Ndzi Nga Endla Yini Loko Ndzi Tlule Nawu Wa Le Kaya?

Mindyangu yo tala yi ni milawu, yo tanihi ku vuya ekaya hi nkarhi, ndlela yo tirhisa thekinoloji ni mahanyelo, ku boxa swi nga ri swingani.

Ku ta endleka yini loko u tlule nawu wa le kaya? U nge swi cinci leswi nga endleka kambe u nga swi kota ku nga nyanyisi xiyimo. Nhlokomhaka leyi yi ta ku komba ndlela leyi u nga swi endlaka hayona.

• Leswi u nga fanelangiki u swi endla

• Ndlela leyinene yo swi lulamisa

• Leswi tintangha ta wena ti swi vulaka

Leswi u nga fanelangiki u swi endla

• Loko vatswari va wena va nga swi tivi leswaku u tlule nawu wa le kaya, u nga ringeka ku lahla vuthala.

• Loko va swi tiva leswaku u tlule nawu wa le kaya, u nga ringeka ku tiyimelela kumbe ku rhwexa van’wana nandzu.

Hinkwaswo leswi a hi magoza manene. Hikwalahokayini? Hikuva ku tumbeta leswi nga endleka kumbe ku tiyimelela a swi kombisi vutlhari. Swi kombisa ntsena leswaku a wu wupfanga.

“Ku hemba a swi kahle. Hi ku famba ka nkarhi ntiyiso wu ta humela erivaleni naswona nxupulo wa kona wu ta va wukulu ku tlula loko a wu vule swa ha ku endleka.”—Diana.

Ndlela leyinene yo swi lulamisa

• Pfumela nandzu wa wena. Bibele yi ri: “La fihlaka swidyoho swakwe a swi nge n’wi fambeli kahle.” (Swivuriso 28:13) Vatswari va wena va swi tiva leswaku u ta swi endla swihoxo. Xivutiso i ku, xana u nga swi kota ku vulavula ntiyiso?

  “Vatswari va wena va ta ku twelavusiwana loko u vulavula ntiyiso. Loko u vulavula ntiyiso va ta ya emahlweni va ku tshemba swinene.”—Olivia.

• Kombela ku rivaleriwa. Bibele yi ri: “Tivekeni ehansi ka van’wana.” (1 Petro 5:5) Swi lava ku titsongahata ku vula leswaku ndzi kombela u “ndzi rivalela” u nga kalanga u tiyimelela.

  “Vanhu lava tiyimelelaka va nga endla ripfalo ra vona ri nga ha tirhi. Hi ku famba ka nkarhi, loko u endla swilo swo biha ripfalo ra wena ri nge he ku karhati.”—Heather.

• Amukela vuyelo bya swiendlo swa wena. Bibele yi ri: “Yingisani ndzayo.” (Swivuriso 8:33) Papalata ku gungula naswona yingisa milawu hinkwayo leyi vatswari va wena va yi vekaka.

  “Loko u gungula loko va ku xupula, xiyimo xa wena xi to ya xi nyanya. Kuma ndlela yo amukela swipimelo sweswo naswona u nga ehleketi ngopfu hi leswi ku lahlekeleke.”—Jason.

• Endla leswaku va tlhela va ku tshemba. Bibele yi ri: “Cukumeta vumunhu bya khale lebyi fambisanaka ni ndlela leyi a [wu] hanya ha yona khale.” (Vaefesa 4:22) Yana emahlweni u endla leswinene.

  “Loko nkarhi ni nkarhi u endla swiboho leswinene naswona u komba vatswari va wena leswaku a wu nge tlheli u endla xihoxo lexi fanaka, va ta tlhela va ku tshemba.”—Karen.

LEXI NGA KU PFUNAKA: Endla leswi engetelekeke ku endlela leswaku va ku tshemba. Hi xikombiso, loko u tihumesile, tivisa vatswari va wena loko u ri eku vuyeni hambi ku ri hileswaku a wu nge hlweli ku vuya. Leswi swi ta endla va swi xiya leswaku ‘ndzi lava va tlhela va ndzi tshemba.’