Papila Leri Humaka Eka Huvo Leyi Fumaka

LESWI hi nga emalembeni yo sungula ya lembe-xidzana ra vu-21, hi tsakela ku mi tsalela n’wina ‘nhlengeletano hinkwayo ya vamakwerhu’ emisaveni hinkwayo ni ku mi bumabumela hi migingiriko ya n’wina. (1 Pet. 2:17) Kwalomu ka malembe ya 2 000 lama hundzeke, Yesu u vutisile: “Loko N’wana wa munhu a fika, xana kunene u ta ri kuma ripfumelo emisaveni?” (Luka 18:8) Ku gingiriteka ka n’wina hi lembe ra ntirho ra n’wexemu ku hlamula xivutiso xa Yesu hi ina la twalaka kahle! Van’wana va n’wina mi sandziwile ni ku hlekuriwa hikwalaho ka ripfumelo ra n’wina. Etindhawini to tala, mi tiyiserile ku nga khathariseki tinyimpi, timhangu, mavabyi kumbe ndlala. (Luka 21:10, 11) Hikwalaho ka ku hiseka ka n’wina entirhweni lowunene, Yesu wa ha ta ri “kuma ripfumelo emisaveni.” Hakunene, ku ni ntsako ematilweni hikwalaho ka sweswo!

Ha swi tiva leswaku ku tiyisela a hi matlangwana. Xiyani miringo leyi humelelaka vamakwerhu etikweni rin’wana ra le vupela-dyambu bya Asia. Ku xanisiwa ka Timbhoni ta Yehovha ko va tshamelo maxelo etikweni rero. Sweswinyana, maphorisa ma ha ku kavanyeta ku rhula ka nhlengeletano leyi a yi ri ni vanhu va kwalomu ka 700. Ku pfariwa ka mapato ku endle leswaku vanhu van’wana va kwalomu ka 1 300 va nga vi kona enhlengeletanweni. Ntshungu wa vanhu lava tipfaleke swikandza, van’wana va vona va ri maphorisa, wu hlasele ndhawu ya nhlengeletano, wu himetela vanhu vo tala lava teke entsombanweni ni ku hisa muako lowu nhlengeletano a yi ta khomeriwa eka wona. Eka swiendlakalo swin’wana, vanhu va vukhongeri lava hisekelaka etlhelo va himetele vamakwerhu hi tinhonga leti nga ni swipikiri leswi hlohlomukeke.

Minhlaselo yo tano yi tsema nhlana kambe a yi hlamarisi. Muapostola Pawulo u huhuteriwe ku tsala a ku: “Hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Tim. 3:12) Eka lembe-xidzana ro sungula, Vakreste va tiyiselele ku rhukaniwa ni ku xanisiwa emintlhavekweni naswona van’wana va dlayiwile. (Mint. 5:40; 12:2; 16:22-24; 19:9) Ku tlhele ku humelela leswi fanaka hi lembe-xidzana ra vu-20, naswona handle ko kanakana swi ta hambeta swi va tano ni le ka lembe-xidzana ra vu-21. Hambiswiritano, Yehovha u ri: “Tlhari rihi ni rihi leri nga ta endleriwa ku ku hlasela a ri nge humeleli.” (Esa. 54:17) Xolexo i xitiyisekiso xo hlamarisa swonghasi! Hakunene, hi va risima swinene eka Yehovha lerova hi muprofeta wa yena Zakariya, u te: “Loyi a mi khumbaka u khumba ndzololo ya tihlo ranga.” (Zak. 2:8) Valala va vagandzeri va Yehovha a va nge pfuki va hlurile. Vugandzeri lebyi tengeke byi ta hlula!

Hi xikombiso, etikweni leri ku vulavuriweke ha rona eku sunguleni, Timbhoni ta Yehovha ti ve ni tinhlohlorhi timbirhi letintshwa eka nhlayo ya vahuweleri ya lembe ra ntirho ra 2001. Ina, hambiloko vamakwerhu va langutane ni maxangu endhawini yoleyo, va tiyiserile ku fana ni van’wana etindhawini tin’wana. Eka lembe ra ntirho ra n’wexemu, vanhu va 5 066 va khuvuriwile vhiki rin’wana ni rin’wana emisaveni hinkwayo, ku ri ku kombisa ku tinyiketela ka vona eka Yehovha. Sweswi vanhu lava ha riki vantshwa va tiyimisele swin’we na hina, ku ‘yima hi ku hetiseka ni hi ku khorwiseka loku tiyeke hi ku rhandza ka Xikwembu hinkwako.’—Kol. 4:12.

Nakambe, xiyani swiendlakalo leswa ha ku humelelaka eGreece. Hambileswi ku hundzeke malembe yo tala Timbhoni ta Yehovha ti ri karhi ti kanetiwa swinene hi Kereke ya Orthodox ya le Greece, sweswi hulumendhe yi ti tiva ti ri “vukhongeri lebyi tivekaka.” Papila leri hlamuseleke hi mhaka leyi ri ye emahlweni ri vula leswaku muako wa Bethele ya le Greece i “ndhawu yo kwetsima leyi nyiketeriweke evugandzerini bya Xikwembu.” Nakambe, hi tsakela ku mi byela leswaku eka lembe ra ntirho ra n’wexemu, tihuvo ti endle swiboho swa ximfumo leswi seketelaka vugandzeri bya hina eBulgaria, Canada, Japani, Jarimani, Rhaxiya, Romania ni le United States. Mayana ndlela leyi hi nkhensaka Yehovha ha yona hi leswi a endleke leswaku nyangwa ya ntirho yi tshama yi pfulekile ematikweni wolawo!

Loko hi languta tindlela leti Yehovha a seketelaka vanhu va yena ha tona emasikwini lawa ya makumu, hi swi vona kahle leswaku i Munghana wa hina lonkulu. Hi tsakela vuxaka bya hina na yena, hi ri karhi hi swi tiva leswaku wa hi rhandza, wa hi dyondzisa naswona wa hi tsundzuxa. Ina, hi ta hambeta hi ringiwa eripfumelweni. Kambe hi ta tiyisiwa hi ku va ni ripfumelo leri nga tsekatsekiki eka Yehovha. Yakobo u tsarile: “Swi tekeni hinkwaswo swi ri ntsako, vamakwerhu, loko mi langutana ni miringo yo hambana-hambana, hilaha mi tivaka hakona leswaku mfanelo leyi yi ringiweke ya ripfumelo ra n’wina yi vanga ku tiyisela.” (Yak. 1:2, 3) Tlhandlakambirhi, ku tiyisela ka hina ku kombisa leswaku ha n’wi rhandza Yehovha kutani sweswo swi hi tisela ntsako lowukulu! Vamakwerhu lava rhandzekaka, tiyisekani, leswaku Yehovha u ta seketela un’wana ni un’wana wa hina. Loko hi tshama hi tshembekile, a swi kanakanisi leswaku u ta hi pfuna kukondza hi nghena emisaveni leyintshwa. U lava leswaku hi ya nghena eka yona.

Hikokwalaho, ha mi khutaza vamakwerhu, lavatsongo ni lavakulu leswaku mi tshama mi ri karhi mi tsundzuka mikateko leyi hlamarisaka leyi hi nga ta yi kuma. Onge langutelo ra hina ri nga fana ni ra muapostola Pawulo la tsaleke, a ku: “Ndzi anakanya leswaku ku xaniseka ka nguva ya sweswi a hi nchumu loko ku ringanisiwa ni ku vangama loku hi nga ta hlavuteriwa kona.” (Rhom. 8:18) Vekani ntshembo wa n’wina eka Yehovha loko mi langutane ni muxaka wihi ni wihi wa maxangu. Tiyiselani, naswona mi nga heli matimba. A mi nge pfuki mi tisorile. Rito ra Xikwembu ra hi tiyisekisa: “Loyi a lulameke, u ta hambeta a hanya hikwalaho ka vutshembeki byakwe.”—Hab. 2:4.

Vamakwenu,

Huvo leyi Fumaka ya Timbhoni ta Yehovha