Papila Leri Humaka Eka Huvo Leyi Fumaka

Eka Timbhoni-kulorhi Ta Yehovha:

Hakunene hi ni lunghelo ro vitaniwa hi vito ra Hosi ya Vuako Hinkwabyo, ku nga Yehovha! Vito leri i ra hilaha ku nga heriki naswona a ri kona leri fanaka na rona. Yehovha hi yena loyi a hi byarhiseke vito leri naswona ku sukela hi 1931 a hi tiviwa hi rona vito leri ro hlawuleka. (Esa. 43:10) Hakunene ha tinyungubyisa leswi hi nga Timbhoni ta Yehovha.

Diyavulosi u ringeta hi matimba ku thyakisa vito ra Xikwembu. Matiko lawa a ma lawulaka ma sandza vito ra Xikwembu, ku nga Yehovha. Babilona Lonkulu, ku nga mfumo wa misava wa vukhongeri bya mavunwa, wu venga vito ra Xikwembu naswona wu ri susile eTibibeleni to tala. Ku hambana na wona, Yesu a a ri xixima vito ra Tata wakwe naswona u sungule hi rona eka xikhongelo xa xikombiso lexi a xi dyondziseke valandzeri va yena. U te: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe.’” (Mat. 6:9) Hi ku famba ka nkarhi, u khongele eka Tata wakwe swi huma embilwini a ku: “Vito ra wena ndzi ri kombise vanhu lava u ndzi nyikeke vona emisaveni.” (Yoh. 17:6) Tanihi leswi hi landzelaka xikombiso lexinene xa Yesu, hi tiyimisele ku tlula rini na rini ku twarisa vito ra Yehovha hi xivindzi emisaveni hinkwayo.

Ndzimana ya lembe ya 2009 leyi nge, ‘Chumayela mahungu lamanene hi rixaladza,’ yi hi khutazile leswaku hi byi hetisisa hilaha ku heleleke vutirheli bya hina. (Mint. 20:24) A swi kanakanisi leswaku Yehovha u ma katekise swinene matshalatshala ya hina eka lembe ra ntirho leri hundzeke. Ku chumayeriwe swinene emisaveni hinkwayo, leswi endleke leswaku vito ra Yehovha ri vangamisiwa ri tlhela ri xiximiwa. Nhlohlorhi leyintshwa ya vahuweleri va 7 313 173 yi hlanganyele entirhweni wo chumayela vanhu hinkwavo ni ku dyondzisa vanhu va timbilu letinene lava nga le ku laveni ka ndlela yo tlhantlha swiphiqo swo tala leswi va langutanaka na swona siku ni siku. Nhlayo ya vanhu va 18168 323 lava veke kona eXitsundzuxweni xa rifu ra Kreste, yi kombisa leswaku ka ha ri ni vanhu va timiliyoni lava nga ha vitanaka vito ra Yehovha loko makumu ya mafambiselo lawa ya swilo ma nga si hela.

Loko Yehovha a ha swi pfumelela, hi ta hambeta hi chumayela mahungu lamanene ya Mfumo hi ku hiseka, hi tirhisa tindlela hinkwato leswaku hi fikelela vanhu va nsimu ya hina. (Mat. 24:14; Mar. 13:10) Ku nga khathariseki leswaku hi chumayela hi yindlu ni yindlu, exitarateni, hi ku tsala papila ni hi riqingho kumbe hi xitshuketa, onge hi nga tiyimisela ku twarisa vito ra Yehovha ni xikongomelo xa yena eka vanhu vo tala hilaha hi nga kotaka hakona.

Hi ni swivangelo leswi twalaka swo kholwa leswaku ku nga ri khale Yehovha u ta teka goza leswaku a kwetsimisa vito ra yena. (Ezek. 36:23) Nkarhi wa tshinela hi xihatla lowu ha wona hinkwavo lava sandzaka vito ra Xikwembu va nga ta herisiwa. Hakunene rolero ku ta va siku leri tsakisaka eka malandza hinkwawo yo tshembeka ya Yehovha lama twarisaka vito ra yena ni ku seketela vuhosi bya yena bya vuako hinkwabyo.

Ndlela leyi Yehovha a va rhandzaka ha yona vanhu va yena yi vonake eMintsombanweni ya Muganga ni ya Matiko lowu nge, “Tshamani Mi Rindzile!” lowu a wu khomiwe ematikweni yo tala hi 2009. Mintsombano yoleyo a yi rivaleki ematin’wini ya ntirho wa hina lowu hi wu endlelaka Xikwembu, hikuva yi hi khutazile leswaku hi tshama hi xalamukele ku fika ka siku ra Yehovha.—Mar. 13:37; 1 Tes. 5:1, 2, 4.

Hakunene Yehovha hi lonene; u endla leswaku timbilu ta hina ti tsaka. U hi etlerisa emadyelweni lama nga ni byanyi byo tala naswona u hi kongomisa etindhawini to wisela eka tona leti kumaka mati kahle.—Ps. 23:1, 2; 100:2, 5.

Tshamani mi ri karhi mi tiyiseka leswaku Yehovha u ta hambeta a mi katekisa loko mi hambeta mi khomekile hi ntirho wa Mfumo eka tin’hweti leti nga ta landzela!

Hi mi rungula hi rirhandzu ra Vukreste hinkwenu vamakwerhu emisaveni hinkwayo

Vamakwenu,

Huvo Leyi Fumaka Ya Timbhoni Ta Yehovha