Ku Nyiketeriwa Ka Marhavi

VATIRHI va ku tirhandzela va kwalaho ni lava humaka ematikweni man’wana va tirhe hi matimba ku ringana lembe ni hafu leswaku va pfuxeta ni ku kurisa miako ya rhavi ra le Bishkek, ku nga ntsindza wa le Kyrgyzstan. Nongonoko wo nyiketela wu ve hi October 24, 2015, endzhaku ka loko ku hundze n’hweti ka ha ku hetiwa tsima rero. Vayingiseri vo tlula 3 000 eka Tiholo ta Mfumo ta 18 ni le tindhawini tin’wana ta ntlhanu a va tsakile loko va hlalela nongonoko wolowo. Stephen Lett xirho xa Huvo leyi Fumaka u nyikele nkulumo yo nyiketela leyi a yi ri ni nhlokomhaka yo tsakisa leyi nge, “Tirhela Yehovha Hi Mbilu Hinkwayo.” Eka siku leri landzelaka, nongonoko wolowo lowu khutazaka wu hlaleriwe hi vahuweleri vo tala etikweni rero.

Hi Mugqivela May 14, 2016, a ku ri ni vanhu va 6 435 loko ku nyiketeriwa rhavi ra le Armenia, leri nga eka swithezi swa tsevu swa muako wo xonga lowu ku tshamaka vanhu wa swithezi swa 18. Ku tlhele ku nyiketeriwa Holo ya Tinhlengeletano ni miako ya Xikolo Xa Vachumayeri Va Mfumo. Hi nkarhi wa nongonoko, tinkulumo a ti vulavula hi ndlela leyi ntirho wa malandza ya Yehovha ya le Armenia wu sunguleke ha yona. Ntirho wolowo wu sunguriwe hi vanhu va le Armenia lava a va tshama eUnited States hi va-1900 ivi wu endliwa hi ku kongoma eArmenia hi va-1970, hi nkarhi lowu tiko rero a ra ha ri xiphemu xa Soviet Union. Sweswinyana, nhlengeletano yi tsarisiwe ximfumo kutani ku simekiwa rhavi. Vo tala va lava a va ri kona a va nga si tshama va swi anakanya leswaku va ta vona ntirho wo tano lowu nhlengeletano yi wu hetisiseke. Nchumu wo tsakisa hi xiendlakalo lexi hi loko hinkwavo lava a va ri kona va pfumela hi mbilu hinkwayo loko David Splane xirho xa Huvo leyi Fumaka a nyiketela miako leyi yo saseka eka Yehovha.