Yehovha U Hi Pfune Leswaku Hi Tsaka Ni Ku Fambisana Na Swiyimo eSwiavelweni Swa Hina

Va ka Kassholms va ye eXikolweni xa Giliyadi hi 1979 naswona emalembeni lawa hinkwawo va averiwe ku ya tirha eIran, Mauritius, Myanmar, Tanzania, Uganda na Zaire. Loko va ri eGiliyadi, va twe mudyondzisi wa vona makwerhu Jack Redford a va nyika xitsundzuxo lexi va pfuneke leswaku va tsaka ni ku fambisana ni swiyimo eka swiavelo swo hambanahambana leswi va swi kumeke. I nge va hi chumbutela hi ta vutomi bya vona.

Mats na Ann-Catrin hi byeleni, mi wu kume njhani ntiyiso?

Mats: Loko ndza ha tshama ePoland hi nkarhi wa Nyimpi ya Vumbirhi ya Misava, bava u vone vukanganyisi byo tala lebyi a byi endliwa hi kereke ya Khatoliki. Nilokoswiritano, a a tala ku vula a ku, “Ntiyiso wu fanele wu ri kona kun’wana.” Hi ku famba ka nkarhi, ndzi swi xiyile leswaku hakunene a wu ri kona. Ndzi xave tibuku to tala leti tshameke ti tirhisiwa naswona yin’wana ya tona a ku ri buku ya wasi leyi nge, The Truth That Leads to Eternal Life. Nhlokomhaka ya buku yoleyo yi ndzi koke rinoko naswona ndzi yi hlaye ndzi ku yi bii, hi siku rero. Hi siku leri landzelaka, a ndzi tiyiseka leswaku ndzi kume ntiyiso.

Ku sukela hi April 1972, ndzi hlaye mikandziyiso yo tala ya Timbhoni ta Yehovha naswona sweswo swi ndzi pfunile leswaku ndzi kuma tinhlamulo ta swivutiso leswi a ndzi ri na swona. Ndzi titwe ku fana ni muxavisi wa le xifanisweni xa Yesu, loyi endzhaku ka loko a kume perela yin’we ya risima, a xaviseke swilo hinkwaswo leswi a a ri na swona leswaku a yi xava. Ndzi tshike milorho ya mina ya ku ya dyondzela vudokodela eyunivhesiti leswaku ndzi ta xava “perela” ya ntiyiso leyi ndzi yi kumeke. (Mat. 13:​45, 46) Ndzi khuvuriwe hi ti 10 ta December 1972.

Ku nga si hela lembe, vatswari va mina ni ndzisana ya mina va amukele ntiyiso ivi va khuvuriwa. Kutani hi July 1973, ndzi sungule ntirho wa nkarhi hinkwawo. Eka maphayona lama a ma hiseka evandlheni ra hina, a ku ri na Ann-Catrin loyi a a rhandza Yehovha naswona a a ri ximatsatsa. Hi rhandzanile ivi hi cata hi 1975 naswona eka malembe ya mune lama landzeleke hi tshame eStrömsund, ku nga doroba ro saseka ra le Sweden laha vanhu vo tala a va lava ku dyondza hi Bibele.

Ann-Catrin: Bava u dyondze ntiyiso loko a ri ekusuhi ni ku heta tidyondzo takwe ta le yunivhesiti eStockholm. Hambileswi hi nkarhi wolowo a ndzo va ni tin’hweti tinharhu ntsena, bava a a famba na mina etidyondzweni ni le nsin’wini. Mhani a swi n’wi tsakisanga sweswo naswona u ringete ku kombisa leswaku Timbhoni a ti nga dyondzisi ntiyiso. Kambe u tsandzekile, hikwalaho hi ku famba ka nkarhi na yena u khuvuriwile. Mina ndzi khuvuriwe ndzi ri ni malembe ya 13 naswona ndzi sungule ku phayona ndzi ri ni malembe ya 16. Endzhaku ko tirha eUmeå, laha a ku ri ni xilaveko lexikulu xa vachumayeri va Mfumo, ndzi ve phayona ro hlawuleka.

Endzhaku ka loko mina na Mats hi catile, hi ve ni nkateko wo pfuna vanhu vo hlayanyana va dyondza ntiyiso. Un’wana wa vona a ku ri Maivor, xintombhana lexi tshikeke ku hlongorisa swa mitlangu ivi xi sungula ku phayona ni ndzisana ya mina ya xisati. Hi 1984, va ye eXikolweni xa Giliyadi swin’we naswona sweswi i varhumiwa eEcuador.

I yini leswi mi pfuneke leswaku mi tsaka ni ku tlhela mi fambisana ni swiyimo loko mi ri karhi mi endla swiavelo swa n’wina swo hambanahambana swa vurhumiwa?

Mats: Mikarhi yo tala a hi nyikiwa swiavelo swo hambanahambana. Kambe lexi hi pfuneke hi kota ku tolovelana ni ku cinca koloko, i ku va hi ringeta ku tekelela ku titsongahata ka Yesu. (Kol. 2:​6, 7) Hi xikombiso, Ematshan’wini yo langutela leswaku vamakwerhu va laha a hi phayona kona va cinca ndlela leyi a va endla swilo hayona hikwalaho ka hina, hi dyondze ku endla swilo ku fana na vona. A hi lava ku twisisa ndhavuko wa vona ni ndlela leyi va ehleketaka hayona. Loko hi tekelela Yesu, a hi titwa ku fana ni “murhi lowu byariweke etlhelo ka swinambyana swa mati” hikuva a swi hi olovela ku fambisana ni swiyimo ni ku tlhela hi tsaka eka swiavelo swa hina.—Ps. 1:​2, 3.

Endzhaku ka loko nsinya wu tsuvuriwile laha a wu byariwe kona ivi wu ya byariwa kun’wana, wu lava dyambu leswaku wu kota ku kula. Mikarhi hinkwayo Yehovha u swi kombisile leswaku i “dyambu” ra hina. (Ps. 84:11) U hi nyike vamakwerhu vo tala lava hi kombiseke rirhandzu. Hi xikombiso, evandlheni ra hina leritsongo ra le Tehran, eIran hi kume vamakwerhu lava a va ri ni malwandla naswona va hi tsundzuxeke hi vanhu va le Bibeleni lava kombiseke malwandla. A hi ku rhandza eIran kambe hi July 1980, ntirho wa Timbhoni ta Yehovha wu yirisiwile etikweni rero naswona a hi nyikiwe masiku mambirhi leswaku hi longalonga hi famba. Hi averiwe ku ya eAfrika, etikweni leri vuriwaka Zaire (laha sweswi ku nga Congo).

Loko ndzi twa leswaku hi averiwe ku ya eAfrika, ndzi ririle. Phela a ndzi swi twile leswaku ku ni tinyoka ni mavabyi eAfrika naswona sweswo a swi ndzi chavisa. Kambe vanghana va hina vambirhi lava tshameke va tirha kwalaho va hi byele va ku: “A mi si tshama mi kandziya eAfrika, fambani mi ya tivonela hi n’wexe, mi ta yi rhandza.” Hakunene swi ve tano. Vamakwerhu va kwalaho va ni rirhandzu. Entiyisweni, loko hi fanele hi famba endzhaku ka malembe ya tsevu lama hi ma heteke eZaire hikwalaho ka leswi ntirho a wu yirisiwile, ndzi n’wayiterile hikuva se a ndzi khongela eka Yehovha ndzi ku, “Yehovha hi pfumelele hi tshama kwala.”

Hi yihi mikateko leyi mi yi kumeke eka malembe lawa hinkwawo loko mi ri karhi mi tirhela Yehovha?

Mats: Hi kume vanghana lava nga varhumiwa lava humaka ematikweni yo hambanahambana naswona va nga ni mindhavuko leyi nga faniki. Nakambe eka swiavelo swin’wana a hi tiphina hi ku fambisa tidyondzo ta Bibele to tala. Mikarhi yin’wana, ha un’we wa hina a a fambisa kwalomu ka tidyondzo ta 20. Xin’wana lexi ndzi tshamaka ndzi ri karhi ndzi xi tsundzuka, i malwandla ni rirhandzu ra vamakwerhu va le Afrika. Loko hi endzele mavandlha ya le Tanzania, vamakwerhu vo tala va hi kombe malwandla ni “ku tlula” hi ku va va hi pfumelela leswaku hi paka Kombi ya hina ya Volkswagen (VW) leyi a hi etlela eka yona emakaya ya vona. (2 Kor. 8:3) Swin’wana leswi a hi swi rhandza i nkarhi lowu a hi tivekele wona wo bula hi swilo leswi endlekeke. Sweswo a hi swi endla eku heleni ka siku rin’wana ni rin’wana ivi endzhaku hi khensa Yehovha hileswi a hi seketeleke esikwini rero.

Ann-Catrin: Mina ndzi tsakisiwe ngopfu hi ku va ndzi tshama ni vamakwerhu vo hambanahambana. Hi dyondze tindzimi letintshwa leti katsaka Xifarsi, Xifurwa, Xiluganda na Xiswahili ku katsa ni mindhavuko yo tsakisa yo hambanahambana. Hi pfune vadyondzisiwa lavantshwa, hi kuma vanghana va ntiyiso ni ku tlhela hi tirha “hi mbilu yin’we” na vona entirhweni wa Yehovha.—Sof. 3:9.

Hi tlhele hi vona ni ntumbuluko wo saseka wa Yehovha. Mikarhi hinkwayo loko hi amukela xiavelo lexintshwa, a hi twa onge hi teka riendzo na Yehovha naswona a hi kongomisa. U hi dyondzise swilo leswi a hi nga ta pfuka hi tidyondzise swona.

Hi yihi mitlhontlho leyi mi langutaneke na yona naswona mi yi hlule njhani?

Mats: Emalembeni wolawo, hi khomiwe hi mavabyi yo hambanahambana lama katsaka na malariya naswona hi xitshuketa Ann-Catrin u endliwe vuhandzuri byo hlayanyana. Nakambe a hi vilela hi vatswari va hina lava a va dyuharile kambe ha swi tlangela leswi tindzisana ta hina ti hi pfuneke ku va khathalela. Ti endle tano hi ntsako, ti va lehisela mbilu ni ku tlhela ti va komba rirhandzu. (1 Tim. 5:4) Nilokoswiritano, mikarhi yin’wana a hi karhateka hileswi a hi tsandzeka ku va pfuna hilaha hi lavaka hakona hileswi a hi ri ekule.

Ann-Catrin: Hi 1983 loko hi ri karhi hi tirha eZaire, ndzi lave ku dlayiwa hi cholera. Dokodela u byele Mats a ku, “N’wi humese etikweni leri hi nomu lowu!” Hi xa mundzuku xa kona hi fambe hi xihahampfhuka lexi rhwalaka nhundzu hi ku va a ko va na xona ntsena hi ya eSweden.

Mats: Hi ririle hileswi a hi ehleketa leswaku a hi nge he swi koti ku va varhumiwa. Nilokoswiritano, ku hambana ni leswi dokodela ri swi vuleke Ann-Catrin u horile. Nakambe endzhakunyana ka lembe hi tlhelele eZaire kambe sweswi a hi ya evandlheni leritsongo ra Xiswahili eLubumbashi.

Ann-Catrin: Loko hi ri eLubumbashi ndzi humeriwe hi khwiri. Hambileswi a hi nga tiyimiselanga ku va ni vana, ku loveriwa hi n’wana swi ndzi vavisile swinene. Hambiswiritano, hi nkarhi wolowo wo tika, Yehovha u hi nyike nyiko leyi a hi nga yi langutelanga. Hi sungule ku va ni tidyondzo ta Bibele to tala ku tlula eku sunguleni. Ku nga si hela lembe, nhlayo ya vahuweleri evandlheni yi suke eka 35 yi ya eka 70 naswona nhlayo ya lava a va va kona etidyondzweni yi suke eka 40 yi ya eka 220. A hi tshama hi khomekile swinene ensin’wini naswona ndlela leyi Yehovha a hi katekiseke hayona yi ndzi chavelerile. Hambiswiritano, a hi xi rivali xihlangi xa hina. Hi swi langutele hi mahlongati ku vona ndlela leyi Yehovha a nga ta horisa timbilu ta hina hi ku helela hayona.

Mats: Hi ku famba ka nkarhi, Ann-Catrin u sungule ku titwa a karhele ngopfu. Kasi loko ku ri mina, ndzi byeriwe leswaku ndzi ni khensa ya rhumbu lerikulu naswona a ndzi fanele ndzi endliwa vuhandzuri lebyikulu. Kambe sweswi, mina na Ann-Catrin hi hanye kahle.

Hi xiye leswaku a hi hina ntsena hi langutanaka na miringo. Endzhaku ka ku dlayeteriwa ka vanhu hi 1994 eRwanda, hi endzele vamakwerhu vo tala lava a va ri etikampeni ta vahlapfa. Ku vona ku tiyisela, malwandla ni ripfumelo leri a va ri na rona swi hi dyondzise leswaku Yehovha u na wona matimba yo pfuna vanhu vakwe va tiyisela ndzingo wun’wana ni wun’wana.—Ps. 55:22.

Ann-Catrin: Hi 2007 hi tlhele hi langutana ni tlhontlho wun’wana loko ku nyiketeriwa rhavi ra le Uganda. Endzhaku ka nongonoko, loko hi ri karhi hi famba hi bazi hi ri ntlawa wa kwalomu ka 25 wa varhumiwa ni vanhu lava tirhaka eBethele hi ya eNairobi le Kenya, hi hlangane na nghozi. Lori yin’wana yi te yi hi kongomile ivi yi hi chayisa naswona leswi swi endleke loko hi nga si fika endzilakaneni wa le Kenya. Muchayeri wa hina ni vamakwerhu va ntlhanu va fele kwalaho, kasi makwerhu un’we wa xisati u fele exibedlhele. Hi swi langutele emahlweni ku tlhela hi va vona vanghana va hina.—Yobo 14:​13-15.

Hi ku famba ka nkarhi, ndzi hlakarherile endzhaku ka loko hi ve ni mhangu. Kambe mina na Mats a hi ri van’wana va vakhandziyi lava a va karhatiwa hi ku chava loku vaka kona endzhaku ka mhangu. Nivusiku a ndzi teriwa hi ku chava ndzi pfuka onge hiloko ndzi lava ku hlaseriwa hi vuvabyi bya mbilu. Sweswo a swi chavisa swinene. Kambe ku khongela eka Yehovha hi mbilu hinkwayo ni ku hlaya matsalwa lama chavelelaka lama hi ma rhandzaka swi hi pfunile leswaku hi langutana ni xiyimo lexi. Nakambe hi tlhele hi ya eka madokodela lama pfunaka vanhu lava nga ni ku chava naswona sweswo swi hi pfunile swinene. Sweswi xiyimo xa antswa naswona hi kombela Yehovha leswaku a hi pfuna hi chavelela vanhu lava nga enyimpini leyi fanaka ni ya hina.

Loko mi hlamusela ndlela leyi Yehovha a mi pfuneke hayona leswaku mi tiyisela swiyimo swo tika, mi vule leswaku Yehovha u mi “rhwale bya matandza.” Xana a mi vula yini?

Mats: Xivuriso xexo i xa Xiswahili. Hilaha munhu a khomaka matandza leswaku ma nga fayeki, Yehovha u hi seketerile eka swiavelo swa hina hinkwaswo. Mikarhi hinkwayo, a hi tshama hi ri ni leswi hi swi lavaka, mikarhi yin’wana a hi va ni swo tala ku tlula ni leswi hi swi lavaka. Ndlela leyi Huvo leyi Fumaka yi hi kombeke ntwelavusiwana hayona yi endle hi swi vona leswaku Yehovha wa hi rhandza naswona wa hi seketela.

Ann-Catrin: I nge ndzi mi hlamusela xikombiso xa ndlela leyi Yehovha a hi seketeleke hayona. Siku rin’wana hi foneriwile hi byeriwa leswaku bava wa mina le Sweden u le xibedlhele naswona i phulaniphulani. Mats yena a ha ku hlakarhela eka vuvabyi bya malariya naswona a hi nga ri na mali yo xava mathikithi yo ya ekaya. Hikwalaho, hi teke xiboho xa leswaku hi fanele hi xavisa movha wa hina. Endzhaku ka sweswo, hi foneriwe hi vatekani van’wana lava tweke hi xiyimo xa hina naswona a va lava ku hi xavela thikithi rin’we. Endzhaku ka sweswo, hi tlhele hi foneriwa hi makwerhu wa xisati la kuleke loyi a a hlayisa mali ebokisini leri a ri tsaleke leswi, “Mali yo pfuna munhu loyi a lavaka ku pfuniwa.” Yehovha u hi pfune hi ku copeta ka tihlo.—Hev. 13:6.

Eka malembe lawa hinkwawo ya 50 lama mi ma heteke mi ri eka ntirho wa nkarhi hinkwawo, xana mi dyondze yini?

Ann-Catrin: Ndzi dyondze leswaku hi kuma matimba loko ‘hi tshama hi rhurile ni ku tlhela hi tshemba Yehovha.’ Loko hi tshemba Yehovha wa hi lwela. (Esa. 30:15; 2 Tikr. 20:​15, 17) Nakambe hi ku va hi tirhela Yehovha hilaha hi nga kotaka hakona eka swiavelo swa hina, hi kume mikateko yo tala leyi a hi nga ta yi kuma loko a hi nga n’wi tirheli.

Mats: Dyondzo ya nkoka leyi ndzi yi dyondzeke hi leswaku loko hi titshega hi Yehovha eka xiyimo xin’wana ni xin’wana u ta hi pfuna. (Ps. 37:5) A nga si tshama a tsandzeka ku hetisisa switshembiso swakwe. Ni sweswi eka xiavelo xa hina laha Bethele kwala Myanmar, ha ku vona ku hetiseka ka xitshembiso lexi.

Hi navela onge vantshwa lava lavaka ku endla leswi engetelekeke entirhweni wa Yehovha, va nga vona rirhandzu leri Yehovha a hi kombeke rona. Ha tiyiseka leswaku va ta ri vona, loko ntsena va pfumelela Yehovha leswaku a va pfuna va tsaka ni ku tlhela va fambisana ni swiyimo eka xiavelo xin’wana ni xin’wana lexi va nyikiwaka xona.