U Nga Rivali Ku Khongelela Van’wana

1. Hi swi tiva njhani leswaku swikhongelo swa hina i swa nkoka eka Yehovha?

XIKHONGELO i nyiko ya risima swinene. Ehleketa hi mhaka leyi: Yehovha u nyike tintsumi mitirho yo karhi. (Ps. 91:11) U tlhele a nyika N’wana wakwe mitirho ya nkoka swinene. (Mat. 28:18) Kambe loko swi ta eka ku yingisela swikhongelo swa hina, hi yena ntsena a swi yingiselaka. Phela Yehovha i “Mutwi wa xikhongelo.”—Ps. 65:2.

2. Xana muapostola Pawulo u hi vekele xikombiso xihi emhakeni yo khongelela van’wana?

² Hambileswi hi nga khongelaka eka Yehovha hi tshunxekile hi n’wi byela leswi hi karhataka, hi fanele hi khongelela ni van’wana. Muapostola Pawulo na yena u endle tano. Hi xikombiso, u tsalele vandlha ra le Efesa a ku: “Ndzi tshamela ku mi katsa eswikhongelweni swa mina.” (Efe. 1:16) U tlhele a khongelela ni vanhu vo karhi. Hi xikombiso, u byele Timotiya a ku: “Ndzi khensa Xikwembu . . . [naswona] ndzi ku khongelela vusiku ni nhlikanhi eka swikhongelo swa mina leswi dzikeke.” (2 Tim. 1:3) Hambileswi Pawulo a a ri na swona swilo leswi a swi n’wi karhata naswona a a ta khongela ha swona kambe u tinyike nkarhi wo khongelela ni van’wana.—2 Kor. 11:23; 12:​7, 8.

3. I yini leswi nga endlaka hi rivala ku khongelela van’wana?

³ Mikarhi yin’wana hi nga rivala ku khongelela van’wana. Hikwalahokayini? Xivangelo xin’wana hi lexi boxiwaka hi makwerhu waxisati Sabrina.a U ri: “Hi tshama hi khomekile emisaveni leyi lerova hi nga tsandzeka ni ku khongelela van’wana hikwalaho ka leswi hi tshamelaka ku ehleketa ngopfu hi swiphiqo swa hina.” Xana u xiye leswi fanaka eka wena? Loko swi ri tano, nhlokomhaka leyi yi ta ku pfuna. Yi ta hlamusela (1) swivangelo leswi endlaka swi va swa nkoka ku khongelela van’wana ni (2) ndlela leyi u nga swi endlaka hayona sweswo.

HIKWALAHOKAYINI HI FANELE HI KHONGELELA VAN’WANA?

4-5. Swikhongelo swa hina swi “ni matimba” eka van’wana hi ndlela yihi? (Yakobo 5:16)

⁴ Swikhongelo leswi hi swi endlelaka van’wana swi “ni matimba.” (Hlaya Yakobo 5:16.) Xana ku khongelela van’wana swi nga cinca xiyimo lexi va langutaneke na xona? Ina xi nga xi cinca. Leswi Yesu a a swi tiva leswaku muapostola Petro a a ta n’wi landzula ku nga ri khale, u te: “Ndzi ku khongelerile leswaku ripfumelo ra wena ri nga tsani.” (Luka 22:32) Nakambe Pawulo a a swi tiva leswaku xikhongelo xi nga cinca xiyimo lexi munhu a langutaneke na xona. Loko a pfaleriwe eRhoma hambileswi a a nga ri na nandzu, u tsalele Filemoni a ku: “Ndzi tshemba leswaku hikwalaho ka swikhongelo swa n’wina ndzi ta tlheriseriwa eka n’wina.” (Film. 22) Hilaha swi veke hakona, a swi tekanga nkarhi leswaku Pawulo a tshunxiwa naswona u ye emahlweni ni ntirho wakwe wo chumayela.

⁵ I ntiyiso leswaku leswi a swi vuli swona leswaku mikarhi hinkwayo Yehovha u fanele a endla leswi hi swi khongelelaka. Wa yi vona ndlela leyi malandza yakwe ma khathalaka hayona naswona mikarhi yin’wana u hlawula ku endla leswi ma swi kombelaka. Nakambe ku tiva sweswo, swi ta hi pfuna leswaku hi khongela eka yena hi xiyimo xexo hi ri karhi hi tshemba leswaku u ta hi lulamisela xona.—Ps. 37:5; vona 2 Vakorinto 1:11.

6. Xana ku khongelela van’wana swi yi khumba njhani ndlela leyi hi titwaka hayona ha vona? (1 Petro 3:8)

⁶ Ku khongelela van’wana swi hi pfuna leswaku hi va ni “tintswalo.” (Hlaya 1 Petro 3:8.) Munhu la nga ni tintswalo u tiva maxangu ya munhu un’wana naswona swi endla leswaku a navela ku n’wi pfuna. (Mar. 1:​40, 41) Michael la nga nkulu u ri: “Loko ndzi khongela hi swilo leswi van’wana va swi lavaka, swi endla ndzi tiva swilo leswi va karhataka naswona sweswo swi endla leswaku ndzi ya ndzi va rhandza swinene. Ndzi titwa ndzi ri ekusuhi na vona hambiloko vona va nga swi xiyi.” Richard la nga nkulu u hlamusela vuyelo byin’wana. U ri: “Loko hi khongelela munhu wo karhi, hi susumeteleka ku endla swo karhi leswaku hi n’wi pfuna.” U tlhela a ku: “Loko hi pfuna munhu loyi hi n’wi khongelelaka, swi fana ni loko hi hoxa xandla eka leswi hi khongelaka leswaku a pfuniwa hi swona.”

7. Ku khongelela van’wana swi hi pfuna njhani leswaku hi va ni langutelo lerinene hi swiphiqo swa hina? (Vafilipiya 2:​3, 4) (Nakambe vona swifaniso.)

⁷ Loko hi khongelela van’wana swi hi pfuna leswaku hi va ni langutelo lerinene hi swiphiqo swa hina. (Hlaya Vafilipiya 2:​3, 4.) Hinkwerhu hi kayakayisiwa hi swiphiqo hikuva hi hanya emisaveni leyi lawuriwaka hi Diyavulosi. (1 Yoh. 5:19; Nhlav. 12:12) Loko hi titoloveta ku khongelela van’wana, swi ta hi tsundzuxa leswaku “maxangu lama fanaka ma va wela vamakwe[rhu] hinkwavo emisaveni hinkwayo.” (1 Pet. 5:9) Katherine la nga phayona u ri: “Loko ndzi khongelela van’wana swi ndzi tsundzuxa leswaku na vona va langutana ni swiphiqo. Leswi swi ndzi pfuna leswaku ndzi nga karhateki ngopfu hi swiphiqo swa mina.”

VA LAVA SWIKHONGELO SWA HINA

8. Vula swikombiso swa lava hi nga va katsaka eswikhongelweni swa hina.

⁸ Hi nga katsa vamani eswikhongelweni swa hina? Hi nga khongelela vanhu vo hambanahambana. Hi xikombiso, lava vabyaka, vantshwa lava hlekuriwaka ni ku tlhela va langutana ni ntshikilelo wa tintangha exikolweni kumbe vamakwerhu lava dyuhaleke. Vamakwerhu vo tala va tiyisela ku xanisiwa hi swirho swa ndyangu kumbe hi mifumo. (Mat. 10:​18, 36; Mit. 12:5) Vamakwerhu van’wana va boheke ku siya makaya ya vona hikwalaho ka hasahasa ya swa tipolitiki. Van’wana va weriwe hi timhangu ta ntumbuluko. Swi nga endleka hi nga va tivi vamakwerhu lava kambe loko hi va khongelela, hi kombisa leswaku hi yingisa xileriso xa Yesu xa ku va hi “rhandzana.”—Yoh. 13:34.

9. Hikwalahokayini hi fanele hi khongelela vamakwerhu lava rhangelaka enhlengeletanweni ya Yehovha ku katsa ni vasati va vona?

⁹ Hi nga tlhela hi khongelela lava rhangelaka enhlanganweni wa Yehovha naswona va katsa Huvo leyi Fumaka ni vapfuni va yona, Tikomiti ta Rhavi, valanguteri va le marhavini, valanguteri va miganga, vakulu ni malandza ya vutirheli. Vo tala va vamakwerhu lava va na swona swiphiqo kambe a va tshiki ku hi tirhela. (2 Kor. 12:15) Hi xikombiso, Mark loyi a nga mulanguteri wa muganga u ri: “Tlhontlho wun’wana lowukulu lowu ndzi langutaneke na wona i ku va ekule ni vatswari va mina lava dyuhaleke naswona havambirhi va tivabyela. Hambileswi sesi na sivara va va khathalelaka, swi ndzi dyisa mbitsi leswi ndzi nga kotiki ku va endlela swo tala.” Hi ta va hi endla kahle loko hi khongelela vamakwerhu lava, lava tirhaka hi matimba swi nga ri na mhaka leswaku ha swi tiva leswi va karhataka kumbe doo! (1 Tes. 5:​12, 13) Hi nga tlhela hi khongelela ni vasati va vamakwerhu lava hikuva vanuna va vona va kota ku ya emahlweni ni swiavelo swa vona hileswi va va seketelaka.

10-11. Xana Yehovha wa swi yingisa swikhongelo swa hina hambiloko hi nga ma boxi mavito ya lava hi va khongelelaka? Hlamusela.

¹⁰ Hilaha se hi buleke hakona, mikarhi yo tala hi khongelela vamakwerhu hinkwavo. Hi xikombiso, handle ko va hi boxa mavito ya vamakwerhu vo karhi, hi nga kombela Yehovha leswaku a pfuna vamakwerhu lava nga ejele kumbe leswaku a chavelela vamakwerhu lava feriweke. Donald la nga nkulu u ri, “Hi ni vamakwerhu vo tala lava langutanaka ni swiphiqo lerova mikarhi yin’wana a hi khongeleli makwerhu un’we ntsena kambe hi katsa hinkwavo lava nga eku xanisekeni.”

¹¹ Xana Yehovha wa swi yingisa swikhongelo swo tano? Ina. Phela a hi nge tivi swilo hinkwaswo leswi karhataka vamakwerhu. Hikwalaho, i swinene ku khongelela vamakwerhu tanihi ntlawa. (Yoh. 17:20; Efe. 6:18) Swikhongelo swo tano i vumbhoni bya leswaku hi “[rhandza] vamakwerhu hinkwavo.”—1 Pet. 2:17.

LOKO HI KHONGELELA VAMAKWERHU VO KARHI

12. Loko hi ri ni vuxiyaxiya swi ta hi pfuna njhani leswaku hi swi boxa hi ku kongoma swilo leswi karhataka vamakwerhu?

¹² Vana ni vuxiyaxiya. Ku engetela eka ku khongelela vamakwerhu va ri hi ntlawa, i swinene ku va boxa hi mavito. Xana ku na loyi a vabyaka swinene evandlheni ra n’wina? Xana ku ni muntshwa loyi a heleke matimba kumbexana hileswi a tshikileriwaka exikolweni? Xana ku ni mutswari la nga yexe naswona a tirhaka hi matimba leswaku a kurisa n’wana ‘hi ku n’wi tshinya ni hi swileriso swa Yehovha’? (Efe. 6:4) Loko u ri ni vuxiyaxiya, u ta ya u va rhandza vamakwerhu naswona sweswo swi ta endla leswaku u navela ku va khongelela.b—Rhom. 12:15.

13. Hi nga endla yini leswaku hi khongelela vamakwerhu lava hi nga va tiviki?

¹³ Boxa mavito ya lava u va khongelelaka. Hi nga endla tano hambiloko vanhu va kona hi nga va tivi. Hi xikombiso, ehleketa hi vamakwerhu lava khomiweke ematikweni yo fana na Crimea, Eritrea, Rhaxiya na Singapore. Eka jw.org, u nga kuma mavito ya vamakwerhu lava pfaleriweke ejele.c Brian loyi a nga mulanguteri wa muganga u ri: “Ndzi xiye leswaku ndzi kota ku tsundzuka munhu ni ku tlhela ndzi n’wi katsa eswikhongelweni swa mina loko ndzi tsala vito ra yena ehansi ivi ndzi ri vulela ehenhla loko ndzi khongela.”

14-15. I yini leswi nga hi pfunaka leswaku hi swi boxa hi ku kongoma leswi hi swi khongelelaka?

¹⁴ Swi boxe hi ku kongoma leswi u swi khongelelaka. Michael loyi se hi buleke ha yena u ringanyeta leswi: “Loko ndzi ri karhi ndzi hlaya hi vamakwerhu lava khomiweke eka jw.org, ndzi ringeta ku ehleketa ndlela leyi a ndzi ta titwa hayona loko a ku ri mina. Ndza swi tiva leswaku a ndzi ta vilela ngopfu hi nkatanga naswona a ndzi ta lava ku tiyiseka leswaku u sala a khathaleriwa. Hikwalaho, sweswo swi endla ndzi va na swo karhi swo swi katsa eswikhongelweni swa mina loko ndzi khongelela vamakwerhu lava tekeke naswona va khomiweke.”—Hev. 13:​3, nhlamuselo ya le hansi.

¹⁵ Loko hi anakanyisisa hi leswi vamakwerhu lava khomiweke va langutanaka na swona siku ni siku, swi ta hi pfuna leswaku hi kuma swin’wana leswi hi nga swi katsaka eswikhongelweni swa hina. Hi xikombiso, hi nga khongelela leswaku varindzi va le jele va va komba musa nileswaku lava nga ni vulawuri va pfumelela vamakwerhu leswaku va gandzela hi ku tshunxeka. (1 Tim. 2:​1, 2) Hi nga tlhela hi khongelela leswaku mavandlha ma nga khutaziwa hi xikombiso xa vamakwerhu lava khomiweke ni leswaku lava nga riki Timbhoni va xiya mahanyelo ya vona lamanene ivi va yingisa rungula ra hina. (1 Pet. 2:12) I ntiyiso leswaku hi nga endla leswi fanaka loko hi khongelela vamakwerhu lava tiyiselaka miringo yin’wana. Loko hi va ni vuxiyaxiya, hi boxa mavito ya lava hi va khongelelaka ni ku boxa leswi hi swi khongelelaka hi ku kongoma hi kombisa leswaku ‘ndlela leyi hi rhandzanaka ha yona ya kula.’—1 Tes. 3:12.

HI FANELE HI VA NI LANGUTELO LERINENE HI SWIKHONGELO SWA HINA

16. Hi nga va ni langutelo lerinene hi swikhongelo swa hina hi ndlela yihi? (Matewu 6:8)

¹⁶ Hilaha hi swi voneke hakona, swikhongelo swa hina swi nga cinca xiyimo lexi munhu a langutaneke na xona. Hambiswiritano, hi fanele hi va ni langutelo lerinene. Loko hi khongela, a hi byeli Yehovha swilo leswi a nga swi tiviki; kumbe hi n’wi byela ndlela leyinene yo lulamisa xiyimo. Yehovha wa swi tiva leswi malandza yakwe ma swi lavaka hambiloko wona kumbe hina hi nga si swi tiva. (Hlaya Matewu 6:8.) Kutani, hikwalahokayini hi fanele hi khongelela van’wana? Ku tatisa eka swivangelo leswi hi buleke ha swona eka nhlokomhaka leyi, hi kombisa leswaku ha khathala hi van’wana. Rirhandzu ri hi susumetela ku khongelela van’wana. Nakambe Yehovha wa tsaka loko a vona malandza yakwe ma kombisana rirhandzu leri yena a nga na rona.

17-18. Vula xikombiso xa leswi hi swi endlaka ku kombisa leswaku ha khathala hi van’wana.

¹⁷ Hambiloko swikhongelo swa hina swi vonaka onge a swi antswisi xiyimo kambe swi kombisa leswaku ha va rhandza vamakwerhu naswona eka Yehovha sweswo i swa nkoka. Hi lexi xikombiso xa mhaka leyi: Ehleketa hi ndyangu lowu nga ni vana vambirhi lavatsongo, wa mufana ni wa nhwanyana. Lowa mufana wa vabya. Hiloko lowa nhwanyana a kombela papa wakwe a ku: “Ndzi kombela u pfuna buti hikuva wa vabya swinene.” Hambileswi tatana loyi a endleke swo karhi leswaku a pfuna xifanyetana xakwe hileswi a xi rhandzaka, wa tsaka loko a vona xinhwanyetana xakwe xi khathala swinene hi makwavo lerova xi n’wi kombela leswaku a n’wi pfuna.

¹⁸ Leswi hi swona leswi Yehovha a hi khutazaka ku swi endla, ku nga ku khathala hi van’wana ni ku va khongelela. Loko hi endla tano, swi ta kombisa ndlela leyi hi khathalaka hayona hi vanhu van’wana naswona eka Yehovha i swa nkoka sweswo. (2 Tes. 1:3; Hev. 6:10) Nakambe hilaha hi buleke hakona, swikhongelo swa hina swi nga pfuna munhu eka xiyimo lexi a langutaneke na xona. Hikwalaho, hi nga tshiki ku khongelela van’wana.