Ndlela Leyi Yehovha A Hi Pfunaka Hayona Leswaku Hi Tiyisela

1. Hikwalahokayini hi fanele hi tiyisela naswona hi nga tiyiseka hi yini? (1 Petro 5:10)

EMASIKWINI lawa ya makumu, vanhu va Yehovha va fanele va tiyisela. Hi xikombiso, van’wana va vabya, va loveriwa, va kanetiwa hi swirho swa ndyangu kumbe hi mfumo. (Mat. 10:​18, 36, 37) Hikwalaho, tiyiseka leswaku Yehovha u ta ku pfuna u tiyisela ndzingo wun’wana ni wun’wana lowu u langutaneke na wona.—Hlaya 1 Petro 5:10.

2. I mani loyi a hi pfunaka hi tiyisela?

² Ku tiyisela swi vula ku tshama hi tshembekile eka Yehovha ni ku n’wi gandzela hi tsakile hambiloko swilo swi hi fambela ximatsi, hi xanisiwa kumbe loko hi langutane ni ndzingo. A hi nge swi koti ku tiyisela hi matimba ya hina ntsena kambe hi kota ku tiyisela hikwalaho ko pfuniwa hi Yehovha loyi a hi nyikaka “matimba lama tlulaka lama tolovelekeke.” (2 Kor. 4:7) Eka nhlokomhaka leyi, hi ta bula hi swilo swa mune leswi Yehovha a hi nyikeke swona leswaku swi hi pfuna hi tiyisela. Hi ta tlhela hi vona ndlela leyi hi nga swi tirhisaka hayona.

XIKHONGELO

3. Hikwalahokayini swi hlamarisa leswi hi kotaka ku khongela eka Yehovha?

³ Yehovha u hi nyike nyiko ya risima leyi hi pfunaka ku tiyisela. Hikwalaho ka nyiko yoleyo, u endle swi koteka leswaku hi vulavula na yena hambileswi hi nga vadyohi. (Hev. 4:16) Ehleketa hi mhaka leyi: Hi nga khongela eka Yehovha nkarhi wun’wana ni wun’wana hi mhaka yin’wana ni yin’wana. Wa hi twa swi nga ri na mhaka leswaku hi khongela hi ririmi rihi nileswaku hi le kwihi hambiloko hi ri ejele. (Yon. 2:​1, 2; Mit. 16:​25, 26) Nakambe Yehovha wa swi twisisa leswaku hi lava ku vula yini hambiloko hi pfumala marito yo hlamusela ndlela leyi hi titwaka hayona loko hi khongela hikwalaho ka leswi hi karhatekeke. (Rhom. 8:​26, 27) Hakunene xikhongelo i nyiko ya risima!

4. Hikwalahokayini Yehovha a lava hi n’wi kombela leswaku a hi pfuna hi tiyisela?

⁴ ERitweni rakwe, Yehovha u hi tiyisekisa leswaku wa “hi twa loko hi kombela xin’wana ni xin’wana lexi fambisanaka ni ku rhandza ka [ye]na.” (1 Yoh. 5:14) Xana hi nga kombela Yehovha leswaku a hi pfuna hi tiyisela? Ina. Hikuva ku endla tano swi fambisana ni ku rhandza kakwe. Hikwalahokayini hi vula tano? Hikuva loko hi tiyisela miringo, hi nyika Yehovha nkarhi wo hlamula loyi a n’wi tlhontlhaka ku nga Sathana Diyavulosi. (Swiv. 27:11) Ku engetela kwalaho, Bibele yi vula leswaku Yehovha u lava ku “pfuna lava n’wi tshembaka hi mbilu hinkwayo.” (2 Tikr. 16:9) Hikwalaho, hi nga tiyiseka leswaku Yehovha u ni matimba naswona wa swi lava ku hi pfuna hi tiyisela.—Esa. 30:18; 41:10; Luka 11:13.

5. Xikhongelo xi nga hi pfuna leswaku hi va ni ku rhula ka miehleketo hi ndlela yihi? (Esaya 26:3)

⁵ Bibele yi vula leswaku loko hi phofulela Xikwembu hi xikhongelo leswi hi vilerisaka, “ku rhula ka Xikwembu loku tlulaka ku twisisa hinkwako ku ta rindza timbilu ta [hina] ni mianakanyo ya [hina].” (Filp. 4:7) Ehleketa hi leswi sweswo swi vulaka swona. Vanhu lava nga gandzeriki Yehovha va langutana ni swiphiqo naswona va nga ha ringeta tindlela to hambanahambana leti nga va pfunaka leswaku va va ni ku rhula ka mianakanyo. Hi xikombiso, van’wana va ringeta ku susa swilo hinkwaswo emiehleketweni ya vona ku katsa ni leswi va vilerisaka. Kambe ku endla tano swi nga dlaya vuxaka bya hina na Yehovha. (Ringanisa Matewu 12:​43-45.) Ku hambana na vona, ku rhula loku Yehovha a hi nyikaka kona loko hi khongela ku ku tlulela ekule ku rhula loku munhu a nga ringetaka ku ku kuma hi ku va a tshika ku ehleketa hi swilo hinkwaswo. Loko hi khongela eka Yehovha, hi kombisa leswaku ha n’wi tshemba hilaha ku heleleke naswona u hi “nyika ku rhula hi masiku.” (Hlaya Esaya 26:3.) Ndlela yin’wana leyi a endlaka sweswo hayona, i ku hi pfuna hi tsundzuka ntiyiso lowu hi wu dyondzeke eRitweni rakwe. Ntiyiso wolowo wu endla leswaku hi va ni ku rhula hikuva ha swi tiva leswaku Yehovha wa khathala ha hina naswona u lava leswaku swilo swi hi fambela kahle.—Ps. 62:​1, 2.

6. Hi swihi swilo leswi u nga swi katsaka loko u khongela? (Nakambe vona xifaniso.)

⁶ Leswi u nga swi endlaka. Loko u ri karhi u tiyisela miringo, “lahlela ndzhwalo wa wena eka Yehovha” u tlhela u khongelela leswaku a ku nyika ku rhula. (Ps. 55:22) Nakambe khongela u kombela vutlhari byo langutana ni ndzingo wa wena. (Swiv. 2:​10, 11) Ku engetela kwalaho, u nga rivali ku n’wi khensa loko u ri karhi u khongelela leswaku a ku pfuna u tiyisela. (Filp. 4:6) Lavisisa swilo leswi kombisaka leswaku Yehovha u le ku ku seketeleni ivi u n’wi khensa hikwalaho ka swona. Loko u endla tano, u ta kombisa leswaku u yi teka yi ri ya nkoka mikateko leyi Yehovha a ku nyikeke yona.—Ps. 16:​5, 6.

RITO RA XIKWEMBU

7. Xana ku hlaya Bibele swi nga hi pfuna njhani leswaku hi tiyisela?

⁷ Yehovha u hi nyike Rito rakwe leswaku a hi pfuna hi tiyisela. EBibeleni ku ni tindzimana to tala leti hi tiyisekisaka leswaku Yehovha wa hi seketela. Hi lexi xikombiso. Matewu 6:8 yi ri: “Tata wa n’wina wa swi tiva leswi mi swi pfumalaka mi nga si swi kombela.” Yesu u vule marito wolawo naswona u tiva Yehovha ku tlula vanhu hinkwavo. Hikwalaho, a hi na xona xivangelo xo kanakana mhaka ya leswaku Yehovha wa khathala hi hina loko hi ri emaxangwini. Bibele yi ni tindzimana to tala leti hi tiyisekisaka leswaku Yehovha wa hi pfuna loko hi ri emaxangwini.—Ps. 94:19.

8. (a) Vula xikombiso xa nsinya wa nawu wa Bibele lowu nga hi pfunaka leswaku hi tiyisela. (b) I yini leswi nga hi pfunaka hi tsundzuka misinya ya milawu ya Bibele loko hi yi lava?

⁸ Misinya ya milawu ya le Bibeleni yi nga hi pfuna leswaku hi tiyisela. Hikuva yi ni vutlhari lebyi nga hi pfunaka leswaku hi endla swiboho leswinene. (Swiv. 2:​6, 7) Hi xikombiso, Bibele yi hi khutaza leswaku hi vilela hi swa namuntlha ntsena ku ri ni ku vilela ngopfu hileswi nga ha endlekaka mundzuku. (Mat. 6:34) Loko hi titolovete ku hlaya Matsalwa ni ku tlhela hi anakanyisisa hi wona, swi ta hi olovela ku tsundzuka misinya ya milawu loko hi yi lava.

9. Ku hlaya Bibele swi hi pfuna njhani leswaku hi tshemba Yehovha?

⁹ Bibele yi tlhela yi vulavula hi vanhu lava a va tshemba Yehovha naswona a va seketeleke. (Hev. 11:​32-34; Yak. 5:17) Loko hi hlaya hi mhaka ya vanhu volavo, swi ta hi pfuna leswaku hi ya hi tshemba leswaku Yehovha i “vutumbelo ni matimba ya hina, mpfuno lowu kumekaka hi ku hatlisa hi nkarhi wa maxangu.” (Ps. 46:1) Loko hi xiya ndlela leyi malandza ya Yehovha a ma tshembeke hayona, swi ta endla leswaku hi lava ku tekelela ripfumelo ni ku tiyisela ka wona.—Yak. 5:​10, 11.

10. U nga endla yini leswaku u vuyeriwa loko u ri karhi u hlaya Bibele?

¹⁰ Leswi u nga swi endlaka. Hlaya Bibele siku ni siku u tlhela u hlayisa tindzimana leti u vonaka ti ku pfuna. Vo tala va kume leswaku loko va sungula siku hi ku hlaya ndzimana ya siku, swi va pfuna leswaku va anakanyisisa hi leswi va swi hlayeke siku hinkwaro. Makwerhu wa xisati la vuriwaka Mariea u vone sweswo swi n’wi pfuna loko ku kumeka leswaku vatswari va yena va ni khensa. I yini leswi n’wi pfuneke leswaku a tiyisela loko a ri karhi a va khathalela eka tin’hweti ta vona to hetelela? U ri: “Mixo wun’wana ni wun’wana a ndzi hlaya ndzimana ya siku ni ku tlhela ndzi anakanyisisa hi yona. Leswi swi ndzi pfunile leswaku ndzi tshama ndzi ri karhi ndzi anakanyisisa hi Matsalwa ni swilo leswi Yehovha a nga ta ndzi endlela swona, ku ri ni ku va ndzi anakanyisisa hi xiyimo xo tika lexi a ndzi ri eka xona.”—Ps. 61:2.

VAMAKWERHU

11. Hikwalahokayini swi khutaza ku tiva leswaku a hi hexe loko hi ri karhi hi tiyela miringo?

¹¹ Yehovha u hi nyike vamakwerhu leswaku va hi pfuna hi tiyisela. Ku tiva ntsena leswaku “maxangu lama fanaka ma va wela vamakwe[rhu] hinkwavo emisaveni hinkwayo” swa hi tiyisekisa leswaku a hi hexe. (1 Pet. 5:9) Entiyisweni, hi nga tiyiseka leswaku xiyimo xin’wana ni xin’wana lexi hi langutaneke na xona, vamakwerhu na vona va langutane na xona naswona va swi kotile ku xi tiyisela. Hikwalaho, na hina hi nga swi kota ku tiyisela.—Mit. 14:22.

12. Vamakwerhu va nga hi pfuna njhani naswona hina hi nga va endlela yini? (2 Vakorinto 1:​3, 4)

¹² Vamakwerhu va nga hi tiyisa loko hi ri karhi hi tiyisela miringo. Swi ve tano ni le ka muapostola Pawulo. Mikarhi yo tala u va khensile hi mavito vanhu lava n’wi pfuneke loko a pfaleriwile endlwini. Va n’wi chavelerile, va n’wi khutaza ni ku tlhela va n’wi pfuna hileswi a a swi lava. (Filp. 2:​25, 29, 30; Kol. 4:​10, 11) Na hina namuntlha, vamakwerhu va nga hi endlela leswi fanaka. Loko hi lava ku tiyisiwa leswaku hi kota ku tiyisela, vamakwerhu va endla tano naswona loko va lava ku seketeriwa na hina hi endla hilaha ku fanaka.—Hlaya 2 Vakorinto 1:​3, 4.

13. I yini leswi pfuneke makwerhu wa xisati Maya leswaku a kota ku tiyisela?

¹³ Vamakwerhu va n’wi chavelerile swinene makwerhu wa xisati wa le Rhaxiya la vuriwaka Maya. Hi 2020, kaya rakwe ri sechiwile naswona u yisiwe ekhoto hileswi a a byela van’wana leswi a pfumelaka eka swona. Maya u ri: “Hi nkarhi lowu a ndzi nga ri na matimba, vamakwerhu va ndzi fonerile, va ndzi tsalela ni ku tlhela va ndzi tiyisekisa leswaku va ndzi rhandza. Mikarhi hinkwayo a ndzi swi tiva leswaku ndzi ni ndyangu lowukulu lowu nga ni rirhandzu kambe ku sukela hi 2020 ndzi swi vone kahle sweswo.”

14. Hi nga endla yini leswaku hi pfuneka loko vamakwerhu va hi pfuna? (Nakambe vona xifaniso.)

¹⁴ Leswi u nga swi endlaka. Loko u ri karhi u tiyisela xiyimo xo tika, u nga tihambanisi ni vamakwerhu naswona u nga chavi ku kombela mpfuno eka vakulu. Va fana ni “ndhawu yo tumbela eka yona loko ku ri ni moya, ndhawu yo tifihla loko ku ri ni xidzedze.” (Esa. 32:2) Tsundzuka leswaku vamakwerhu na vona va le ku tiyiseleni ka swiyimo swo tika. Loko u va ni musa eka munhu loyi a langutaneke ni swiphiqo, swi ta ku pfuna leswaku na wena u va ni langutelo lerinene ni ku tiyisela ndzingo lowu u langutaneke na wona.—Mit. 20:35.

NTSHEMBO WA HINA

15. Ntshembo wu ma pfune njhani malandza yo tshembeka ku katsa na Yesu? (Vaheveru 12:2)

¹⁵ Yehovha u hi nyike ntshembo lowu tiyeke lowu hi pfunaka leswaku hi tiyisela. (Rhom. 15:13) Ehleketa ndlela leyi ntshembo wu n’wi pfuneke hayona Yesu leswaku a tiyisela siku ro tika swinene loko a ri laha misaveni. (Hlaya Vaheveru 12:2.) Yesu a a swi tiva leswaku loko a tshama a tshembekile a swi ta endla leswaku vito ra Yehovha ri basisiwa eka swihehlo hinkwaswo leswi ri phyarhekiweke swona. Nakambe Yesu a a swi langutele hi mahlongati ku tlhela a va ni Tata wakwe naswona hi ku famba ka nkarhi a a ta fuma ni vatotiwa eMfun’weni wa le tilweni. Hilaha ku fanaka, ntshembo lowu hi nga na wona wa leswaku hi ta hanya emisaveni leyintshwa ya Xikwembu wu hi pfuna leswaku hi tiyisela miringo yin’wana ni yin’wana leyi misava ya Sathana yi hi tiselaka yona.

16. Ntshembo wu n’wi pfune njhani makwerhu un’wana wa xisati leswaku a tiyisela naswona u dyondza yini eka leswi a swi vuleke?

¹⁶ Xiya ndlela leyi ntshembo wo hanya hilaha ku nga heriki wu n’wi pfuneke hayona makwerhu wa xisati wa le Rhaxiya la vuriwaka Alla, loyi nuna wakwe a pfaleriweke ejele loko a ha yimele ku tengisiwa. Loko sweswo swi va endlekela, Alla u te: “Ku anakanyisisa ni ku khongela hi ntshembo wa hina swi ndzi pfunile leswaku ndzi nga heli matimba. Ndza swi tiva leswaku ku nga ri khale, Yehovha u ta swi herisa swilo leswi naswona u ta hlula valala vakwe ivi a hi katekisa.”

17. Hi nga swi kombisa njhani leswaku ha wu tlangela ntshembo lowu hi nga na wona wo hanya hilaha ku nga heriki? (Nakambe vona xifaniso.)

¹⁷ Leswi u nga swi endlaka. Tinyike nkarhi wo ehleketisisa hi vumundzuku byo tsakisa lebyi Yehovha a hi tshembiseke byona. Tivone u ri emisaveni leyintshwa ya Xikwembu ni ku tlhela u anakanyisisa hi mikateko leyi hi nga ta yi kuma. Ndzingo wun’wana ni wun’wana lowu hi langutanaka na wona sweswi wu ta vonaka wu ri “wa nkarhinyana naswona wu [ri] wutsongo.” (2 Kor. 4:17) Nakambe byela van’wana hi ntshembo wa wena. Ehleketa hi swiphiqo leswi va langutanaka na swona hikwalaho ka leswi hi hanyaka emisaveni ya Sathana naswona va nga swi tiveki leswaku Xikwembu xi hi tshembisa yini enkarhini lowu taka. U nga endla leswaku va navela ku tiva swo tala hi ntshembo lowu u nga na wona hambiloko wo bula na vona swa xinkarhana.

18. Hikwalahokayini hi tshemba switshembiso swa Yehovha?

¹⁸ Endzhaku ka loko Yobo a tiyisele miringo yo tala, u byele Yehovha a ku: “Se ndza swi tiva leswaku u kota ku endla swilo hinkwaswo, naswona a wu tsandziwi hi nchumu.” (Yobo 42:2) Hilaha Yobo a dyondzeke hakona, a xi kona lexi nga sivelaka Yehovha leswaku a hetisisa xikongomelo xakwe. Na hina sweswo swi nga hi pfuna leswaku hi kota ku tiyisela. Hi xikombiso, ehleketa hi wansati la heleke matimba hileswi a vabyaka naswona madokodela yo tala ma tsandzekeke ku n’wi tshungula. Kambe loko dokodela leri nga ni ntokoto naswona ri tshembiwaka ri n’wi byela leswaku u khomiwe hi vuvabyi bya njhani ivi ri n’wi hlamusela ndlela leyi ri nga ta n’wi tshungula hayona, u titwa a rhuliwe ndzhwalo hambiloko swa ha ta teka nkarhi leswaku a hola. Sweswi u kota ku tiyisela hileswi a nga ni ntshembo wa leswaku u ta hola. Hilaha ku fanaka, ntshembo lowu hi nga na wona wa ku hanya hilaha ku nga heriki wu hi pfuna leswaku hi tiyisela.

19. Hi fanele hi endla yini leswaku hi kota ku tiyisela?

¹⁹ Hilaha hi swi voneke hakona, Yehovha u hi nyike nyiko ya xikhongelo, Rito rakwe, vamakwerhu ni ntshembo wa hina leswaku a hi pfuna hi tiyisela miringo. Loko hi tirhisa swilo leswi hinkwaswo, Yehovha u ta hi pfuna eka xiyimo xin’wana ni xin’wana xo tika lexi hi nga ha langutanaka na xona kukondza ku fika siku leri swiphiqo leswi vangiwaka hi misava ya Sathana swi nga ta herisiwa ha rona.—Filp. 4:13.