Yehovha, Xikwembu ‘Lexi Tiyimiseleke Ku Rivalela’

“Wena Yehovha u lonene, naswona u tiyimisele ku rivalela.”—PISALEMA 86:5, NW.

1. Hi wihi ndzhwalo wo tika lowu Hosi Davhida a a ri na wona, naswona u wu kumise ku yini nchavelelo embilwini yakwe leyi karhatekeke?

HOSI DAVHIDA wa le Israyele wa khale a a swi tiva leswaku wu tika njhani ndzhwalo wa ku karhatiwa hi ripfalo loko u dyohile. U tsarile a ku: “Ku homboloka ka mina ku tlule nhloko ya mina; ku nḍi hlula hi ku tika kukotisa nḍwalo lo’wu tikaka ngopfu. Nḍi heleriwe hi matimba, nḍi ṭhov̌a-ṭhov̌iwile ngopfu; nḍi rila hikwalaho ka ku ṭekaṭeka ka mbilu ya mina.” (Pisalema 38:4, 8) Hambiswiritano, Davhida u chaveleriwile loko mbilu yakwe yi karhatekile. A a swi tiva leswaku hambileswi Yehovha a vengaka xidyoho, mudyohi yena a nga n’wi vengi—loko a hundzuka hakunene, a tshika ndlela ya yena ya vudyoho. (Pisalema 32:5; 103:3) Tanihi leswi a a pfumela hi mbilu hinkwayo leswaku Yehovha u tiyimisele ku tsetselela lava hundzukaka, Davhida u te: “Wena Yehovha u lonene, naswona u tiyimisele ku rivalela.”—Pisalema 86:5.

2, 3. (a) Loko hi dyoha, hi wihi ndzhwalo lowu hi nga wu byarhaka hikwalaho ka swona, naswona ha yini swi fanerile? (b) Ku ‘hluriwa’ hi ku tivona nandzu swi ni khombo rihi? (c) I xitiyisekiso xihi lexi Bibele yi hi nyikaka xona malunghana ni ku tiyimisela ka Yehovha ku rivalela?

² Loko hi dyoha, na hina hi nga rhwala ndzhwalo lowu tikaka swinene wa ripfalo leri karhatekeke hikwalaho ka swona. Ntlhaveko lowu wa ku tisola i nchumu lowu tolovelekeke naswona wa pfuna. Wu nga hi susumetela ku teka magoza lama faneleke, hi lulamisa swihoxo swa hina. Kambe Vakreste van’wana va tikeriwe ku tlula mpimo hi ku tivona nandzu. Timbilu ta vona leti va avanyisaka ti nga phikelela ti va byela leswaku Xikwembu a xi nge va rivaleli hi ku hetiseka, hambi va hundzuka njhani. Makwerhu un’wana wa xisati, loko a ehleketa hi xihoxo lexi a xi endleke, u te: “Ku tibyela leswaku swi nga endleka Yehovha a nga ha ku rhandzi i mianakanyo yo biha swinene.” Niloko a hundzukile, a amukela ndzayo leyi pfunaka ya vakulu va vandlha, u hambete a tivona a nga faneriwanga hi ku rivaleriwa hi Xikwembu. Wa hlamusela: “A ku na siku leri hundzaka ndzi nga kombelanga Yehovha leswaku a ndzi rivalela.” Loko hi ‘hluriwa’ hi ku tivona nandzu, Sathana a nga ringeta ku endla leswaku hi lan’wa, hi tivona hi nga faneleki ku tirhela Yehovha.—2 Vakorinto 2:5-7, 11.

³ Kambe sweswo a hi swona nikatsongo leswi Yehovha a swi langutisaka xiswona! Rito ra yena ra hi tiyisekisa leswaku loko hi kombisa ku hundzuka ka xiviri loku humaka embilwini, Yehovha u tiyimisele ku hi rivalela. (Swivuriso 28:13) Kutani loko u vona onge Xikwembu a xi kalanga xi ku rivalela, kumbexana leswi lavekaka i ku va ni matwisiselo lama enteke ya xivangelo xa ku rivalela ka xona ni ndlela leyi xi rivalelaka ha yona.

Mhaka Leyi Ha Yona Yehovha A ‘Tiyimiseleke Ku Rivalela’?

4. Yehovha u tsundzuka yini malunghana ni xiyimo xa hina, naswona leswi swi yi khumba njhani ndlela leyi a hi khomaka ha yona?

⁴ Ha hlaya: “Hi laha v̌uša byi hambaneke ni v̌upeladyambu, o hambanyisile ŝeŝo e ku dyoha ka hina kule na hina. Hi laha tatana a [tsetselelaka] v̌ana v̌a yena, hi ŝeŝo Yehova o [tsetselela] la’v̌a ṅwi tšhavaka.” Ha yini Yehovha a tiyimisele ku tsetselela? Ndzimana leyi landzelaka yi hlamula yi ku: “Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.” (Pisalema 103:12-14) Ina, Yehovha a nga rivali leswaku hi swivumbiwa leswi nga ntshuri, hi tsanile hikwalaho ka ku nga hetiseki. Xiga lexi nge u tiva “leši hi endliweke ha šona” xi hi tsundzuxa leswaku Bibele yi fanisa Yehovha ni muvumbi, hina yi hi fanisa ni swibye leswi a swi vumbaka.a (Yeremiya 18:2-6) Muvumbi u tirhisa swibye swakwe swa vumba swinene kambe a swi khoma kahle, minkarhi hinkwayo a tsundzuka xiyimo xa swona. Kutani Yehovha, Muvumbi Lonkulu u hi khoma kahle hi ku ya hi ku tsana loku vangiwaka hi xiyimo xa hina xa vudyoho.—Ringanisa 2 Vakorinto 4:7.

5. Buku ya Varhoma yi byi hlamusela njhani vulawuri bya matimba bya xidyoho enyameni ya hina leyi tsaneke?

⁵ Yehovha wa swi twisisa leswaku xidyoho xi ni matimba ku fikela kwihi. Matsalwa ma hlamusela xidyoho tanihi ntamu lowukulu lowu lawulaka munhu hi ndlela leyi nga ni khombo. Xana xidyoho xi lawula hi matimba ku fikela kwihi? Ebukwini ya Varhoma, muapostola Pawulo la huhuteriweke u swi hlamusela hi ndlela yo fanekisela: Hi “fumiwa hi ku dyoha,” tanihi masocha lama fumiwaka hi ndhuna ya wona (Varhoma 3:9); xi ‘fume’ vanhu tanihi hosi (Varhoma 5:21); xi “akile” kumbe xi “tshama” endzeni ka hina (Varhoma 7:17, 20); “nawu” wa xona wu hambeta wu tirha endzeni ka hina, kahle-kahle wu ringeta ku lawula mahanyelo ya hina. (Varhoma 7:23, 25) Hi le nyimpini leyikulu swonghasi yo lwisana ni ku lawuriwa swinene ka nyama ya hina leyi tsaneke hi xidyoho!—Varhoma 7:21, 24.

6. Yehovha u va languta njhani lava lavaka ku tsetseleriwa hi yena hi timbilu leti tisolaka?

⁶ Hikwalaho, Xikwembu xa hina lexi tsetselelaka xa swi tiva leswaku a hi nge swi koti ku endla ku rhandza ka xona hi ku helela, ku nga khathariseki leswaku timbilu ta hina ti swi rhandza ku fikela kwihi. (1 Tihosi 8:46) Hi rirhandzu xa hi tiyisekisa leswaku loko hi lava leswaku xi hi tsetselela tanihi tatana, hi mbilu leyi tisolaka, xi ta hi rivalela. Mupisalema Davhida u te: “Maganḍelo ya Šikwembu i moya lo’wu ṭhov̌ekeke; Oho Šikwembu! a ku soli mbilu le’yi ṭhov̌ekeke, le’yi nge nhlomulweni.” (Pisalema 51:17) Yehovha a nge fularheli kumbe ku bakanya mbilu leyi tshovekeke ni ku va enhlomulweni hikwalaho ka ndzhwalo wa ku tivona nandzu. Sweswo swi ku hlamusela kahle swonghasi ku tiyimisela ka Yehovha ku rivalela!

7. Ha yini hi nga fanelanga hi tlanga hi ntsetselelo wa Xikwembu?

⁷ Kambe, xana leswi swi vula leswaku hi nga tlanga hi ku tsetselela ka Xikwembu, hi tirhisa xiyimo xa hina xa vudyoho xi va nchumu wo tiyimelela ha wona? Nikatsongo! Yehovha a nga lawuriwi hi matitwelo ntsena. Ku tsetselela ka yena ku hikiwile. A nge va rivaleli nikatsongo lava hi ku tinonoh’wisa timbilu va hanyaka hi ku dyohela nsele, hi vomu, va nga hundzuki. (Vaheveru 10:26-31) Hi tlhelo rin’wana, loko a vona mbilu “le’yi ṭhov̌ekeke, le’yi nge nhlomulweni,” u va a “tiyimisele ku rivalela.” (Swivuriso 17:3) A hi kambisiseni tinhlamuselo tin’wana ta le Bibeleni leti kombisaka ndlela leyi ku rivalela ka Xikwembu ku heleleke ha yona.

Xana Yehovha U Rivalela Hi Ku Helela Ku Fikela Kwihi?

8. Kahle-kahle Yehovha u va a endla yini loko a hlangula swidyoho swa hina, naswona leswi swi fanele swi va ni vuyelo byihi eka hina?

⁸ Hosi Davhida la hundzukeke u te: “Nḍi ku tiv̌isile šidyoho ša nga, a nḍi fihlanga ku homboloka ka nga; nḍi te: Nḍi ta tiv̌ula ka Yehova e ku dyoha ka mina; kutani u hlangurile nanḍu wa šidyoho ša nga.” (Pisalema 32:5, xiitaliki i xerhu.) Rito leri nge “hlangurile” ri hundzuluxela rito ra Xiheveru leri kahle-kahle ri vulaka ku “susa,” “byarha, rhwala.” Matirhelo ya rona laha ma kombisa ‘ku susa nandzu, xidyoho.’ Kutani Yehovha u suse swidyoho swa Davhida a swi yisa ekule, hi ndlela yo fanekisela. (Ringanisa Levhitika 16:20-22.) Handle ko tipfinyinga, leswi swi vevukise ndzhwalo wa ku tivona nandzu lowu Davhida a a ri na wona. (Ringanisa Pisalema 32:3.) Na hina hi nga xi tshemba hi ku helela Xikwembu lexi hlangulaka swidyoho swa lava lavaka ku rivaleriwa hi xona exisekelweni xa ripfumelo leri va nga na rona egandzelweni ra nkutsulo ra Yesu Kreste. (Matewu 20:28; ringanisa Esaya 53:12.) Lava Yehovha a susaka swidyoho swa vona hi ndlela yoleyo a swi yisa ekule a va fanelanga va ya emahlweni va rhwala ndzhwalo wa ku tivona nandzu hi swidyoho swa nkarhi lowu hundzeke.

9. Ma vula yini marito ya Yesu lama nge: “Hi rivalele swikweleti swa hina”?

⁹ Yesu u tirhise vuxaka bya lava kolotiwaka ni lava kolotaka leswaku a hlamusela ndlela leyi Yehovha a rivalelaka ha yona. Hi xikombiso, Yesu u hi khutaze ku khongela hi ku: “Hi rivalele swikweleti swa hina.” (Matewu 6:12, NW) Xisweswo, Yesu u fanise “swidyoho” ni “swikweleti.” (Luka 11:4) Loko hi dyoha, hi va “vakoloti” va Yehovha. Riendli ra Xigriki leri hundzuluxeriweke ri va “rivalela” ri nga vula “ku honisa, ku tshika xikweleti hi ku ka u nga xi londzi.” Hi marito man’wana, loko Yehovha a rivalela, u sula xikweleti lexi a xi ta koxiwa eka akhawunti ya hina loko a a nga xi sulanga. Vadyohi lava hundzukeke va nga chaveleriwa hi ndlela yoleyo. Yehovha a nge pfuki a londze xikweleti lexi a xi suleke!—Pisalema 32:1, 2; ringanisa Matewu 18:23-35.

10, 11. (a) Hi yihi mianakanyo leyi nyikeriwaka hi xiga lexi nge ‘swi chukuchiwa,’ lexi kumekaka eka Mintirho 3:19? (b) Xana swi kombisiwa njhani leswaku Yehovha u rivalela hilaha ku heleleke?

¹⁰ Eka Mintirho 3:19 (NW), Bibele yi tirhisa xiga-ririmi xin’wana lexi hanyaka, yi hlamusela ku rivalela ka Xikwembu, yi ku: “Hikwalaho, hundzukani, mi kongoma endzhaku, leswaku swidyoho swa n’wina swi chukuchiwa.” Xiga lexi nge “swi chukuchiwa” xi hundzuluxela riendli ra Xigriki leri, loko ri tirhisiwa hi ku gega, ri nga vulaka “ku sula, ku hlantswa, ku dlaya kumbe ku herisa.” Hi ku ya hi swidyondzi swin’wana, mianakanyo leyi nyikeriwaka i ya ku sula marito lama tsariweke hi voko. Xana leswi a swi kotekisa ku yini? Inki leyi a yi tala ku tirhisiwa eminkarhini ya khale a ku ri mpfangano wa khaboni, mafi ya midlulamiti ni mati. Loko munhu a ha ku heta ku tsala hi inki yo tano, a a teka xiponci xo tsakama a sula marito lama tsariweke.

¹¹ Yoleyo i nhlamuselo leyinene ya ku rivalela ka Yehovha hilaha ku heleleke. Loko a hi rivalela swidyoho swa hina, swi fana ni loko a teka xiponci a swi sula. A hi fanelanga hi anakanya leswaku xi ta pfuxa swidyoho swo tano enkarhini lowu taka, hikuva Bibele yi paluxa nchumu wun’wana lowu hlawulekeke swinene malunghana ni ku tsetselela ka Yehovha: Loko a rivalela, wa rivala ha swona!

“A Nḍi Nga Ha Anakanyi Šidyoho Ša V̌ona”

12. Loko Bibele yi vula leswaku Yehovha u rivala swidyoho swa hina, xana swi vula leswaku a swi koteki leswaku a swi tsundzuka, naswona ha yini u hlamurisa sweswo?

¹² Hi ku tirhisa muprofeta Yeremiya, Yehovha u tshembise leswi landzelaka malunghana ni lava nga eka ntwanano lowuntshwa: “Nḍi ta v̌a ṭhikela e ku homboloka ka v̌ona, a nḍi nga ha anakanyi šidyoho ša v̌ona.” (Yeremiya 31:34) Xana leswi swi vula leswaku loko Yehovha a rivalela, a nga ha swi koti ku tsundzuka swidyoho swa kona? Sweswo a swi nge vi tano. Bibele yi hi byela hi swidyoho swa vanhu vo tala lava Yehovha a va rivaleleke, ku katsa na Davhida. (2 Samuwele 11:1-17; 12:1-13) Handle ko kanakana Yehovha wa ha swi tsundzuka swidyoho leswi va swi endleke, naswona na hina hi fanele hi swi tsundzuka. Rhekhodo ya swidyoho swa vona, kun’we ni ya ku hundzuka ka vona ni ku rivaleriwa hi Xikwembu, yi hlayisiwile leswaku yi ta hi pfuna. (Varhoma 15:4) Kutani ke, xana Bibele yi hlamusela yini loko yi vula leswaku Yehovha a nga “anakanyi” swidyoho swa lava a va rivaleleke?

13. (a) I yini lexi katsiwaka eka nhlamuselo ya riendli ra Xiheveru leri hundzuluxeriweke ri va ‘ndzi ta tsundzuka’? (b) Loko Yehovha a ku, “A nḍi nga ha anakanyi šidyoho ša v̌ona,” u hi tiyisekisa hi yini?

¹³ Riendli ra Xiheveru leri hundzuluxeriweke ri va ‘ndzi ta anakanya’ a ri vuli ku tsundzuka leswi hundzeke ntsena. Hi ku ya hi Theological Wordbook of the Old Testament, ri katsa “ni ku teka goza leri faneleke.” Kutani emhakeni leyi, ku ‘anakanya’ xidyoho swi katsa ni ku tekela vadyohi goza. Loko muprofeta Hosiya a vulavula hi Vaisrayele lava xandzukeke a ku, ‘Yehovha u ta tsundzuka xidyoho xa vona,’ muprofeta loyi a a vula leswaku Yehovha u ta va tekela goza hileswi a va nga hundzuki. Xisweswo, xiphemu lexin’wana xa ndzimana leyi xi ri: ‘U ta yisa nyingiso eka swidyoho swa vona.’ (Hosiya 9:9) Hi tlhelo rin’wana, loko Yehovha a ku, “A nḍi nga ha anakanyi šidyoho ša v̌ona,” wa hi tiyisekisa leswaku loko a kala a rivalela mudyohi la hundzukeke, a nge n’wi xupuleli swidyoho sweswo enkarhini lowu taka. (Ezekiyele 18:21, 22) Xisweswo wa rivala hileswi a nga tshameliki ku hi tsundzuxa hi swidyoho swa hina hi xikongomelo xo hi hehla kumbe ku hi xupula hi ku phindha-phindha. Hi ndlela yoleyo Yehovha u hi vekela xikombiso lexinene leswaku hi n’wi tekelela eku hanyisaneni ka hina ni van’wana. Loko ku tshuka ku va ni ku holova, i swinene leswaku u nga pfuxi swidyoho swa nkarhi lowu hundzeke leswi u pfumeleke ku swi rivalela munhu.

Ku Vuriwa Yini Hi Vuyelo Bya Kona?

14. Ha yini ku rivaleriwa swi nga vuli swona leswaku mudyohi la hundzukeke u sirheleriwa eka vuyelo hinkwabyo bya ku dyoha ka yena?

¹⁴ Xana ku tiyimisela ka Yehovha ku rivalela swi vula leswaku mudyohi la hundzukeke u ta pona vuyelo hinkwabyo bya ku dyoha ka yena? Nikatsongo. A hi nge dyohi ivi ku nga vi na vuyelo. Pawulo u tsarile a ku: “Xin’wana ni xin’wana lexi munhu a xi byalaka, ú ta tshovela xona.” (Vagalatiya 6:7) Hi nga langutana ni vuyelo byo karhi bya swiendlo kumbe swiphiqo swa hina, kambe loko Yehovha a hi rivalerile, a nga endli leswaku hi weriwa hi makhombo. Loko ku va ni swiphiqo, Mukreste a nga fanelanga a tibyela a ku, ‘Kumbexana Yehovha wa ndzi xupula hikwalaho ka swidyoho swa nkarhi lowu hundzeke.’ (Ringanisa Yakobo 1:13.) Hi tlhelo rin’wana, Yehovha a nga hi sirheleli eka vuyelo hinkwabyo bya swiendlo swa hina leswi hoxeke. Ku dlaya vukati, makhwiri lama nga laviwiki, vuvabyi lebyi tluletiwaka hi vuxaka bya rimbewu, ku ka u nga ha tshembiwi kumbe ku lahlekeriwa hi xindzhuti—hinkwaswo leswi swi nga va vuyelo lebyi vavisaka bya xidyoho, naswona Yehovha a nge hi sirheleli eka byona. Tsundzuka leswaku hambileswi Yehovha a rivaleleke Davhida swidyoho leswi a swi endleke malunghana na Batixeba na Uriya, a nga n’wi sirhelelanga Davhida eka vuyelo byo biha lebyi landzeleke.—2 Samuwele 12:9-14.

15, 16. Nawu lowu tsariweke eka Levhitika 6:1-7 a wu n’wi pfuna njhani la dyoheriweke kun’we ni mudyohi?

¹⁵ Ni swidyoho swa hina swi nga va ni vuyelo byin’wana. Hi xikombiso, xiya rungula leri nga eka Levhitika ndzima 6. Laha Nawu wa Muxe wu hlamusela hi xiyimo xa ku va munhu a endla xidyoho lexikulu hi ku teka tinhundzu ta Muisrayele-kulobye hi ku yiva, ku dyelela kumbe vukanganyisi. Endzhaku mudyohi u vula leswaku a nga na nandzu, a tlhela a va ni ntiya-nhlana wo hlambanya hi mavunwa. Ku kombaniwa hi tintiho kambe ku nga ri na vumbhoni. Hambiswiritano, endzhaku mudyohi u karhatiwa hi ripfalo ivi a phofula xidyoho xakwe. Leswaku a rivaleriwa hi Xikwembu, u fanele a endla swilo swin’wana swinharhu: a tlherisa leswi a swi tekeke, a hakela loyi a n’wi dyoheleke hi ndziho wa tiphesente ta 20, kutani a nyikela khuna ri va gandzelo ra nandzu. Kutani nawu wu ri: “E muprista o ta ṅwi phahlela mhamba e mahlweni ka Yehova, kutani o ta riv̌aleriwa.”—Levhitika 6:1-7; ringanisa Matewu 5:23, 24.

¹⁶ Nawu lowu a ku ri lunghiselelo ra Xikwembu ra ntsetselelo. A ri pfuna loyi a dyoheriweke, loyi nhundzu yakwe a yi vuyisiwa, naswona handle ko kanakana a a ntshunxeka swinene emoyeni loko mudyohi a hetelela a pfumele xidyoho xakwe. Hi nkarhi lowu fanaka, nawu a wu pfuna loyi ripfalo ra yena eku heteleleni ri n’wi susumeteleke ku pfumela nandzu wakwe ivi a lulamisa xihoxo xakwe. Kunene, loko a a lo ala ku endla tano, Xikwembu a xi nga ta n’wi rivalela.

17. Loko van’wana va vavisiwile hi swidyoho swa hina, Yehovha u langutele leswaku hina hi endla yini?

¹⁷ Hambileswi hi nga riki ehansi ka Nawu wa Muxe, wu hi pfuna swinene ku twisisa mianakanyo ya Yehovha, ku katsa ni vonelo rakwe hi ku rivalela. (Vakolosa 2:13, 14) Loko van’wana va vavisiwile kumbe va kanganyisiwile hi swidyoho swa hina, Yehovha wa tsaka loko hi endla leswi hi nga swi kotaka, hi ‘lulamisa leswi hoxeke.’ (2 Vakorinto 7:11) Leswi swi katsa ku pfumela swidyoho swa hina, hi amukela nandzu wa hina, hambi ku ri ku kombela ku rivaleriwa eka loyi hi n’wi dyoheleke. Kutani hi nga khongela eka Yehovha exisekelweni xa gandzelo ra Yesu, ivi hi tlhela hi va ni ripfalo lerinene ni ku tiyiseka leswaku Xikwembu xi hi rivalerile.—Vaheveru 10:21, 22.

18. I ndzayo yihi leyi nga fambisanaka ni ku rivalela ka Yehovha?

¹⁸ Ku fana ni mutswari wihi ni wihi la nga ni rirhandzu, Yehovha a nga hi rivalela a tlhela a hi laya hi ndlela yo karhi. (Swivuriso 3:11, 12) Mukreste la hundzukeke a nga ha boheka ku lahlekeriwa hi lunghelo ra yena ro va nkulu, nandza wa vutirheli kumbe phayona. Swi nga n’wi vavisa ku lahlekeriwa nkarhi wo karhi hi malunghelo lawa a ya ri ya risima eka yena. Hambiswiritano, ku layiwa hi ndlela yoleyo a swi vuli swona leswaku Yehovha a nga ha n’wi tsakeli kumbe Yehovha a nga n’wi rivalelanga. Tlhandla-kambirhi, hi fanele hi tsundzuka leswaku ndzayo ya Yehovha i xikombiso xa leswaku wa hi rhandza. Ku yi amukela ni ku yi tirhisa swi pfuna hina naswona swi nga hi yisa evuton’wini lebyi nga heriki.—Vaheveru 12:5-11.

19, 20. (a) Loko u dyohile, ha yini u nga fanelanga u anakanya leswaku a swi nge koteki leswaku Yehovha a ku tsetselela? (b) Ku ta hlamuseriwa yini eka xihloko lexi landzelaka?

¹⁹ Swa phyuphyisa swonghasi ku tiva leswaku hi tirhela Xikwembu lexi ‘tiyimiseleke ku rivalela’! Yehovha a nga languti swidyoho ni swihoxo swa hina ntsena. (Pisalema 130:3, 4) U tiva ni leswi nga etimbilwini ta hina. Loko u tshoveke mbilu naswona u ri enhlomulweni hikwalaho ka swidyoho swa nkarhi lowu hundzeke, u nga tibyeli leswaku a swi nge koteki leswaku Yehovha a ku tsetselela. Ku nga khathariseki swihoxo leswi u nga ha vaka u swi endlile, loko u hundzukile hakunene, u teke magoza yo swi lulamisa, kutani u khongela eka Yehovha hi mbilu hinkwayo leswaku a ku rivalela exisekelweni xa ngati ya Yesu leyi halatiweke, u nga tiyiseka swinene leswaku marito ya 1 Yohane 1:9 ma tirha eka wena: “Loko hi tivula swidyoho swa hina, Xikwembu xa tshembeka, xi avanyisa hi ku lulama, kutani xi ta hi rivalela swidyoho swa hina, xi hi hlantswa xi susa ku homboloka ka hina hinkwako.”

²⁰ Bibele yi hi khutaza ku tekelela ndlela leyi Yehovha a rivalelaka ha yona eku hanyisaneni ka hina. Kambe xana hi languteriwe ku rivalela ni ku rivala ku fikela kwihi loko van’wana va hi dyohela? Leswi swi ta hlamuseriwa exihlokweni lexi landzelaka.

[Nhlamuselo ya le hansi]

A Wu Ta Hlamurisa Ku Yini Ke?

◻ Ha yini Yehovha a “tiyimisele ku rivalela”?

◻ Bibele yi swi hlamusela njhani leswaku Yehovha u rivalela hilaha ku heleleke?

◻ Loko Yehovha a rivalela, xana u rivala hi mukhuva wihi?

◻ Yehovha u langutele leswaku hina hi endla yini loko van’wana va vavisiwile hi swidyoho swa hina?

[Xifaniso lexi nga eka tluka 12]

Loko van’wana va vavisiwile hi swidyoho swa hina, Yehovha u langutele leswaku hi lulamisa timhaka