NHLOKOMHAKA LEYI DYONDZIWAKA YA VU 23
RISIMU 2 Yehovha I Vito Ra Wena
Leswi Vito Ra Yehovha Ri Faneleke Ri Vula Swona Eka Hina
“‘N’wina mi timbhoni ta mina,’ ku vula Yehovha.”—ESA. 43:10.
LESWI HI NGA TA SWI DYONDZA
Hi ta dyondza hileswi hi faneleke hi swi endla leswaku hi kwetsimisa ni ku basisa vito ra Yehovha eka swihehlo hinkwaswo leswi ri thyakisiweke ha swona.
1-2. Hi swi tiva njhani leswaku vito ra Yehovha i ra nkoka swinene eka Yesu?
VITO ra Yehovha i ra nkoka swinene eka Yesu hikuva a ku na munhu loyi a tiviseke vanhu vito ra Tata wakwe ku tlula yena. Hilaha hi dyondzeke hakona eka nhlokomhaka leyi hundzeke, Yesu a a tiyimisele ku fela vito ra Yehovha ni leswi ri yimelaka swona. (Mar. 14:36; Hev. 10:7-9) Nakambe endzhaku ka Mfumo wakwe wa Gidi ra Malembe, Yesu u ta tiyimisela ku tlherisela vulawuri hinkwabyo lebyi a nyikiweke byona leswaku ku kwetsimisiwa vito ra Yehovha. (1 Kor. 15:26-28) Nakambe ndlela leyi Yesu a rhandzaka vito ra Xikwembu hayona yi kombisa swo tala hi vuxaka lebyi a nga na byona ni Tata wakwe. Yi tlhela yi kombisa leswaku Yesu u n’wi rhandza swinene munhu loyi a yimeriwaka hi vito rero.
2 Yesu u te emisaveni hikwalaho ka vito ra Tata wakwe. (Yoh. 5:43; 12:13) Nakambe u byele valandzeri vakwe vito ra Tata wakwe. (Yoh. 17:6, 26) Ku engetela kwalaho, u tlhele a dyondzisa ni ku endla masingita hi vito rero. (Yoh. 10:25) Entiyisweni, Yesu u kombele Yehovha leswaku a sirhelela vadyondzisiwa vakwe ‘hikwalaho ka vito ra Yena.’ (Yoh. 17:11) Hikwalaho, loko ku ve vito ra Yehovha a ri ri ra nkoka swinene eka Yesu hi ndlela yoleyo, xana swi nga kotekisa ku yini leswaku munhu loyi a tivulaka mulandzeri wa ntiyiso wa Kreste a nga ri tivi kumbe ku ri tirhisa vito ra Tata wakwe?
3. Hi ta bula hi yini eka nhlokomhaka leyi?
3 Leswi hi nga Vakreste lava tekelelaka Yesu, vito ra Tata wakwe i ra nkoka ni le ka hina. (1 Pet. 2:21) Eka nhlokomhaka leyi, hi ta vona leswaku hikwalahokayini Yehovha a va nyike vito rakwe vanhu lava chumayelaka “mahungu . . . lamanene ya Mfumo.” (Mat. 24:14) Hi ta tlhela hi bula hileswi vito ra Yehovha ri faneleke ri vula swona eka hina hi ku kongoma.
“VANHU VA VITO RA XONA”
4. (a) Xana Yesu u va byele yini vadyondzisiwa vakwe loko a nga si tlhelela etilweni? (b) Ku va na xivutiso xihi hikwalaho ka xileriso xa Yesu?
4 Loko Yesu a nga si tlhelela etilweni, u byele vadyondzisiwa vakwe a ku: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema, etikweni hinkwaro ra Yudiya ni le Samariya ni ku ya fika emakumu ka misava.” (Mit. 1:8) Hikwalaho, mahungu lamanene a ma ta chumayeriwa ni le tindhawini tin’wana ku nga ri eIsrayele ntsena. Hi ndlela yoleyo, vanhu lava humaka ematikweni hinkwawo a va ta kuma njombo yo va valandzeri va Yesu. (Mat. 28:19, 20) Xiya leswaku Yesu u te: “Mi ta va timbhoni ta mina.” Xana a a swi ta lava leswaku vadyondzisiwa lava lavantshwa va tiva vito ra Yehovha kumbe a vo to va timbhoni ta Yesu swi helela kwalaho? Swilo leswi hlamuseriweke eka Mitirho ndzima 15 swi hi pfuna ku hlamula xivutiso xexo.
5. Vaapostola ni vakulukumba eYerusalema va swi kombise njhani leswaku vanhu hinkwavo va fanele va tiva vito ra Yehovha? (Nakambe vona xifaniso.)
5 Hi 49 C.E., vaapostola ni vakulukumba eYerusalema va hlanganile leswaku va bula hileswi vanhu lava nga riki Vayuda naswona va nga yimbangiki va faneleke va swi endla leswaku va ta va Vakreste. Loko va gimeta nhlengeletano yoleyo, Yakobo makwavo wa Yesu hi manana u vule leswi: “[Petro] u hi rungulele ndlela leyi Xikwembu xi tsundzukeke vamatiko hayona ro sungula ni leswaku xi sungule ku tihlawulela vanhu va vito ra xona exikarhi ka vona.” Xana Yakobo a a vulavula hi vito ra mani? Loko a tshaha marito ya muprofeta Amosi, u tlhele a ku: “Leswaku vanhu lava saleke va ta lava Yehovha hi mbilu hinkwayo, swin’we ni vanhu va matiko hinkwawo, vanhu lava vitaniwaka hi vito ra mina, ku vula Yehovha.” (Mit. 15:14-18) Vadyondzisiwa lava lavantshwa a va ta dyondza hi Yehovha ni ku tlhela va ‘vitaniwa hi vito ra yena.’ Leswi swi vula leswaku a va ta vitaniwa hi vito ra Xikwembu ni ku tlhela va tiviwa hi rona.
Eka nhlengeletano leyi huvo leyi fumaka ya le nkarhini wa vaapostola yi veke na yona, vavanuna volavo vo tshembeka va swi xiyile leswaku Vakreste va fanele va va vanhu lava vitaniwaka hi vito ra Xikwembu (Vona ndzimana 5)
6-7. (a) Hikwalahokayini Yesu a tile emisaveni? (b) Hi xihi xivangelo xin’wana xa nkoka swinene lexi endleke leswaku a ta emisaveni?
6 Vito ra Yesu ri vula leswaku “Yehovha I Muponisi” naswona u swi kombisile leswaku hi yena loyi Yehovha a n’wi tirhisaka ku ponisa lava nga ni ripfumelo eka yena. Yesu u te emisaveni leswaku a ta fela vanhu. (Mat. 20:28) U tlhele a endla swi koteka leswaku vanhu va ponisiwa ni ku kuma vutomi lebyi nga heriki hi ku va a nyikela hi nkutsulo.—Yoh. 3:16.
7 Kambe hikwalahokayini a swi lava leswaku vanhu va ponisiwa? Hikwalaho ka leswi endlekeke entangeni wa Edeni. Hilaha hi dyondzeke hakona eka nhlokomhaka leyi hundzeke, vatswari va hina vo sungula ku nga Adamu na Evha va xandzukele Yehovha kutani hi ndlela yoleyo a swa ha kotekanga leswaku vanhu va hanya hilaha ku nga heriki. (Gen. 3:6, 24) Hambiswiritano, ku katseke ni mhaka yin’wana ya nkoka leyi tlulaka ku ponisiwa ka vanhu lava nga ni xidyoho, ku nga ku thyakisiwa ka vito ra Yehovha. (Gen. 3:4, 5) Leswaku vatukulu va Adamu na Evha va ponisiwa, a va fanele va swi tiva leswaku Yehovha a nga na nandzu nileswaku vito rakwe ra kwetsima. Yesu a a ri munhu loyi a fanelekaka kahle ku kombisa leswaku swihehlo sweswo i mavunwa hikuva u yimele Yehovha hi ndlela leyinene ni ku tlhela a endla hinkwaswo leswi a lava leswaku a swi endla.
Xana swi nga kotekisa ku yini leswaku munhu loyi a tivulaka mulandzeri wa ntiyiso wa Kreste a nga ri tivi kumbe ku ri tirhisa vito ra Tata wakwe?
8. I yini leswi lava pfumelaka eka Yesu va faneleke va swi tiva?
8 Hinkwavo lava a va ta va ni ripfumelo eka Yesu, lava katsaka Vayuda ni vanhu lava nga riki Vayuda, a swi ta lava leswaku va n’wi tiva kahle Loyi a va ponisaka ku nga Tata wa Yesu, Yehovha Xikwembu. (Yoh. 17:3) Ku fana na Yesu, na vona a va ta tiviwa hi vito ra Yehovha. Nakambe a va fanele va tiva leswaku hikwalahokayini swi ri swa nkoka ku kwetsimisa vito rolero. A va fanele va tlhela va tiva swilo sweswo leswaku va kota ku ponisiwa. (Mit. 2:21, 22) Hikwalaho, valandzeri hinkwavo va Yesu a va fanele va dyondza hi Yehovha na Yesu. Hi yona mhaka Yesu a gimeteke xikhongelo xakwe lexi nga eka Yohane 17 hi marito lama nge: “Ndzi va tivise vito ra wena naswona ndzi ta ya emahlweni ndzi ri tivisa, leswaku va rhandza van’wana hi ndlela leyi u ndzi rhandzeke hayona leswaku mina na vona hi va ni vun’we.”—Yoh. 17:26.
“MI TIMBHONI TA MINA”
9. Hi nga swi kombisa njhani leswaku vito ra Yehovha i ra nkoka eka hina?
9 Mhaka ya ku kwetsimisiwa ka vito ra Yehovha yi fanele yi va ya nkoka swinene eka valandzeri hinkwavo va Yesu va ntiyiso. (Mat. 6:9, 10) Va fanele va teka vito ra Yehovha ri ri leri tlakukeke eka hinkwawo. Leswaku va endla sweswo va fanele va endla swo karhi. Kambe xana hi nga katseka njhani eku kwetsimiseni ka vito ra Yehovha kumbe eku ri basiseni eka swihehlo leswi Sathana a ri phyarhekeke swona?
10. Esaya 42 ku ya eka 44 yi vulavula hi yini? (Esaya 43:9; 44:7-9) (Nakambe vona xifaniso.)
10 Eka Esaya 42 ku ya eka 44 hi dyondza hi swilo leswi hi nga swi endlaka leswaku hi kwetsimisa vito ra Yehovha. Eka tindzimana leti, Yehovha u kombela vanhu lava nga n’wi gandzeriki leswaku va kombisa ku swikwembu swa vona i swa ntiyiso. U tlhela a vitana timbhoni leswaku ti ta ti ta seketela mhaka ya leswaku swikwembu leswi swi kona. Kambe a ti ti na mhaka yo khomeka!—Hlaya Esaya 43:9; 44:7-9.
Hi kombisa leswaku a ku na Xikwembu xin’wana handle ka Yehovha eka hinkwaswo leswi hi swi vulaka ni ku swi endla (Vona tindzimana 10-11)
11. Hi ku ya hi Esaya 43:10-12, xana Yehovha u byela vanhu vakwe leswaku va endla yini?
11 Hlaya Esaya 43:10-12. Yehovha u byela vanhu vakwe a ku: “Mi timbhoni ta mina, . . . mina ndzi Xikwembu.” Nakambe Yehovha u kombela vanhu vakwe leswaku va hlamula xivutiso lexi nge: “Xana xi kona Xikwembu xin’wana handle ka mina?” (Esa. 44:8) Hikwalaho, hina hi ni nkateko wo hlamula xivutiso xexo. Hi swi kombisa hi marito ni hi swiendlo leswaku Yehovha hi yena ntsena Xikwembu xi ri xin’we xa ntiyiso. Vito rakwe ri tlakukile eka mavito hinkwawo. Hi kombisa leswaku hi rhandza Yehovha ni ku tlhela hi tshembeka eka yena hi ndlela leyi hi hanyaka hayona swi nga ri na mhaka mitlhontlho leyi Sathana a hi tiselaka yona. Hi ndlela yoleyo, hi ni nkateko wo pfuneta ku kwetsimisa vito Rakwe.
12. Xana vuprofeta lebyi nga eka Esaya 40:3, 5 byi hetiseke njhani?
12 Loko hi seketela vito ra Yehovha kumbe ndhuma yakwe hi tekelela Yesu. Esaya u tlhele a profeta leswaku a ku ta ta un’wana loyi a a ta ‘basisa ndlela ya Yehovha.’ (Esa. 40:3) Xana vuprofeta byebyo byi hetiseke njhani? Yohane Mukhuvuri u lunghiselele Yesu ndlela, loyi a teke hi vito ra Yehovha ni ku vulavula hi vito ra Yehovha. (Mat. 3:3; Mar. 1:2-4; Luka 3:3-6) Vuprofeta byebyo byi tlhele byi ku: “Ku vangama ka Yehovha ku ta vonaka.” (Esa. 40:5) Xana ku vonake hi ndlela yihi? Loko Yesu a ta emisaveni u fike a yimela Yehovha kwatsaa, onge hi loko Yehovha a te hi byakwe emisaveni.—Yoh. 12:45.
13. Hi nga n’wi tekelela njhani Yesu?
13 Na hina hi timbhoni ta Yehovha ku fana na Yesu. Hi vitaniwa hi vito ra Yehovha naswona hi byela vanhu hinkwavo hi mitirho yakwe yo hlamarisa. Hambiswiritano, leswaku hi kota ku swi endla kahle leswi, hi fanele hi byela vanhu hi ntirho wa nkoka lowu Yesu a wu endleke eku kwetsimiseni ka vito ra Yehovha. (Mit. 1:8) Yesu i Mbhoni leyikulu ya Yehovha naswona hi fanele hi landzelerisisa mikondzo yakwe. (Nhlav. 1:5) Kambe vito ra Yehovha ri fanele ri vula yini eka un’wana ni un’wana wa hina?
LESWI VITO RA YEHOVHA RI VULAKA SWONA EKA HINA
14. Hilaha Pisalema 105:3 yi vulaka hakona, hi titwa njhani hi vito ra Yehovha?
14 Hi ti ba xifuva hikwalaho ka vito ra Yehovha. (Hlaya Pisalema 105:3.) Yehovha wa tsaka swinene loko hi tibuma hi vito rakwe. (Yer. 9:23, 24; 1 Kor. 1:31; 2 Kor. 10:17) Ku “tibum[a] hi Yehovha” swi vula ku tinyungubyisa hi Yehovha Xikwembu xa hina. Hi swi teka ku ri nkateko ku byela van’wana leswaku Yehovha wa kwetsima ni leswaku u endla swilo swo lulama. Swi nga pfuki swi hi khomise tingana ku byela lava hi tirhaka na vona, lava hi nghenaka na vona xikolo ni vaakelani va hina leswaku hi Timbhoni ta Yehovha. Diyavulosi u lava hi tshika ku byela van’wana hi vito ra Yehovha. (Yer. 11:21; Nhlav. 12:17) Entiyisweni, Sathana ni vaprofeta vakwe va mavunwa va lava vanhu va rivala hi vito ra Yehovha. (Yer. 23:26, 27) Kambe ndlela leyi hi rhandzaka vito ra Yehovha hayona yi endla leswaku hi “tshama [hi] tsakile.”—Ps. 5:11; 89:16.
15. Xana swi vula yini ku vitana vito ra Yehovha?
15 Hi ya emahlweni hi vitana vito ra Yehovha. (Yuw. 2:32; Rhom. 10:13, 14) Ku vitana vito ra Yehovha swi vula swo tala ku tlula ku tiva ni ku tirhisa vito ra Xikwembu. Swi vula ku swi tiva leswaku i Xikwembu xa muxaka muni, hi xi tshemba ni ku titshega hi xona leswaku xi hi pfuna ni ku hi kongomisa. (Ps. 20:7; 99:6; 116:4; 145:18) Hi tlhela hi byela van’wana vito rakwe ni vumunhu byakwe, hi va khutaza leswaku va hundzuka nileswaku va endla swo karhi leswaku va ta amukeriwa hi Yehovha.—Esa. 12:4; Mit. 2:21, 38.
16. Hi nga swi kombisa njhani leswaku Sathana i muhembi?
16 Hi tiyimisele ku xaniseka hikwalaho ka vito ra Yehovha. (Yak. 5:10, 11) Loko hi tshama hi tshembekile hambiloko hi xaniseka hi kombisa leswaku Sathana i muhembi. Enkarhini wa Yobo, Sathana u hehle hinkwavo lava tirhelaka Yehovha a ku: “Munhu u ta humesa hinkwaswo leswi a nga na swona leswaku a ponisa vutomi byakwe.” (Yobo 2:4) Sathana u vule leswaku vanhu va tirhela Yehovha ntsena loko swilo swi va fambela kahle kambe loko swilo swi sungula ku tika va ta n’wi komba xikosi. Yobo loyi a a tshembekile u kombise leswaku xihehlo xexo i mavunwa. Na hina hi na nkateko wo kombisa leswaku swi nga ra na mhaka mitlhontlho leyi Sathana a hi tiselaka yona, a hi nge pfuki hi fularhele Yehovha. Hi nga tiyiseka leswaku Yehovha u ta hi sirhelela hikwalaho ka vito rakwe.—Yoh. 17:11.
17. Hi ku ya hi 1 Petro 2:12, hi yihi ndlela leyi hi nga yisaka ku dzuneka eka vito ra Yehovha?
17 Hi kombisa leswaku hi xixima vito ra Yehovha. (Swiv. 30:9; Yer. 7:8-11) Leswi hi yimelaka Yehovha ni ku tlhela hi vitaniwa hi vito rakwe, hi nga ri dzunisa kumbe hi ri thyakisa. (Hlaya 1 Petro 2:12.) Hikwalaho, hi lava ku endla hinkwaswo leswaku hi dzunisa vito ra Yehovha hi mavulavulelo ni hi ndlela leyi hi tikhomaka hayona. Hi ndlela leyi, hi ta endla leswaku vito rakwe ri dzunisiwa hambileswi hi nga vanhu lava endlaka swihoxo.
18. Hi yihi ndlela yin’wana leyi hi nga swi kombisaka hayona leswaku vito ra Yehovha i ra nkoka eka hina? (Nakambe vona nhlamuselo ya le hansi.)
18 Vito ra Yehovha i ra nkoka swinene ku tlula ni ndhuma ya hina. (Ps. 138:2) Hikwalahokayini mhaka leyi yi ri ya nkoka swinene? Hikuva loko hi endla swilo leswi tsakisaka Yehovha mikarhi yo tala vanhu a va swi tsakeli naswona va nga hi vulavula ku biha.a Yesu a a tiyimisele ku fa rifu ro nyumisa tanihi xigevenga leswaku a kota ku kwetsimisa vito ra Yehovha. ‘A nga vanga na mhaka loko a khomisiwa tingana’ leswi vulaka leswaku a a nga ri na mhaka ni leswi van’wana va swi vulaka hi yena. (Hev. 12:2-4) A a tiyimisele ku endla ku rhandza ka Xikwembu.—Mat. 26:39.
19. U titwa njhani hi vito ra Yehovha naswona hikwalahokayini?
19 Ha tinyungubyisa hi vito ra Yehovha naswona hi titwa hi katekile ku vitaniwa Timbhoni ta Yehovha. Hikwalaho ka sweswo, hi tiyimisele ku tiyisela swihehlo hinkwaswo leswi hi nga ha hehliwaka ha swona. Vito ra Yehovha i ra nkoka swinene ku tlula ni ndhuma ya hina. Hikwalaho, a hi tiyimiseleni ku ya emahlweni hi dzunisa Yehovha swi nga ri na mhaka leswaku Sathana u hi tisela miringo yihi. Loko hi endla tano, hi ta kombisa leswaku vito ra Yehovha i ra nkoka swinene eka hina hilaha ri nga hakona eka Yesu Kreste.
RISIMU 10 Dzunisani Yehovha Xikwembu Xa Hina!
a Hambi ku ri wanuna wo tshembeka Yobo, u karhatekile loko vanghana vakwe vanharhu va n’wi hehla hi ku va munhu wo biha. Eku sunguleni loko a lahlekeriwe hi swilo swakwe hinkwaswo ni ku feriwa hi vana vakwe, “Yobo a nga dyohanga kumbe ku hehla Xikwembu hi swo biha.” (Yobo 1:22; 2:10) Hambiswiritano, loko Yobo a hehliwa hi ku endla swilo swo biha, u “vulavul[e] leswi humeke endleleni.” U karhateke hi ndhuma yakwe ku ri ni ku va a vangamisa vito ra Xikwembu kumbe ndhuma ya xona.—Yobo 6:3; 13:4, 5; 32:2; 34:5.