Pfumela Leswaku Yehovha U Ku Rivalerile

1-2. Vadyohi lava hundzukaka va nga rhuliwa ndzhwalo hi ndlela yihi? (Nakambe vona xifaniso.)

HOSI Davhida a a swi tiva leswaku swi njhani ku titwa nandzu hikwalaho ka swidyoho leswi a tshameke a swi endla. (Ps. 40:12; 51:3; xingheniso) U endle swihoxo leswikulu evuton’wini byakwe. Kambe u hundzuke hi mbilu hinkwayo naswona Yehovha u n’wi rivalerile. (2 Sam. 12:13) Hikwalaho, Davhida a a swi twisisa leswaku swi njhani ku rivaleriwa hi Yehovha.—Ps. 32:1.

² Ku fana na Davhida, na hina hi nga titwa hi vevukeriwile hikwalaho ka leswi Yehovha a hi kombeke tintswalo. Swi tiyisa nhlana ku tiva leswaku Yehovha u tiyimisele ku hi rivalela hambi ku ri swidyoho leswikulu, ntsena loko hi hundzuka, hi vula swidyoho swa hina ni ku tlhela hi tirha hi matimba leswaku hi nga ha swi phindhi. (Swiv. 28:13; Mit. 26:20; 1 Yoh. 1:9) Nakambe swa tsakisa ku tiva leswaku u rivalela hilaha ku heleleke, onge hiloko hi nga si tshama hi dyoha.—Ezek. 33:16.

3-4. Makwerhu un’wana waxisati u titwe njhani endzhaku ka loko a khuvuriwile naswona hi ta bula hi yini eka nhlokomhaka leyi?

³ Mikarhi yin’wana, van’wana swa va tikela ku amukela leswaku Yehovha u va rivalerile. Ehleketa hi Jennifer, loyi a kuleleke entiyisweni. Loko a nghena emalembeni ya vuntshwa, u sungule ku endla swilo swo biha ni ku hanya vutomi byimbirhi. Hi ku famba ka nkarhi, u tlhelele eka Yehovha naswona u khuvuriwile. U ri: “A ndzi rhandza mali, ndzi tikhoma ku biha hi swa masangu, ndzi dakwa ni ku tlhela ndzi hlundzuka ngopfu. A ndzi swi tiva leswaku endzhaku ka loko ndzi kombele Yehovha leswaku a ndzi rivalela ni ku tlhela ndzi hundzuka, gandzelo ra Kreste a ri ta ndzi basisa. Kambe a swi ndzi tikela ku amukela leswaku Yehovha u ndzi rivalerile.”

⁴ Xana mikarhi yin’wana swa ku tikela ku tshemba leswaku Yehovha u ku rivalerile? Ku fana na Davhida, Yehovha u lava hi nga ti kanakani tintswalo takwe. Eka nhlokomhaka leyi, hi ta bula hileswaku hikwalahokayini hi fanele hi amukela leswaku Yehovha u hi rivalerile ni leswi nga hi pfunaka ku endla tano.

HIKWALAHOKAYINI HI FANELE HI PFUMELA LESWAKU YEHOVHA U HI RIVALERILE?

5. Sathana u lava hi tshemba yini? Nyika xikombiso.

⁵ Loko hi tshemba leswaku Yehovha u hi rivalerile, hi ta papalata ku phasiwa hi yin’wana ya mintlhamu ya Sathana. Tsundzuka leswaku Sathana u ta endla hinkwaswo leswaku a hi tshikisa ku tirhela Yehovha. Leswaku a fikelela sweswo, a nga ha ringeta ku hi endla hi tshemba leswaku swidyoho swa hina a swi rivaleleki. Ehleketa hi leswi endlekeleke wanuna wa le Korinto loyi a susiwile evandlheni hikwalaho ka leswi a tikhomeke ku biha hi swa masangu. (1 Kor. 5:​1, 5, 13) Endzhaku ka loko a hundzukile, Sathana a a lava leswaku vandlha ri nga n’wi amukeli hambi ku ri ku n’wi rivalela. Nakambe a a lava leswaku wanuna yoloye a tivona a nga faneriwi hi ku rivaleriwa kutani a “hluri[wa] hi gome lerikulu” lerova a tshika ni ku gandzela Yehovha. Sathana a nga si cinca. Kambe “ha ma tiva makungu yakwe.”—2 Kor. 2:​5-11.

6. I yini leswi nga hi pfunaka leswaku hi tshika ku titwa nandzu?

⁶ Loko hi tshemba leswaku Yehovha u hi rivalerile, hi ta tshika ku titwa nandzu. Hi ntolovelo, loko hi dyoha hi titwa nandzu. (Ps. 51:17) Sweswo i swinene hikuva ripfalo ra hina ri nga hi susumetela ku cinca mahanyelo. (2 Kor. 7:​10, 11) Hambiswiritano, loko hi tshamela ku tivona nandzu hambiloko se hi hundzukile, hi nga hela matimba. Kambe loko hi pfumela leswaku Yehovha u hi rivalerile, hi tshika ku tivona nandzu. Nakambe hi ta kota ku tirhela Yehovha hilaha a lavaka hakona, hi tsakile naswona hi ri ni ripfalo leri baseke. (Kol. 1:​10, 11; 2 Tim. 1:3) I yini leswi nga hi pfunaka hi tshemba leswaku Xikwembu xi hi rivalerile?

I YINI LESWI NGA HI PFUNAKA HI TSHEMBA LESWAKU YEHOVHA U HI RIVALERILE?

7-8. Xana Yehovha u tihlamusele njhani eka Muxe naswona sweswo swi endla hi tiyiseka hi yini? (Eksoda 34:​6, 7)

⁷ Anakanyisisa hi ndlela leyi Yehovha a tihlamuseleke hayona. Hi xikombiso, xiya leswi Yehovha a swi byeleke Muxe eNtshaveni ya Sinayi.a (Hlaya Eksoda 34:​6, 7.) Eka swilo hinkwaswo leswi Yehovha a a ta va a swi vurile hi vumunhu ni tindlela takwe, u vone swi fanerile ku titivisa a ri “Xikwembu xa tintswalo ni ntwelavusiwana.” Xana Xikwembu xo tano, xi nga ala ku rivalela mugandzeri wa xona loyi a hundzukeke hakunene? Nikatsongo! Sweswo ku ta va ku ri nsele, ku nga nchumu lowu xi nga ta pfuka xi nga wu endlanga.

⁸ Hi nga tiyiseka ku loko Yehovha a vula leswaku hi yena Xikwembu lexi nga ni tintswalo u vulavula ntiyiso, a nge pfuki a hembile. (Ps. 31:5) Hikwalaho, hi nga n’wi tshemba. Loko swi ku tikela ku tshika ku tivona nandzu hikwalaho ka swidyoho leswi u nga tshama u swi endla, tivutise leswi: ‘Xana ndza swi tshemba leswaku Yehovha u ni tintswalo, ntwelavusiwana naswona a nge pfuki a ale ku rivalela mudyohi loyi a hundzukeke? Kutani, hikwalahokayini ndzi nga tshembi leswaku u ndzi rivalerile?’

9. Xana swi vula yini ku va hi rivaleriwa swidyoho? (Pisalema 32:5)

⁹ Anakanyisisa hi leswi Yehovha a susumeteleke vatsari va Bibele leswaku va swi vula hi ndlela leyi a rivalelaka hayona. Hi xikombiso, xiya ndlela leyi Davhida loyi a nga un’wana wa vatsari va Bibele, a hlamuseleke ndlela leyi Yehovha a rivalelaka hayona. (Hlaya Pisalema 32:5.) Davhida u te: “Wena u ndzi rivalele [swidyoho swa mina].” Rito ra Xiheveru leri hundzuluxeriweke ri va “rivalela” eka tindzimana leti, ri nga tlhela ri vula ku “tlakula” kumbe ku “rhwala.” Hi ndlela yin’wana loko Yehovha a rivalela Davhida, u rhwale swidyoho swakwe a swi yisa ekule. Hikwalaho, Davhida u rhuliwe ndzhwalo eka ku tivona nandzu loku a a ri na kona. (Ps. 32:​2-4) Na hina hi nga titwa hi ndlela leyi fanaka loko hi hundzuka eswidyohweni swa hina. A ha ha fanelanga hi titwa nandzu hikwalaho ka swona hikuva Yehovha u swi rhwarile a swi yisa ekule na hina.

10-11. Xana xiga lexi nge “u lunghekele ku rivalela” xi hi byela yini hi Yehovha? (Pisalema 86:5)

¹⁰ Hlaya Pisalema 86:5. Eka tsalwa leri, Davhida u vulavula hi Yehovha a ri loyi a “lunghekele[ke] ku rivalela.” Buku yin’wana loko yi vulavula hi xiga lexi mayelana na Yehovha yi ri: “I ‘murivaleri’ leswi vulaka leswaku wo va tano hi ‘ntumbuluko.’” Hikwalahokayini a ri tano? Xiphemu lexi landzelaka xa ndzimana leyi xi hlamusela xi ku: “U rhandza hinkwavo lava ku vitanaka.” Hilaha hi dyondzeke hakona eka nhlokomhaka leyi hundzeke, rirhandzu hi rona ri endlaka leswaku Yehovha a va rhandza swinene vagandzeri vakwe vo tshembeka naswona a nge va tshiki. Hikwalaho ka rirhandzu rero, u va “rivalela hi ndlela leyikulu” vadyohi lava hundzukaka. (Esa. 55:7) Loko swi ku tikela ku amukela leswaku Xikwembu xi ku rivalerile u nga ha tivutisa leswi: ‘Xana ndza tshemba leswaku Yehovha i Murivaleri, ku nga leswaku u rivalela vadyohi hinkwavo lava hundzukeke naswona va kombelaka leswaku a va komba tintswalo? Kutani hikwalahokayini ndzi fanele ndzi ala leswaku u ndzi rivalerile loko ndzi n’wi kombela leswaku a ndzi komba tintswalo?’

¹¹ Swi nga hi chavelela ku tiva leswaku Yehovha u swi twisisa kahle leswaku hi vadyohi. (Ps. 139:​1, 2) A hi voneni leswi Davhida a swi vuleke eka Pisalema yin’wana ni ndlela leyi yi nga hi pfunaka hayona hi tshemba leswaku Yehovha wa swi lava ku hi rivalela.

U NGA SWI RIVALI LESWI YEHOVHA A SWI TSUNDZUKAKA

12-13. Hi ku ya hi Pisalema 103:​14, xana Yehovha u tsundzuka yini hi hina naswona sweswo swi n’wi endla a hi khoma njhani?

¹² Hlaya Pisalema 103:14. Loko Davhida a vulavula hi Yehovha u te, “wa tsundzuka leswaku hi ntshuri.” Hi ku va a vule sweswo, Davhida u hlamusela xin’wana xa swivangelo leswi endlaka Yehovha a lunghekela ku rivalela vadyohi lava hundzukaka, ku nga leswaku wa tsundzuka ku hi vadyohi. Leswaku hi swi twisisa kahle sweswo, a hi ma kambisiseni hi vuenti marito ya Davhida.

¹³ Davhida u vule leswaku Yehovha “u yi tiva kahle ndlela leyi hi vumbiweke ha yona.” U vumbe Adamu “hi ntshuri wa misava” naswona wa swi tiva leswaku vanhu lava nga riki na xidyoho va fanele va dya, va etlela ni ku hefemula. (Gen. 2:7) Kambe endzhaku ka loko Adamu na Evha va dyohile, swilo swi sungule ku cinca. Leswi hi nga vatukulu va vona, hi velekiwe hi ri ni xidyoho lexi hi endlaka hi lava ku endla swilo swo biha. Davhida u vule leswaku Yehovha “wa tsundzuka” ku kombisa leswaku a ngo tiva ntsena leswaku hi vadyohi. Rito ra Xiheveru leri tirhisiweke laha ri nga vula ku endla nchumu wo karhi lowunene. Hi nga katsakanya marito ya Davhida hi ndlela leyi: Yehovha wa swi twisisa leswaku mikarhi yin’wana hi endla swihoxo naswona loko hi swi endla, u susumeteleka ku hi komba musa ni ku tlhela a hi rivalela loko hi hundzuka.—Ps. 78:​38, 39.

14. (a) Xana Davhida u yi hlamusele njhani ndlela leyi Yehovha a rivalelaka hayona? (Pisalema 103:12) (b) Xana xikombiso xa Davhida xi swi kombisa njhani leswaku Yehovha u rivalela hi ku helela? (Vona bokisi leri nge, “Ndlela Leyi Yehovha A Hi Rivalelaka Swidyoho Ni Ku Tlhela A Swi Rivala.”)

¹⁴ Xana Yehovha u rivalela ku fikela kwihi? (Hlaya Pisalema 103:12.) Davhida u vule leswaku loko Yehovha a hi rivalela, U veka swidyoho swa hina “ekule na hina tanihi leswi vuxa byi nga ekule ni vupeladyambu.” Hi ndlela yin’wana, leswi vuxa byi nga ekule swinene ni vupeladyambu, mimpfhuka leyi mbirhi a yi nge pfuki yi hlanganile. Kutani, xana leswi swi hi byela yini hi swidyoho leswi Yehovha a hi rivalelaka swona? Buku yin’wana loko yi vulavula hi ndzimana leyi yi vula leswaku Xikwembu xi susa swidyoho swa hina xi swi yisa ekule. Hi ndlela yo karhi, swi fana niloko nun’hwelo wa nchumu wo karhi wu nyamalarile. Hikwalaho, hi nga tiyiseka leswaku Xikwembu a xa ha ehleketi hi swona kumbe xi hi tsundzuxa. Ehleketa hi mhaka leyi, nun’hwelo wu nga endla leswaku hi tsundzuka nchumu wo karhi kambe loko Yehovha a hi rivalela, a ka ha ri na nchumu lexi n’wi tsundzuxaka hi xidyoho xexo naswona a nge hi tsundzuxi swona.—Ezek. 18:​21, 22; Mit. 3:19.

15. Hi nga endla yini loko hi nga tshiki ku titwa nandzu hikwalaho ka swidyoho swa khale?

¹⁵ Xana marito ya Davhida lama nga eka Pisalema 103 ma nga hi pfuna njhani leswaku hi tshemba ku Yehovha u hi rivalerile? Loko hi tshamela ku tivona nandzu hikwalaho ka swidyoho leswi hi nga tshama hi swi endla hi nga tivutisa leswi: ‘Xana ndza swi rivala leswi Yehovha a swi tsundzukaka, ku nga leswaku ndza swi rivala ku wa swi tsundzuka leswaku ndzi mudyohi naswona u ta n’wi rivalela mudyohi loyi a fanaka na mina loyi a hundzukeke? Xana ndzi tsundzuka leswi Yehovha a hlawulaka ku swi rivala, ku nga ku tsundzuka swidyoho leswi se a ndzi rivaleleke swona ni leswi a nga taka a nga ndzi soli hikwalaho ka swona?’ Yehovha wa swi rivala swidyoho swa hina. Hikwalaho, na hina hi fanele hi endla tano. (Ps. 130:3) Loko hi tshemba leswaku Yehovha u hi rivalerile, hi ta tshika ku titwa nandzu hikwalaho ka swidyoho leswi hi tshameke hi swi endla ivi hi ya emahlweni hi n’wi tirhela hi tsakile.

16. Nyika xikombiso xa khombo leri nga ha vaka kona loko hi tshamela ku titwa nandzu hikwalaho ka swidyoho swa khale. (Nakambe vona xifaniso.)

¹⁶ Ehleketa hi xikombiso lexi. Ku tshamela ku titwa nandzu hikwalaho ka swidyoho leswi hi tshameke hi swi endla, swi nga fana ni ku chayela movha hi langute xivoni lexi hi kombaka swa le ndzhaku. I swinene mikarhi yin’wana ku languta xivoni xexo leswaku u ta papalata makhombo lama nga endzhaku ka wena. Kambe leswaku u nga chayisi, u fanele u languta laha u yaka kona. Hilaha ku fanaka, swi nga hi pfuna loko mikarhi yin’wana hi ehleketa hi swihoxo swa hina hikuva hi ta dyondza eka swona ni ku tlhela hi tiyimisela ku ka hi nga ha swi phindhi. Kambe loko hi tshamela ku ehleketa hi swihoxo swa hina ni ku tshamela ku tivona nandzu, a hi nge swi koti ku gandzela Xikwembu hi mbilu hinkwayo. Ku ri na sweswo, a hi tiyimiseleni ku gandzela Xikwembu ni ku ehleketa hi vumundzuku lebyi xi hi tshembiseke byona, laha swilo swo biha ‘swi nga taka swi nga ha ti emiehleketweni.’—Esa. 65:17; Swiv. 4:25.

YANA EMAHLWENI U TIYISEKISA MBILU YA WENA

17. Hikwalahokayini hi nga fanelanga hi tshika ku tiyisekisa timbilu ta hina leswaku Yehovha wa hi rhandza naswona u lava ku hi rivalela?

¹⁷ Hi fanele hi nga tshiki ku tiyisekisa timbilu ta hina leswaku Yehovha wa hi rhandza nileswaku u lava ku hi rivalela. (1 Yoh. 3:19) Hikwalahokayini? Hikuva Sathana a nge tshiki ku endla leswaku hi tshemba ku a hi rhandzeki naswona a hi rivaleleki. Phela u tiyimisele ku hi tshikisa ku gandzela Yehovha. Hi nga langutela leswaku Sathana u ta endla hinkwaswo leswi a nga swi kotaka leswaku a hi tshikisa hikuva wa swi tiva leswaku nkarhi wakwe wu komile. (Nhlav. 12:12) Hi nga n’wi pfumeleli a hi hlula.

18. U nga endla yini leswaku u tiyisekisa mbilu ya wena ku Yehovha wa ku rhandza naswona u ku rivalerile?

¹⁸ Leswaku u ya u tiyiseka ku Yehovha wa ku rhandza, tirhisa swiringanyeto leswi hi buleke ha swona eka nhlokomhaka leyi hundzeke. Nakambe leswaku u tiyisekisa mbilu ya wena ku Yehovha u ku rivalerile, anakanyisisa hi ndlela leyi Yehovha a tihlamuseleke hayona. Anakanyisisa hileswi Bibele yi swi vulaka hi ndlela leyi Yehovha a rivalelaka hayona. U nga rivali leswaku wa swi tiva ku u mudyohi naswona u ta ku komba tintswalo. Ku engetela kwalaho, tsundzuka leswaku loko a ku rivalela, u endla tano hilaha ku heleleke. Kutani u ta tsaka hi ku va wa tiyiseka leswaku Yehovha u ta ku komba tintswalo naswona ku fana na Davhida u ta vula u ku, “Ndza khensa Yehovha hileswi u ndzi ‘rivaleleke’.”—Ps. 32:5.