Xana Swi Vula Yini Ku Va “Musamariya Wa Musa”?
Nhlamulo ya Bibele
Xiga lexi nge “Musamariya wa Musa” xi tirhisiwa ngopfu ku hlamusela munhu loyi a pfunaka van’wana. Xiga lexi xi huma eka xifaniso lexi Yesu a xi tirhiseke ku kombisa leswaku warikwerhu u pfuna van’wana swi nga ri mhaka leswaku i va tiko kumbe ndhavuko wihi.
Leswi hi nga ta bula haswona eka nhlokomhaka leyi
Xana xifaniso xa “Musamariya wa Musa” xi vulavula hi yini?
Hi ku komisa, Yesu u hlamusele xitori xexo hi ndlela leyi: Wanuna wa Muyuda a a ri endleleni yo ya eYeriko a suka eYerusalema. Hiloko a hlangana ni swigevenga leswi n’wi khomeke nkuzi, swi n’wi ba ivi swi n’wi siya a ri ekusuhi ni ku fa.
Ku rhange ku hundza muprista wa Muyuda. Endzhakunyana ku hundze murhangeri wa vukhongeri wa Muyuda naswona hinkwavo a va yimanga leswaku va pfuna wanuna yoloye la vavisekeke hambileswi a va ri va rixaka rin’we.
Eku heteleleni ku te wanuna un’wana loyi a a ri Musamariya. (Luka 10:33; 17:16-18) U fike a yima a n’wi twela vusiwana ni ku tlhela a n’wi bandicha timbanga takwe. Endzhaku ka sweswo, u n’wi yise endlwini ya vaendzi laha a fikeke a n’wi pfuna vusiku hinkwabyo. Hi siku leri landzelaka, u nyike n’wini wa yindlu mali leswaku a khathalela wanuna loyi ni ku tlhela a vula leswaku loko ko laveka mali leyi engetelekeke u ta vuya a ta yi hakela.—Luka 10:30-35.
Hikwalahokayini Yesu a tirhise xifaniso lexi?
Yesu u vulavule hi xifaniso lexi loko a byela wanuna loyi a a ehleketa leswaku warikwavo a ku ri vanhu va vukhongeri byakwe ni va rixaka leri fanaka ni ra yena ntsena. Ku engetela kwalaho, a a lava ku dyondzisa wanuna yoloye dyondzo ya nkoka ya leswaku “warikwavo” a hi Vayuda ntsena. (Luka 10:36, 37) Xifaniso lexi xi katsiwile eBibeleni leswaku ku ta pfuneka vanhu vo tala lava lavaka ku tsakisa Xikwembu.—2 Timotiya 3:16, 17.
Hi dyondza yini eka xifaniso lexi?
Xifaniso lexi xi hi dyondzisa leswaku warikwerhu u endla swo karhi ku kombisa leswaku u ni ntwelavusiwana. U pfuna un’wana ni un’wana loyi a lavaka ku pfuniwa swi nga ri na mhaka leswaku i wa rixaka, ndhavuko kumbe tiko rihi. Nakambe u khoma van’wana hilaha a lavaka ku khomiwa hakona.—Matewu 7:12.
A ku ri vamani Vasamariya?
Vasamariya a va tshama etikweni leri nga en’walungwini wa Yudiya. Nakambe a va ri vatukulu va Vayuda lava tekaneke ni vanhu lava nga riki Vayuda.
Hi nkarhi wa vaapostola va Yesu, Vasamariya se a va tisungulele vukhongeri bya vona. A va tshemba leswaku tibuku to sungula ta ntlhanu ta Matsalwa ya Xiheveru hi tona ntsena ti humaka eka Xikwembu.
Vayuda vo tala va le nkarhini wa Yesu a va venga Vasamariya ni ku tlhela va va papalata. (Yohane 4:9) Van’wana a va tirhisa xiga “Musamariya” ku va vungunya.—Yohane 8:48.
Xana xitori xa “Musamariya wa Musa” xi endlekile hakunene?
Matsalwa a ma boxi loko xitori xa Musamariya xi endlekile hakunene. Hambiswiritano, Yesu a a tolovele ku vulavula hi tindhawu ni swilo leswi vanhu a va swi toloverile loko a ri karhi a dyondzisa leswaku va ta hatla va kuma mongo.
Matimu ma kombisa leswaku vuxokoxoko byo tala bya xitori lexi i ntiyiso. Hi xikombiso:
Pato leri sukaka eYerusalema ri ya eYeriko ri lehe tikhilomitara to tlula 20 naswona ri rhelela hi mpfhuka wo ringana khilomitara. Matsalwa ma seketela mhaka leyi hikuva ma vula leswaku vanhu lava a va famba epatweni rolero va ya eYeriko a va “rhelela [va] suka eYerusalema.”—Luka 10:30.
Nkarhi ni nkarhi vaprista ni Valevhi lava a va tshama eYeriko a va famba hi patu leri loko va ya eYerusalema.
Mikarhi yo tala swigevenga a swi tumbelela vanhu epatweni leri, ngopfungopfu lava a va famba va ri voxe leswaku swi ta va khoma nkuzi