?

¹⁵ EBibeleni, rito leri nge “tsundzuka,” a hi mikarhi hinkwayo ri vulaka ku va munhu a tsundzuka kumbe ku ehleketa hi nchumu wo karhi. Kambe ri nga ha vula ku va munhu a endla swo karhi. Xigevenga lexi a xi hayekiwe emhandzini ya nxaniso etlhelo ka Yesu xi kombele xi ku: “Yesu, u ndzi tsundzuka loko u nghena eMfun’weni wa wena.” (Luka 23:​42, 43) A xi kombela Yesu leswaku a xi endlela swo karhi hi nkarhi wolowo. Yesu u byele xigevenga xolexo leswaku u ta xi pfuxa. Kutani loko Yehovha a vula leswaku a nga ha swi tsundzuki swidyoho swa hina, u vula leswaku a nge hi tekeli goza ro karhi. Hi ku famba ka nkarhi a nge hi xupuli hikwalaho ka swidyoho leswi ana se a hi rivaleleke swona.

16. Bibele yi wu hlamusela njhani tshunxeko lowu hi vaka na wona hikwalaho ka ndlela leyi Yehovha a hi rivalelaka hayona?

¹⁶ Bibele yi tirhisa xifaniso xin’wana ku hi pfuna hi twisisa leswaku loko Yehovha a hi rivalela, hi titwa hi tshunxekile. Hikwalaho ka leswi hi tswariweke hi ri na xidyoho naswona hi nga ni mboyamelo wo dyoha, hi fanisiwa ni “mahlonga ya xidyoho.” Kambe hi khensa leswi Yehovha a hi rivalelaka, hi fana ni mahlonga lama “tshunxiweke exidyohweni.” (Rhom. 6:​17, 18; Nhlav. 1:5) Loko hi tiva leswaku Yehovha u hi rivalerile, hi tsaka ku fana ni hlonga leri tshunxiweke.

17. Xana ku rivaleriwa swi fana ni loko hi horisiwa hi ndlela yihi? (Esaya 53:5)

¹⁷ Hlaya Esaya 53:5. Eka xifaniso xo hetelela lexi hi nga ta bula ha xona hi fanisiwa ni vanhu lava nga ni vuvabyi lebyi dlayaka. Hikwalaho ka gandzelo ra nkutsulo leri Yehovha a hi nyikeke rona hi ku tirhisa N’wana wakwe, hi horisiwile hi ndlela yo fanekisela. (1 Pet. 2:24) Gandzelo ra nkutsulo ri endla swi koteka leswaku hi tlhela hi va ni vuxaka lebyinene na Yehovha, lebyi a byi onhakile hikwalaho ka xidyoho. Ku fana ni leswi munhu loyi a horisiweke eka vuvabyi lebyi nga ni khombo a tsakaka, na hina ha tsaka loko hi amukeleka eka Yehovha hi tlhela hi va ni vuxaka lebyinene na yena.

LESWI KU RIVALELA KA YEHOVHA KU VULAKA SWONA EKA HINA

18. Hi dyondze yini eka swifaniso swo hambanahambana leswi kumekaka eBibeleni swa ndlela leyi Yehovha a rivalelaka hayona? (Nakambe vona bokisi leri nge, “Ndlela Leyi Yehovha A Hi Rivalelaka Hayona.”)

¹⁸ Hi dyondze yini eka swifaniso swo hambanahambana leswi kumekaka eBibeleni swa ndlela leyi Yehovha a rivalelaka hayona? U hi rivalela swidyoho hilaha ku heleleke naswona ha tiyiseka leswaku a nge hi xupuli enkarhini lowu taka hikwalaho ka swona. Sweswo swi endla hi va ni vuxaka lebyinene ni Tata wa hina wa le tilweni. Hi nkarhi lowu fanaka, a swi rivali leswaku ku rivaleriwa hilaha ku heleleke i nyiko. A hi nchumu lowu hi fanelaka. Yehovha u rivalela vadyohi hileswi a nga ni rirhandzu ni musa lowukulu.—Rhom. 3:24.

19. (a) I yini leswi hi faneleke hi swi tlangela? (Varhoma 4:8) (b) Hi ta bula hi yini eka nhlokomhaka leyi landzelaka?

¹⁹ Hlaya Varhoma 4:8. Ha swi tlangela leswi Yehovha a nga Xikwembu lexi “rivalela[ka] hakunene”! (Ps. 130:4) Hambiswiritano, leswaku hi rivaleriwa swi titshege hi nchumu wun’wana wa nkoka. Yesu u te: “Loko mi nga va rivaleli vanhu swidyoho swa vona, Tata wa n’wina na yena a nge mi rivaleli.” (Mat. 6:​14, 15) Kutani i swa nkoka leswaku hi tekelela ndlela leyi Yehovha a rivalelaka hayona. Kambe hi nga swi endlisa ku yini sweswo? Nhlokomhaka leyi landzelaka yi ta hi komba ndlela leyi hi nga swi endlaka hayona sweswo.