Xiviko Xa Vahuweleri Va

Mfumo Vantshwa Va Dzunisa Xikwembu Edemocratic Republic Of Congo

MALEMBE-XIDZANA lama hundzeke, mupisalema hi musa u rhambe vantshwa ku hlanganyela eku dzuniseni ka Hosi ya hilaha ku nga heriki a ku: “Madžaha ni v̌anhwana, ŝikoša ni v̌ana! . . . ḍunis[ani] v̌ito ra Yehova! Hikuv̌a v̌ito ra yena hi rona ntsena le’ri tlakukeke.” (Pisalema 148:12, 13) Mintokoto leyi landzelaka leyi humaka le Democratic Republic of Congo yi kandziyisa lunghelo leri leri nga ringanisiwiki ni nchumu.

• N’wini wa ndhawu leyi phayona ro hlawuleka a ri tshama eka yona u tsakisiwe swinene hi mahanyelo ya Timbhoni ta Yehovha. Xisweswo u pfumelele Timbhoni ku dyondza Bibele ni n’wana wa yena wa nhwanyana wa malembe ya ntlhanu hi vukhale, ku nga Fifi. Endzhaku ko xiya nhluvuko wa Fifi loko a dyondza Buku Yanga Ya Timhaka Ta Bibele,a tata wa yena u n’wi pfumelele ku ya eminhlanganweni eHolweni ya Mfumo. Fifi u fike a dyondza tinsimu ta Mfumo ebukwini ya tinsimu ya Timbhoni. A a rhandza ngopfu risimu 4, leri nge “Xitshembiso Xa Xikwembu Xa Paradeyisi.”

Siku rin’wana tata wa Fifi u anakanye ku famba na yena ekerekeni ya yena. Lexi hlamariseke un’wana ni un’wana, Fifi u ale ku yimbelela tinsimu ta kereke. Ha yini? Hikuva a vona onge tinsimu leti yimbeleriwaka ekerekeni ya tata wa yena a ti nga pfumelelani ni leswi a swi dyondzeke edyondzweni ya yena ya Bibele. Ematshan’weni ya sweswo, hi xivindzi u yimbelele risimu ra yena ra Mfumo leri a ri rhandzaka swinene.

Loko varhangeri va kereke va hluleke ko talanyana ku cinca mianakanyo ya yena, va fikelele xiboho xa ku hlongola Fifi wa malembe ya ntlhanu! Hambileswi n’wana loyi a khomiweke hi ndlela leyi, tata wa yena u miyerile. A a tibuma hi leswi Fifi a yimeke a tiyile eka leswi a a pfumela eka swona. Tata wa Fifi na mana wa yena va lava leswaku a ya emahlweni a hlanganyela ni Timbhoni ta Yehovha.

• Loko jaha ra kondlo-a-ndzi-dyi leri vuriwaka Lukodi ri anakanye ku dyondza Bibele ni Timbhoni ta Yehovha, tata wa rona u ri kanete swinene. Siku rin’wana loko Lukodi a tilunghiselela ku ya enhlanganweni eHolweni ya Mfumo, tata wa yena u n’wi xungete hi banga. Siku rin’wana tata wa Lukodi u n’wi be hi nhonga, a n’wi siya ni mbanga leyikulu enhlaneni wa yena. Ku nga khathariseki ku kanetiwa lokukulu, Lukodi u yime a tiyile eka xiboho xa yena xo va un’wana wa Timbhoni ta Yehovha. U ye emahlweni a endla nhluvuko ivi a khuvuriwa. Sweswi i phayona ra nkarhi hinkwawo.

Sona, ndzisana ya xisati ya Lukodi, u tsakisiwe swinene hi ku yima ka buti wa yena a tiyile lerova na yena a sungula ku dyondza Bibele ni Timbhoni ta Yehovha. Hambiswiritano, leswaku a n’wi sivela ku dyondza, tata wa vona u rhumele Sona exikolweni xa le ximutanini xin’wana, laha a ku nga ri na Timbhoni. Hambiswiritano, Sona u titolovete ku vulavula ni van’wana hi swilo leswi a swi dyondzeke. Hikwalaho ka sweswo, makwavo wa yena u sungule ku tsakela.

Loko Timbhoni ta le ximutanini xa le kusuhi ti twe hi ntirho wo chumayela wa Sona, ti n’wi endzerile ivi ti hlela leswaku a va ni dyondzo ya Bibele ya le kaya ya nkarhi na nkarhi. U ye emahlweni a endla nhluvuko ivi hi ku hatlisa a joyina buti wa yena a va Mbhoni ya Yehovha leyi tinyiketeleke ni ku khuvuriwa. Ku engetela kwalaho, xaka rin’wana ra yena sweswi i muhuweleri la nga khuvuriwangiki naswona se ku ni dyondzo ya buku eximutanini lexi.

Wa nga vona ndlela leyi swi tsakisaka ha yona ni ku phyuphyisa loko vantshwa va hlanganyela eku dzuniseni ka vito ra Yehovha!

[Nhlamuselo ya le hansi]