Leswi Vito Ra Yehovha Ri Vulaka Swona Eka Yesu

1-2. (a) Xana Yesu u endle yini hi vusiku byo hetelela a nga si dlayiwa? (b) Hi ta hlamula swivutiso swihi eka nhlokomhaka leyi?

A KU ri hi Ravumune nimadyambu hi ti 14 ta n’hweti ya Nisani hi lembe ra 33 C.E., naswona Yesu a ha ku heta ku dya xilalelo ni vaapostola vakwe vo tshembeka ekamareni ra le henhla. Endzhaku ka sweswo, Yesu a a ta xavisiwa, a avanyisiwa, a gweviwa, a xanisiwa ni ku dlayiwa. Loko va hete ku dya, u lele vaapostola vakwe hi ku va khutaza. Loko va nga si hangalaka, Yesu u khongele swi huma embilwini naswona muapostola Yohane u tsale xikhongelo xexo eka Yohane ndzima 17.

² Xana xikhongelo xexo xi hi byela yini hi swilo leswi a swi vilerisa Yesu hi nkarhi wolowo? Xana i yini leswi a swi ri swa nkoka eka yena hi nkarhi lowu a a endla ntirho wakwe loko a ha ri laha misaveni? A hi kambisiseni tinhlamulo ta swivutiso leswi.

“NDZI VA TIVISE VITO RA WENA”

3. Xana Yesu u vule yini hi vito ra Yehovha naswona a a vula yini hi sweswo? (Yohane 17:​6, 26)

³ Loko Yesu a khongela u te: “Ndzi va tivise vito ra wena.” Entiyisweni, u swi vule kambirhi leswaku u tivise vadyondzisiwa vakwe vito ra Yehovha. (Hlaya Yohane 17:​6, 26.) Xana a a vula yini? Xana a a vula leswaku u va byele vito leri a va nga ri tivi? Leswi vadyondzisiwa vakwe a va ri Vayuda, se a va swi tiva leswaku vito ra Xikwembu i Yehovha. Nakambe vito rero ri humelela ka 7 000 eMatsalweni ya Xiheveru. Hikwalaho, Yesu a a nga vulavuli hi vito ra Xikwembu kambe a a vulavula hi n’wini wa vito rero. Leswi se vanhu a va ri tiva vito ra Xikwembu, Yesu u va hlamusele muxaka wa Xikwembu lexi Yehovha a nga xona ku katsa ni swikongomelo swakwe, leswi a swi endleke ni vumunhu byakwe naswona u endle tano hileswi ku nga yena ntsena a n’wi tivaka kahle.

4-5. (a) Hi nga tirhisa xikombiso xihi ku kombisa leswi vulaka swona ku n’wi tiva kahle munhu? (b) Vadyondzisiwa va Yesu va n’wi tive kahle njhani Yehovha?

⁴ Hi lexi xikombiso, a hi nge evandlheni ra wena ku ni nkulu loyi a vuriwaka David loyi ku nga khale u ri karhi u n’wi tiva naswona a nga dokodela ra vuhandzuri. Hiloko siku rin’wana u tsutsumiseriwa exibedlhele hileswi u lavaka mpfuno hi xihatla. Loko u fika exibedlhele, u kuma nkulu luyani loyi a ku pfunaka ivi a ponisa vutomi bya wena. Ndlela leyi sweswi u n’wi tekaka hayona David a yi nge he fani ni le ku sunguleni hikuva eka wena a nga ha ri nkulu ntsena kambe i dokodela leri poniseke vutomi bya wena.

⁵ Hilaha ku fanaka, vadyondzisiwa va Yesu se a va ri tiva vito ra Yehovha. Kambe vito rero ri ve ra nkoka eka vona hileswi Yesu a va pfuneke va tiva Yehovha ku antswa. Hikwalahokayini ri ve ra nkoka eka vona? Hikuva Yesu u n’wi tekelele kwatsaa, Tata wakwe eka hinkwaswo leswi a swi vuleke ni ku swi endla. Hikwalaho, vaapostola va ‘tive’ Yehovha ku antswa hileswi a va yingisela ndlela leyi Yesu a a dyondzisa hayona ni ndlela leyi a a va khoma hayona vanhu.—Yoh. 14:9; 17:3.

“VITO RA WENA LERI U NDZI NYIKEKE RONA”

6. Yehovha u nyike Yesu vito Rakwe hi ndlela yihi? (Yohane 17:​11, 12)

⁶ Eka xikhongelo xakwe, Yesu u khongelele vadyondzisiwa vakwe a ku: “Va sirhelele hikwalaho ka vito ra wena leri u ndzi nyikeke rona.” (Hlaya Yohane 17:​11, 12.) Xana sweswo a swi vula leswaku a a ta vitaniwa Yehovha? Doo! Xiya leswaku loko Yesu a vulavula hi vito ra Yehovha u te “vito ra wena.” Yesu a nga tekelanga Yehovha vito. Xana a a vula yini loko a ku u nyikiwe vito ra Xikwembu? Xo sungula, Yesu a a ri muyimeri tlhelo Muvulavuleri wa Yehovha. U te hi vito ra Tata wakwe ni ku tlhela a endla masingita hi vito rero. (Yoh. 5:43; 10:25) Xa vumbirhi, vito ra Yesu ri vula leswaku “Yehovha i Muponisi.” Hikwalaho, nhlamuselo ya vito ra Yesu yi katsa na vito ra Yehovha.

7. Hikwalahokayini Yesu a kote ku vulavulela Yehovha? Vula xikombiso.

⁷ Hi lexi xikombiso xa mhaka leyi, mufumi a nga rhumela muyimeri wakwe leswaku a n’wi vulavulela. Hikwalaho, marito ya muyimeri ma ni matimba ku fana ni ya mufumi. Hilaha ku fanaka, Yesu u yimele Yehovha naswona u vulavule na vanhu hi ku tirhisa vito ra Yehovha.—Mat. 21:9; Luka 13:35.

8. Hikwalahokayini Yehovha a vule leswaku vito rakwe a ri ri ‘eka’ Yesu hambiloko a nga si ta laha misaveni? (Eksoda 23:​20, 21)

⁸ Leswi Yesu a nga Rito, u ve Muvulavuleri wa Yehovha hi ku va a hundzisa marito ni swiletelo swakwe eka tintsumi ni vanhu. (Yoh. 1:​1-3) Swi nga endleka Yesu a ku ri yena ntsumi leyi Yehovha a yi rhumeke leswaku yi khathalela Vaisrayele loko va ri karhi va famba emananga. Loko Yehovha a byela Vaisrayele leswaku va yingisa ntsumi yoleyo u te: “Hikuva vito ra mina ri le ka yona.”a (Hlaya Eksoda 23:​20, 21.) Yehovha u vule leswi hikuva Yesu hi yena a a n’wi vulavulela naswona hikwalaho ka yena hi kota ku swi vona kahle leswaku Yehovha u lulamile naswona wa kwetsima.

“TATANA, VANGAMISA VITO RA WENA”

9. Xana vito ra Yehovha a ri ri ra nkoka ku fikela kwihi eka Yesu? Hlamusela.

⁹ Hilaha se hi buleke hakona, vito ra Yehovha a ri ri ra nkoka swinene eka Yesu hambiloko a nga si ta emisaveni. Hi yona mhaka swilo hinkwaswo leswi Yesu a swi endleke loko a ri laha misaveni a swi fambisana ni vito ra Yehovha! Loko Yesu a ri ekusuhi ni ku heta ntirho wakwe wa laha misaveni, u kombele Tata wakwe a ku: “Tatana, vangamisa vito ra wena.” Hi ku hatlisa Tata wakwe u hlamule hi rito lerikulu a ri etilweni a ku: “Ndzi ri vangamisile naswona ndzi ta tlhela ndzi ri vangamisa.”—Yoh. 12:28.

10-11. (a) Yesu u ri vangamise njhani vito ra Yehovha? (Nakambe vona xifaniso.) (b) Hikwalahokayini vito ra Yehovha ri fanele ri kwetsimisiwa ni ku basisiwa?

¹⁰ Yesu na yena u vangamise vito ra Tata wakwe. Xana u swi endle njhani sweswo? Ndlela yin’wana leyi a swi endleke hayona sweswo, i ku va a byela vanhu vumunhu byo hlamarisa bya Tata wakwe ni leswi a va endleleke swona vanhu. Kambe ku endla sweswo ntsena a swi nga enelanga. Vito ra Yehovha a ri fanele ri kwetsimisiwa ni ku tlhela ri basisiwa eka swihehlo leswi ri phyarhekiweke swona.b Yesu u kombise ndlela leyi sweswo swi nga swa nkoka hayona loko a dyondzisa valandzeri vakwe xikhongelo lexi dumeke xa le ntshaveni. U te: “Tata wa hina la nga matilweni, vito ra wena a ri kwetsimisiwe.”—Mat. 6:9.

¹¹ Hikwalahokayini vito ra Yehovha a ri fanele ri kwetsimisiwa ni ku basisiwa? Hileswi Sathana Diyavulosi a hembeleke Yehovha Xikwembu ni ku tlhela a n’wi onha vito entangeni wa Edeni. Sathana u vule leswaku Yehovha i muhembi naswona u tsona Adamu na Evha swilo leswinene. (Gen. 3:​1-5) U tlhele a vula leswaku ndlela leyi Yehovha a fumaka hayona a yi nga ri yinene. Hi ku kongoma, Sathana a a onha Yehovha vito. Hi ku famba ka nkarhi, u endle tano ni le mikarhini ya Yobo hi ku vula leswaku lava gandzelaka Yehovha va endla tano ntsena hileswi va lavaka ku vuyeriwa. Mulumbeti yoloye u tlhele a ya emahlweni a vula leswaku a ku na munhu loyi a rhandzaka Yehovha lerova a nga swi kota ku ya emahlweni a N’wi gandzela loko a ri emiringweni. (Yobo 1:​9-11; 2:4) A swi lava nkarhi leswaku swi ta va erivaleni ku i mani a hembaka exikarhi ka Yehovha na Sathana.

“NDZI NYIKELA VUTOMI BYA MINA”

12. Yesu a a tiyimisele ku endla yini hikwalaho ka leswi a rhandzaka vito ra Yehovha?

¹² Leswi Yesu a rhandzaka Yehovha, a a lava ku endla hinkwaswo leswi a nga swi kotaka leswaku a kwetsimisa ni ku basisa vito ra Yehovha. Yesu u te: “Ndzi nyikela vutomi bya mina.” (Yoh. 10:​17, 18) A a tiyimisele hambi ku ri ku fela vito ra Yehovha.c Vanhu vambirhi lava a va hetisekile ku nga Adamu na Evha va jikele Yehovha ivi va yima na Sathana. Ku hambana na vona, Yesu a a tiyimisele ku ta emisaveni leswaku a ta kombisa ndlela leyi a n’wi rhandzaka hayona Yehovha. Yesu u yingise Yehovha eka hinkwaswo leswi a swi endleke ni ku swi vula. (Hev. 4:15; 5:​7-10) U tshame a tshembekile ku fikela loko a fa emhandzini ya nxaniso. (Hev. 12:2) Hi ndlela yoleyo, u kombise leswaku u rhandza Yehovha ni Vito rakwe.

13. Hikwalahokayini Yesu a a ri exiyin’weni lexinene xo kombisa leswaku Sathana i muhembi? (Nakambe vona xifaniso.)

¹³ Ndlela leyi Yesu a hanyeke hayona yi swi veke erivaleni leswaku Sathana i muhembi lonkulu ku nga ri Yehovha! (Yoh. 8:44) A ku na munhu un’wana loyi a tivaka Yehovha ku antswa ku tlula Yesu. Loko ku ve eka swihehlo swin’wana leswi Sathana a a hehla Yehovha ha swona a ku ri ntiyiso, Yesu a a ta va a swi tivile. Kambe Yesu a a tiyimisele ku yimela Yehovha ni ku basisa vito rakwe eka swihehlo swa Sathana. Hambiloko swi vonaka onge ku ve ni nkarhi lowu Yehovha a n’wi lahleleke mavoko, Yesu a a tiyimisele hambi ku ri ku fa ku ri ni ku va a jikela Tata wakwe loyi a nga ni rirhandzu.—Mat. 27:46.d

“NDZI . . . HET[E] NTIRHO LOWU U NDZI NYIKEKE WONA”

14. Yehovha u n’wi katekise njhani Yesu hileswi a tshameke a tshembekile?

¹⁴ Loko Yesu a khongela hi vusiku byo hetelela a nga si dlayiwa u te: “Ndzi . . . het[e] ntirho lowu u ndzi nyikeke wona.” A a tshemba leswaku Yehovha u ta n’wi katekisa loko a tshama a tshembekile naswona Tata wakwe a nga n’wi khomisanga tingana. (Yoh. 17:​4, 5) Nakambe Yehovha a nga n’wi tshikanga hilaha ku nga heriki esirheni. (Mit. 2:​23, 24) U n’wi pfuxile ni ku tlhela a n’wi nyika xikhundlha lexi tlakukeke etilweni. (Filp. 2:​8, 9) Hi ku famba ka nkarhi, Yesu u sungule ku fuma tanihi Hosi ya Mfumo wa Xikwembu. I yini leswi Mfumo wolowo wu nga ta swi endla? Xiphemu xa vumbirhi xa xikhongelo xa Yesu lexi dumeke xi hi byela leswi Mfumo wolowo wu nga ta swi endla, xi ri: “Mfumo wa wena a wu te. Ku rhandza ka [Yehovha] a ku endleke emisaveni, hilaha ku endlekaka hakona ematilweni.”—Mat. 6:10.

15. I yini swin’wana leswi Yesu a nga ta swi endla?

¹⁵ Ku nga ri khale, Yesu u ta lwa ni valala va Xikwembu ni ku tlhela a lovisa vanhu vo homboloka hi nkarhi wa Armagedoni. (Nhlav. 16:​14, 16; 19:​11-16) Endzhakunyana ka sweswo, u ta lahlela Sathana “ekheleni ro enta” naswona swi ta fana ni loko a file. (Nhlav. 20:​1-3) Yesu u ta endla leswaku ku tlhela ku va ni ku rhula ni leswaku vanhu va nga ha vi na xidyoho hi nkarhi wa ku Fuma kakwe ka Gidi ra Malembe. U ta pfuxa lava feke ni ku endla misava hinkwayo yi va paradeyisi. Xikongomelo xa Yehovha xi ta va xi hetisekile.—Nhlav. 21:​1-4.

16. Vutomi byi ta va njhani loko ku hela Malembe ya Gidi ya ku Fuma ka Kreste?

¹⁶ Hi nga langutela leswaku ku endleka yini loko ku hela Malembe ya Gidi ya ku Fuma ka Kreste? Xidyoho xi ta va xi nga ha ri kona naswona vanhu va ta va va hetisekile. Hikwalaho ka sweswo, a swi nge he lavi leswaku vanhu va kombela ku rivaleriwa swidyoho hi ku tirhisa nkutsulo naswona a va nge he lavi muhlanganisi kumbe muprista loyi a nga ta va kombelela ku rivaleriwa. Nakambe “nala wo hetelela ku nga rifu [leri vangiweke hi Adamu], u ta [va a herisiwile].” A ku nge he vi na masirha hikuva vafi va ta pfuxiwa. Vanhu hinkwavo a va nge he vi na xidyoho.—1 Kor. 15:​25, 26.

17-18. (a) Ku ta endleka yini endzhaku ka Mfumo wa Kreste wa Gidi ra Malembe? (b) Yesu u ta endla yini loko ku hela nkarhi wa ku fuma ka yena? (1 Vakorinto 15:​24, 28) (Nakambe vona xifaniso.)

¹⁷ Ku ta endleka yini swin’wana loko ku hela Malembe ya Gidi ya ku Fuma ka Kreste? Ku ta endleka nchumu wun’wana wo hlawuleka swinene. Nkwetlembetano lowu nga kona loko swi ta eka ku kwetsimisiwa ka vito ra Yehovha wu ta hela. Njhani? Entangeni wa Edeni, Sathana u vule leswaku Yehovha i muhembi naswona u fuma vanhu hi ndlela yo biha. Ku sukela kwalaho, vito rakwe a ro kwetsimisiwa ntsena hi vanhu lava n’wi xiximaka. Hikwalaho, loko ku hela ku Fuma Ka Kreste ka Gidi ra Malembe vito ra Yehovha ri ta va ri basisiwe hi ku helela. Ku engetela kwalaho, Tata wa hina wa le tilweni u ta va a swi kombisile hi tindlela hinkwato leswaku wa hi rhandza.

¹⁸ Endzhaku ka Mfumo wa Kreste wa Gidi ra Malembe, vanhu va ta swi tiva leswaku leswi Sathana a swi vuleke hi Yehovha i mavunwa. Xana Yesu u ta endla yini loko nkarhi wa ku fuma kakwe wu hela? Xana u ta fana na Sathana hi ku va a xandzukela Yehovha? Doo! (Hlaya 1 Vakorinto 15:​24, 28.) Yesu u ta tlherisela Mfumo eka Tata wakwe naswona u ta pfumela ku fumiwa hi Yehovha. Phela ku hambana na Sathana, Yesu u tiyimisele ku tlherisela Yehovha leswi nga swakwe hikwalaho ka leswi a n’wi rhandzaka.

19. Xana vito ra Yehovha ri vula yini eka Yesu?

¹⁹ Yesu u kombise leswaku i muyimeri lonene wa Tata wakwe, hi yona mhaka Tata wakwe a a tiyimisele ku n’wi nyika vito Rakwe. Kutani, xana vito ra Yehovha ri vula yini eka Yesu? Ri vula swilo hinkwaswo eka yena. A a tiyimisele ku ri fela naswona u ta tiyimisela ku tlherisela swilo hinkwaswo eka Yehovha loko ku hela Malembe ya Gidi ya ku Fuma kakwe. Xana hi nga n’wi tekelela njhani Yesu? Hi ta bula hi nhlamulo ya xivutiso lexi eka nhlokomhaka leyi landzelaka.