Swirho Swimbirhi Leswintshwa Swa Huvo Leyi Fumaka

EKA nhlengeletano ya lembe ni lembe leyi a yi khomiwe hi ti 5 ta October 2024, ku endliwe xitiviso xo hlawuleka xa leswaku Makwerhu Jody Jedele na Jacob Rumph va hlawuriwile ku va swirho swa Huvo leyi Fumaka ya Timbhoni ta Yehovha. Vamakwerhu lava hinkwavo va tirhele Yehovha hi ku tshembeka malembe yo tala.

Makwerhu Jedele u velekiwe eMissouri, le U.S.A naswona u kulele entiyisweni. Ndyangu wa ka vona a wu tshama endhawini leyi nsimu ya kona a yi tirhiwa endzhaku ka nkarhi wo leha. Hikwalaho, u tive vamakwerhu vo tala lava humaka etindhawini to hambanahambana lava a va vhaka leswaku va ta pfuneta ku chumayela mahungu lamanene ensin’wini ya vona. U khumbiwe ngopfu hi rirhandzu ni vun’we lebyi a va byi kombisa. U khuvuriwe a ha ri muntshwa hi ti 15 ta October 1983. Nakambe a a yi rhandza nsimu kutani loko a heta xikolo u sungule ku va phayona ra nkarhi hinkwawo hi September 1989.

Loko Makwerhu Jedele a ha kula, vatswari vakwe a va famba na yena ni ndzisana yakwe ya xisati loko va endzela Bethele. Maendzo wolawo ma endle leswaku yena ni ndzisana ya yena va navela ku ya tirha eBethele ku nga leswi va swi fikeleleke. Makwerhu Jedele u ye eBethele ya le Wallkill hi September 1990. Loko a ha ku fika u averiwe eka Ndzawulo yo Basisa ivi hi ku famba ka nkarhi a tirha eka Ndzawulo ya swa Vutshunguri.

Hi nkarhi wolowo, mavandlha ya le kusuhi ya Xipaniya a ma ri eku kuleni naswona a ku laveka vamakwerhu vaxinuna leswaku va pfuneta. Hikwalaho, Makwerhu Jedele u rhurhele eka rin’wana ra wona naswona u sungule ku dyondza Xipaniya. Endzhakunyana ka sweswo, u hlangane na makwerhu waxisati Damaris loyi a a ri phayona naswona a va ri emugangeni wun’we. Hi ku famba ka nkarhi va catile naswona va tirhe swin’we eBethele.

Hi 2005 va humile eBethele leswaku va ya khathalela vatswari va vona vo tshembeka. Hi nkarhi wolowo, va ve maphayona ya nkarhi hinkwawo. Makwerhu Jedele u dyondzise eka Xikolo xa Ntirho wa Vuphayona ni ku tlhela a tirha eka Komiti yo Vulavurisana ni Swibedlhele ni le ka Komiti yo Aka ya Xifundzha.

Hi 2013, Makwerhu Jedele ni nsati wakwe va tlhele va rhambiwa eBethele leswaku va ta pfuneta eka projeke yo aka eWarwick. Endzhaku ka sweswo, va tirhe ePatterson na le Wallkill. Makwerhu Jedele u tlhele a tirha eka Ndzawulo yo Pulana ni ku Aka ni Ndzawulo ya Rungula ra Swibedlhele. Hi March 2023, u hlawuriwe ku va mupfuni eka Komiti ya Ntirho. Loko a ehleketa hi swiavelo leswi a tshameke a swi endla, u ri: “Mikarhi yin’wana hi nga chuha loko hi nyikiwe swiavelo leswintshwa. Kambe loko sweswo swi endleka, hi fanele hi tsundzuka ku titshega hi Yehovha hikuva hi yena loyi a nga ta hi pfuna hi endla swiavelo leswi a hi nyikeke swona.”

Makwerhu Rumph u velekiwe eCalifornia, eU.S.A. Loko a ha kula, mhani wakwe a a tshike ku ya etinhlengeletanweni ta vandlha kambe u n’wi dyondzise ntiyiso wa le Bibeleni. Nakambe lembe ni lembe a a vhakela kokwa wakwe wa xisati, loyi a a ri Mbhoni yo tshembeka. Kokwana wakwe u n’wi pfunile leswaku a navela ku dyondza swo tala hi Bibele naswona loko a ri ni malembe ya 13 u kombele ku dyondzeriwa Bibele. U khuvuriwe a ha ri muntshwa hi ti 27 ta September 1992. Nakambe lexi tsakisaka mhani wakwe u tlhele a lunghisa vuxaka byakwe na Yehovha naswona ndyangu hinkwawo wu endle nhluvuko ivi wu khuvuriwa.

Loko a ha ri muntshwa, Makwerhu Rumph u vone ndlela leyi maphayona a ma tsake hayona. Hikwalaho, loko a heta xikolo u sungule ku phayona hi September 1995. Hi 2000, u rhurhele eEcuador leswaku a ya tirha laha ku nga ni xilaveko lexikulu xa vachumayeri. Loko a ri kwalaho, u hlangane na makwerhu waxisati Inga loyi a a ri phayona naswona a humaka eCanada. Hi ku famba ka nkarhi va tekanile. Endzhaku ka sweswo, va phayone swin’we edorobeni ra Ecuador ni ntlawa lowutsongo wa vahuweleri. Namuntlha ku ni vandlha leri hisekaka endhawini yoleyo.

Hi ku famba ka nkarhi, Makwerhu Rumph ni nsati wakwe va ve maphayona yo hlawuleka naswona endzhakunyana ka nkarhi va sungule ntirho wo endzela mavandlha. Hi 2011 va rhambiwe eka tlilasi ya vu-132 ya Giliyadi. Endzhaku ka loko va grajuwetile, va tirhe etindhawini to hambanahambana emisaveni hinkwayo naswona va tiphine hi ku tirha eBethele, va va varhumiwa ni ku tlhela va endzela mavandlha. Makwerhu Rumph u tlhele a va ni nkateko wo dyondzisa eka Xikolo xa Vachumayeri va Mfumo.

Hikwalaho ka ntungu wa COVID-19, Makwerhu Rumph ni nsati wakwe va tlhelele eUnited States. Kutani va rhambiwe eBethele ya le Wallkill, laha Makwerhu Rumph a leteriweke eka Ndzawulo ya Ntirho. Hi ku famba ka nkarhi, va tlhele va kuma xiavelo xo ya tirha erhavini ra le Ecuador laha Makwerhu Rumph a veke xirho xa Komiti ya Rhavi. Hi 2023, va yisiwe eWarwick. Kasi hi January 2024, Makwerhu Rumph u hlawuriwe ku va mupfuni eka Komiti ya Ntirho. Loko a ehleketa hi tindhawu leti a tirheke eka tona, u ri: “I vanhu lava u tirhaka na vona lava endlaka leswaku xiavelo xi va xo hlawuleka ku nga ri ndhawu.”

Ha yi tlangela mitirho leyi vamakwerhu lava va yi endlaka hi mbilu hinkwayo naswona ha va “xixima vanhu vo tano.”—Filp. 2:29.