A Hi Hexe

1-2. (a) Hikwalahokayini hi vula leswaku a hi langutani ni miringo hi ri hexe? (b) Hi ta bula hi yini eka nhlokomhaka leyi?

LOKO hi langutane ni miringo leyikulu, hi nga ha titwa onge hi lahlekile ekhwatini leri tlhumeke swinene naswona a ku na munhu loyi a nga ta hi pfuna ku huma eka rona. Hambiswiritano, Tata wa hina wa le matilweni loyi a nga ni rirhandzu wa swi vona loko hi ri emaxangwini naswona u tshembisa ku hi pfuna, hi yona mhaka a hi hexe loko hi langutane ni miringo. Yehovha u tiyisekisa malandza yakwe yo tshembeka a ku: “Ndzi ta ku pfuna.”—Esa. 41:10.

² Eka nhlokomhaka leyi hi ta bula hi ndlela leyi Yehovha a hi pfunaka hayona hi ku va (1) a hi kongomisa, (2) a hi khathalela, (3) a hi sirhelela ni (4) ku hi chavelela. Yehovha wa hi tiyisekisa leswaku hambiloko ho langutana na yini evuton’wini, a nge pfuki a hi tshikile. Hikwalaho a hi hexe.

YEHOVHA WA HI KONGOMISA

3-4. Xana Yehovha u hi kongomisa njhani? (Pisalema 48:14)

³ Hlaya Pisalema 48:14. Yehovha a nga langutelanga leswaku hi ti kongomisa. Xana u va kongomisa njhani vagandzeri vakwe vo tshembeka namuntlha? U tirhisa Bibele. (Ps. 119:105) Hi ku tirhisa Rito rakwe leri huhuteriweke, Yehovha u hi pfuna leswaku hi endla swiboho swa vutlhari ni ku tlhela hi va ni vumunhu lebyi nga ta endla hi tsaka swinene sweswi ni le nkarhini lowu taka.a Hi xikombiso, u hi dyondzisa leswaku hi tshika xikhomela, hi tshembeka eka swilo hinkwaswo ni ku tlhela hi rhandzana hi mbilu hinkwayo. (Ps. 37:8; Hev. 13:18; 1 Pet. 1:22) Loko hi va vanhu vo tano, hi ta va vanhu lavanene eka vana va hina, lava hi tekaneke na vona ni le ka vanghana va hina.

⁴ ERitweni rakwe Yehovha u tlhele a endla leswaku ku katsiwa ni vanhu lava a va titwa ku fana na hina naswona va langutaneke ni miringo yo fana ni ya hina. (1 Kor. 10:13; Yak. 5:17) Ku ni tindlela timbirhi leti hi vuyeriwaka hatona loko hi hlaya hi timhaka ta xiviri leti va endlekeleke ni ku tirhisa leswi hi swi dyondzaka. Yo sungula, hi kota ku swi vona leswaku a hi hexe hikuva van’wana na vona va tshame va langutana ni xiyimo lexi fanaka ni ku tlhela va xi tiyisela. (1 Pet. 5:9) Ya vumbirhi, hi dyondza ndlela yo langutana ni miringo ya hina.—Rhom. 15:4.

5. Yehovha u tirhisa vamani leswaku va hi kongomisa loko hi ri karhi hi famba endleleni leyi yisaka evuton’wini?

⁵ Yehovha u tlhela a tirhisa vamakwerhu leswaku va hi kongomisa.b Hi xikombiso, nkarhi ni nkarhi valanguteri va miganga va endzela mavandlha leswaku va ta hi khutaza. Mimbulavulo ya vona yi hi tiyisa ripfumelo ni ku tlhela yi hi pfuna hi tshama hi ri ni vun’we. (Mit. 15:40–16:5) Nakambe vakulu va tirha hi matimba leswaku va hi pfuna hi tshama hi ri na vuxaka na Yehovha. (1 Pet. 5:​2, 3) Vatswari va pfuna vana va vona leswaku va tshama va ri ni vuxaka lebyinene na Yehovha, va endla swiboho swa vutlhari ni ku va ni vumunhu lebyinene. (Swiv. 22:6) Nakambe vamakwerhu va xisati lava wupfeke va pfuna vamakwerhu va xisati lava ha riki vatsongo hi ku va vekela xikombiso lexinene, va va tsundzuxa ni ku tlhela va va khutaza.—Tito 2:​3-5.

6. Hi fanele hi endla yini leswaku hi vuyeriwa eka ndlela leyi Yehovha a hi kongomisaka hayona?

⁶ Yehovha u hi nyike hinkwaswo leswi hi swi lavaka leswaku a hi kongomisa. Hi nga swi kombisa njhani leswaku ha swi tlangela leswi a hi endleleke swona? Swivuriso 3:​5, 6 yi ri: “Tshemba Yehovha hi mbilu ya wena hinkwayo, u nga titshegi hi ku twisisa ka wena.” Loko hi endla tano, “u ta lulamisa tindlela ta [hina]” leswi vulaka leswaku u ta hi pfuna hi papalata swiphiqo swo tala ivi hi tiphina hi vutomi. Hi ba mandla hi vuyelela leswi Yehovha a hi nyikaka switsundzuxo leswi hi pfunaka naswona swi kombisaka leswaku wa hi rhandza.—Ps. 32:8.

YEHOVHA WA HI KHATHALELA

7. Xana Yehovha u hi khathalela njhani? (Vafilipiya 4:19)

⁷ Hlaya Vafilipiya 4:19. Ku engetela eka leswi Yehovha a swi endlaka leswaku hi tshama hi ri ni vuxaka lebyinene na yena, u tlhela a hi pfuna leswaku hi kuma swakudya, swiambalo ni ndhawu yo tshama. (Mat. 6:33; 2 Tes. 3:12) Hambileswi swi nga swa ntumbuluko ku vilela hi swilo leswi hi swi pfumalaka, Yehovha u hi khutaza leswaku hi nga vileli ku tlula mpimo ha swona. (Mat. 6:25) Hikwalahokayini? Hikuva Tata wa hina a nge pfuki a va tshikile vagandzeri vakwe vo tshembeka loko va lava ku pfuniwa. (Mat. 6:8; Hev. 13:5) Hi nga n’wi tshemba loko a hi byela leswaku u ta hi nyika leswi hi swi pfumalaka.

8. Xana Yehovha u n’wi endlele yini Davhida?

⁸ Ehleketa hi ndlela leyi Yehovha a pfuneke Davhida hayona. Eka malembe yo tika lama Davhida a ma heteke a ri mubaleki, Yehovha u nyike Davhida ni masocha yakwe swilo leswi a va swi lava leswaku va kota ku hanya. Loko a ehleketa hi ndlela leyi Yehovha a n’wi pfuneke hayona eka malembe lawa hinkwawo, u tsale a ku: “A ndzi ri jaha sweswi se ndzi dyuhele, kambe a ndzi si tshama ndzi vona munhu la lulameke a fularheriwa, kumbe vana vakwe va lavana na xinkwa.” (Ps. 37:25) Swi nga endleka na wena u swi vonile evuton’wini bya wena leswaku Yehovha wa ma khathalela malandza yakwe lama tinyiketeleke.

9. Xana Yehovha u va pfuna njhani vanhu vakwe loko va weriwe hi timhangu? (Nakambe vona swifaniso.)

⁹ Yehovha u tlhela a pfuna vanhu vakwe loko va weriwe hi timhangu. Hi xikombiso, loko ku ve ni ndlala enkarhini wa vaapostola vo sungula, Vakreste va le tindhawini to hambanahambana va rhumele mphalalo eka vamakwavo lava a va lava ku pfuniwa. (Mit. 11:​27-30; Rhom. 15:​25, 26) Ninamuntlha vanhu va Xikwembu va endla hilaha ku fanaka. Loko ku va ni mhangu, Yehovha u endla leswaku vanhu vakwe va pfuna vamakwerhu lava weriweke hi timhangu hi swilo swo fana ni swakudya, mati, swiambalo ni vutshunguri. Mitlawa yo aka yi lunghisa makaya ni Tiholo ta Mfumo leti onhakeke. Nakambe malandza ya Yehovha a ma bi mariri loko swi ta emhakeni yo khutaza ni ku chavelela lava lahlekeriweke hi swilo swa vona.c

10-11. U dyondza yini eka ntokoto wa Borys?

¹⁰ Yehovha u tlhela a pfuna ni lava enkarhini wa sweswi va nga n’wi gandzeriki. Hilaha ku fanaka, na hina hi lava tindlela to komba lava nga riki Timbhoni musa. (Gal. 6:10) Loko hi endla sweswo, hi nga kota ku va pfuna leswaku va dyondza swo tala hi hina ni hi Yehovha. Twana leswi endlekeleke Borys loyi a tshamaka eUkraine naswona a nga nhloko ya xikolo. Hambileswi Borys a nga riki Mbhoni ya Yehovha, mikarhi hinkwayo a a va khoma kahle vana lava nga Timbhoni ni ku tlhela a xixima leswi va swi pfumelaka. Loko Borys a ta va a baleke endhawini leyi nyimpi a yi hisa kona a ya endhawini leyi hlayisekeke, vamakwerhu va n’wi pfunile. Hi ku famba ka nkarhi, Borys u ve kona eXitsundzuxweni xa rifu ra Yesu. Loko a tsundzuka leswi endlekeke Borys u ri: “Timbhoni ta Yehovha ti ndzi khathalerile hi tindlela hinkwato naswona ndza ti khensa hikwalaho ka sweswo.”

¹¹ Na hina hi nga tekelela Tata wa hina wa le tilweni loyi a nga ni tintswalo hi ku kombisa lava lavaka ku pfuniwa rirhandzu hambi i va makwerhu kumbe doo! (Luka 6:​31, 36) Hi tshemba leswaku matshalatshala lawa hi ma endlaka yo kombisa vanhu rirhandzu, ma ta endla leswaku eku heteleleni va va vadyondzisiwa va Kreste. (1 Pet. 2:12) Swi nga ri na mhaka leswaku ku va ni vuyelo byihi, hi ta tiphina hi ntsako lowukulu lowu tisiwaka hi ku nyika.—Mit. 20:35.

YEHOVHA WA HI SIRHELELA

12. Yehovha u tshembisa ku sirhelela vanhu vakwe tanihi ntlawa hi ndlela yihi? (Pisalema 91:​1, 2, 14)

¹² Hlaya Pisalema 91:​1, 2, 14. Namuntlha Yehovha u tshembisa ku hi sirhelela eka swilo leswi nga dlayaka vuxaka bya hina na yena. A nge pfuki a pfumelele Sathana leswaku a thyakisa vugandzeri bya ntiyiso. (Yoh. 17:15) Kutani loko “nhlomulo lowukulu” wu sungula, hi nga tiyiseka leswaku Yehovha u ta hetisisa xitshembiso xakwe xo sirhelela vanhu vakwe, hi ku va ponisa ni ku tlhela a va pfuna va va ni ripfumelo leri tiyeke.—Nhlav. 7:​9, 14.

13. Xana Yehovha u hi sirhelela njhani ha un’we wa hina?

¹³ Yehovha u hi sirhelela njhani ha un’we wa hina? Hi ku tirhisa Matsalwa, Yehovha wa hi pfuna leswaku hi hambanisa leswinene eka leswo biha. (Hev. 5:14) Loko hi hanya hi milawu leyi kumekaka eRitweni ra Xikwembu, ha tisirhelela eka swilo leswi nga hi vavisaka. (Ps. 91:4) Nakambe Yehovha u hi sirhelela hi ku tirhisa vandlha. (Esa. 32:​1, 2) Loko hi tshama hi ri ekusuhi ni lava rhandzaka Yehovha swin’we ni milawu yakwe, swi ta hi khutaza naswona hi ta kuma matimba yo lwisana ni mikucetelo yo biha.—Swiv. 13:20.

14. (a) Hikwalahokayini Xikwembu xi nga hi sirheleli eka miringo ya hina hinkwayo? (b) Pisalema 9:10 yi hi tiyisekisa yini? (Nakambe vona nhlamuselo ya le hansi.)

¹⁴ Mikarhi yin’wana Yehovha u sirhelele malandza yakwe ya le nkarhini lowu hundzeke eka makhombo. Hambiswiritano, a a nga endli tano mikarhi hinkwayo. Mikarhi yin’wana hi langutana ni “swiendlakalo leswi nga languteriwangiki.” (Ekl. 9:11) Nakambe Yehovha u pfumelele malandza yakwe leswaku ma xanisiwa hambi ku ri ku dlayiwa leswaku swi ta va erivaleni ku Sathana i muhembi. (Yobo 2:​4-6; Mat. 23:34) Ninamuntlha swa ha ri tano. Hambileswi Yehovha a nga yi susiki miringo ya hina, hi nga tiyiseka leswaku a nge pfuki a va tshikile lava n’wi rhandzaka.d—Ps. 9:10.

YEHOVHA WA HI CHAVELELA

15. Xana xikhongelo, Rito ra Xikwembu ni vamakwerhu swi hi chavelela njhani? (2 Vakorinto 1:​3, 4)

¹⁵ Hlaya 2 Vakorinto 1:​3, 4. Mikarhi yin’wana hi pfa hi va ni gome, hi vilela kumbe hi tshikileleka. Kumbexana sweswi u langutane ni xiyimo lexi ku tshikilelaka naswona xi ku endla u titwa u ri wexe. Xana ku ni loyi a twisisaka ndlela leyi u titwaka hayona? Yehovha wa ku twisisa. Wa “hi [chavelela] emiringweni ya hina hinkwayo” hikuva u twisisa ku vava loku hi ku twaka. Njhani? Loko hi khongela eka Yehovha leswaku a hi pfuna, u hi nyika “ku rhula [kakwe] loku tlulaka ku twisisa hinkwako.” (Filp. 4:​6, 7) Hi tlhela hi chaveleleka loko hi hlaya hi marito ya Yehovha lawa a hi tsaleleke wona eBibeleni. EBibeleni Yehovha u hi byela ndlela leyi a hi rhandzaka hayona, wa hi tlharihisa ni ku hi nyika ntshembo naswona sweswo swa hi tiyisa. Nakambe tinhlengeletano ta vandlha ta hi chavelela hikuva hi hlangana ni vamakwerhu lava hi rhandzaka ni ku tlhela hi twa mimbulavulo ya le Bibeleni leyi khutazaka.

16. U dyondza yini eka ntokoto Nathan na Priscilla?

¹⁶ Twana ntokoto wa Nathan na Priscilla lava tshamaka eUnited States, leswaku u xiya ndlela leyi Yehovha a hi chavelelaka ni ku hi khutaza hayona hi ku tirhisa Rito rakwe. Eka malembe lama hundzeke, va endle xiboho xo rhurhela laha ku nga ni xilaveko lexikulu xa vachumayeri va Mfumo. Nathan u ri: “A hi tiyiseka leswaku Yehovha u ta katekisa xiboho xa hina.” Kambe loko va ri exiavelweni xa vona va langutane ni swiphiqo swa rihanyo ni swa timali. Kutani va boheke ku tlhelela ekaya laha na kona swi fikeke swi va tikela swa timali. Loko va ehleketa hi leswi endlekeke, Nathan u ri: “Ndzi tivutisile leswaku hikwalahokayini Xikwembu xi nga hi katekisanga hilaha a hi ehleketa hakona. Ndzi kale ndzi ehleketa leswaku ku ni swo biha leswi ndzi swi endleke.” Hambiswiritano, hi ku famba ka nkarhi va xiye leswaku Xikwembu a xi nga va tshikanga eka xiyimo lexi a a va ri eka xona. Nathan u ri: “Hi nkarhi wolowo wo tika, Bibele yi fane ni munghana wo tlhariha loyi a a hi khutaza ni ku hi kongomisa. Loko hi anakanyisisa hi ndlela leyi Yehovha a hi pfuneke hayona leswaku hi tiyisela swiphiqo, ku ri na ku va hi karhateka ngopfu hi ndzingo lowu hi langutaneke na wona, swi ta hi pfuna leswaku hi kota ku langutana ni swiphiqo enkarhini lowu taka.”

17. Makwerhu waxisati loyi a vuriwaka Helga u chaveleriwe njhani? (Nakambe vona xifaniso.)

¹⁷ Vamakwerhu va nga endla leswi engetelekeke leswaku va hi chavelela. Hi ndlela yihi? Twana ntokoto wa Helga loyi a tshamaka eHungary. U hete malembe yo tala a ri karhi a langutana ni swiphiqo leswi endleke a titwa a nga pfuni nchumu. Kambe loko a ehleketa hileswi endlekeke u yi vonile ndlela leyi Yehovha a n’wi chaveleleke hayona hi ku tirhisa vamakwerhu evandlheni. U tsale a ku: “Mikarhi hinkwayo Yehovha u ndzi pfunile loko a swi vona leswaku a ndza ha ri ni matimba hikwalaho ka ntirho wa mina wa ku tihanyisa, ku khathalela n’wana wa mina loyi a vabyaka ni miringo yin’wana. Eka malembe lama hundzeke ya 30 a ku vanga na siku ni rin’we laha Yehovha a tsandzekeke ku hetisisa xitshembiso xakwe xo ndzi chavelela. Mikarhi yo tala u ndzi tiyisa hi ku tirhisa vamakwerhu lava vulavulaka na mina hi ndlela ya musa. Nakambe mikarhi yo tala a va ndzi tsalela timeseji, khadi kumbe va ndzi bumabumela hi nkarhi lowu faneleke.”

18. Hi nga va chavelela njhani van’wana?

¹⁸ Hi ni nkateko wo tekelela Xikwembu xa hina hi ku va hi chavelela van’wana. Hi nga swi endla njhani sweswo? Hi ku va yingisela loko va vulavula na hina, hi va lehisela mbilu, hi vulavula kahle na vona ni ku va pfuna hi tindlela tin’wana. (Swiv. 3:27) Hi tikarhatela ku chavelela vanhu hinkwavo lava nga eku xanisekeni ku katsa ni lava nga tirheliki Xikwembu enkarhini wa sweswi. Loko vaakelani va hina va loveriwa, va vabya kumbe va langutana ni swiyimo leswi va tshikilelaka, ha va endzela, hi va yingisela ni ku va hlayela matsalwa ya le Bibeleni lama chavelelaka. Loko hi tekelela Yehovha “Xikwembu xa nchavelelo hinkwawo,” hi ta pfuna vamakwerhu leswaku va tiyisela miringo. Nakambe hi ta pfuna ni vanhu lava nga riki Timbhoni leswaku va hi joyina eka vugandzeri lebyi tengeke.—Mat. 5:16.

YEHOVHA U TA TSHAMA A RI EKUSUHI NA HINA

19. Yehovha u hi endlela yini naswona hi nga n’wi tekelela njhani?

¹⁹ Yehovha wa khathala swinene hi hinkwavo lava n’wi rhandzaka. A nga hi tshiki loko hi langutane ni swiphiqo. Ku fana ni mutswari loyi a khathalelaka n’wana wakwe hileswi a n’wi rhandzaka, Yehovha u khathalela vagandzeri vakwe vo tshembeka. Wa hi kongomisa, wa hi khathalela, wa hi sirhelela ni ku hi chavelela. Hi tekelela Tata wa hina wa le tilweni loyi a nga ni rirhandzu loko hi seketela ni ku khutaza van’wana loko va ri emiringweni. Hi nga tiyiseka leswaku Yehovha u ta tshama a ri ekusuhi na hina hambiloko hi langutana ni mitlhontlho ni swiyimo leswi hi twisaka ku vava. Phela u hi tshembise leswi: “U nga chavi, hikuva ndzi na wena.” (Esa. 41:10) Xitshembiso lexi xa hi tiyisekisa leswaku loko hi ri na Yehovha, a hi nge pfuki hi ve hexe.