Mintirho Ya Timbhoni Ta Yehovha Ya Manguva Lawa

Rhaxiya

Xiviko xa Timbhoni ta Yehovha le Rhaxiya xi kombisa leswaku ti ni ripfumelo ni xivindzi, ni leswaku ti tshame ti tiyimiserile ku tshemba Xikwembu hambileswi a ti xanisiwa hi tihanyi swinene. Ti hlongoriwe emakaya, ti tirhisiwa tanihi mahlonga nilokoswiritano, a ti tshikanga ku chumayela naswona a ti helanga mongo.

Matimu ya tona ma tiyisa ripfumelo. Leti a ti tshemba Yehovha a ti langutele ku xanisiwa. A ti titwelanga vusiwana kambe ti teke maxangu ya tona tanihi ndlela leyi ti nga kombisaka ha yona leswaku ti tshembekile eka Xikwembu. Makwerhu un’wana u te: “Loko hi gweviwa a nga kona ni un’we eka swichudeni swa mina swa Bibele loyi a a chuhile. Sweswo swi ndzi tsakisile swinene! Hi vumune bya swona swi gweviwe ku ya heta malembe ya 25 etikampeni. Mina ndzi kume xigwevo xo vavanyana . . . Loko hi huma ehubyeni, hi yimile kutani hi nkhensa Yehovha hileswi a hi seketeleke. Varindzi va khotso va hlamarile, va nga xi twisisi lexi hi tsakisaka.”

Hlaya u titwela hi ta nhwanyana la nga dyondza ntiyiso eka mapapila lawa a ma boheleriwe emaribyeni ma lahleriwa ehandle ka darada ra khotso. U ta dyondza ndlela leyi vamakwerhu lava pfaleriweke ekhotsweni a va kota ku tshama va tshembekile eka Yehovha ha yona. U ta twa ni leswi endlekeke loko vatswari lava nga Timbhoni va hehliwa hi ku tsema n’wana wa vona ndleve.

Rungula leri a ri tamelanga xiviko xa makume ya malembe loko ntirho wu yirisiwile ntsena. Eka malembe ya 20 lama hundzeke nhlayo ya Timbhoni yi engetelekile swinene etikweni leri lerikulu. Vona ndlela leyi vamakwerhu va koteke ku langutana ni swiyimo leswintshwa leswi fambisanaka ni ku andza ka vona. Ha tsaka ku rungula hi tiko rin’we ra Rhaxiya ntsena eka Buku Ya Lembe ya nan’waka.