Hikwalahokayini Vatswari Va Mina Va Nga Swi Lavi Leswaku Ndzi Tiphina?

Vanghana va wena va ku rhambe enkhubyeni hi mahelovhiki. U vutisa vatswari va wena loko va pfumela leswaku u ya kambe va hlamula hi ku tiyisa va ku, “Doo!” Nhlamulo yoleyo a yi ku hlamarisi. Ya fana ni leswi va swi vuleke enkarhini lowu hundzeke.

Eka nhlokomhaka leyi

• Hikwalahokayini vatswari va mina va tshamela ku ala?

• Ndzi nga endla yini leswaku vatswari va mina va pfumela?

• Leswi tintangha ta wena ti swi vulaka

Hikwalahokayini vatswari va mina va tshamela ku ala?

Loko swi tikomba onge vatswari va wena va tshamela ku ala, u nga ha gimeta hi ku vula leswaku a va swi lavi leswaku u tiphina.

Muntshwa loyi a vuriwaka Marie u titwe hi ndlela yoleyo loko a kuma foni ro sungula. U ri: “Papa u veke swipimelo mayelana ni ti-app leti ndzi nga ti dawunilodaka, vanhu lava ndzi nga vulavulaka na vona ni nkarhi lowu ndzi nga hetaka ku vulavula na vona ha wona. Kasi vanghana va mina va nga endla xin’wana ni xin’wana lexi va xi lavaka!”

Leswi u nga ehleketaka ha swona: Xana tata wa Marie a tiyimisele ku n’wi sivela ku tiphina? I yini swin’wana leswi nga ha vaka swi vilerise tata wakwe?

Ringeta leswi: Titeke u ri mutswari naswona u ni muntshwa loyi a ha ku kumaka foni. Hi swihi swilo leswi a swi ta ku vilerisa? A wu ta veka swipimelo swihi leswaku u nga karhateki? A wu ta ku yini loko muntshwa wa wena a ku byela leswaku a wu swi lavi leswaku a tiphina?

“Tatana a tshamela ku vula a ku, ‘Tiveke exiyin’weni xa mina tanihi mutswari.’ Sweswo swi endle ndzi nga voni nkoka wa milawu yakwe ntsena kambe ndzi vona ni swivangelo swa yona. Loko a ndzi ri ni vana, ndzi ehleketa leswaku a ndzi ta langutela leswi fanaka ni leswi tatana a swi languterile eka mina.”—Tanya.

Ndzi nga endla yini leswaku vatswari va mina va pfumela?

Papalata ku endla leswi: U nga bohani, u gungula kumbe u phikizana na vona.

“Ku holova a swi pfuni nchumu, ku ri na sweswo swi heta wena ni vatswari va wena matimba. Loko u phikizana na vona, vatswari va wena va ta ku teka u ri xihlangi naswona u nga faneriwi hi tshunxeko lowu engetelekeke.”—Richard.

“Hi ntolovelo, nawu wun’wana ni wun’wana wu ni xikongomelo lexinene. Vatswari va mina a va ringeti ku ndzi sivela ku tsaka kambe va lava ndzi tiphina hi ndlela leyinene ku nga ntsako lowu nga taka wu nga ndzi vangeli swiphiqo.”—Ivy.

Nsinya wa nawu wa le Bibeleni: “Xiphukuphuku xi kombisa ku kariha ka xona, kambe lowo tlhariha u tshama a rhurile.”—Swivuriso 29:11.

U nga endli leswi: U nga endli swilo vatswari va wena va nga swi tivi.

“Ndzi ringete ku tlula swipimelo leswi tatana a swi vekeke mayelana ni ku tirhisa foni ya mina. Ndzi ringete ku kuma tindlela to bula ni vanghana va mina exikarhi ka vusiku ni ku dawuniloda ti-app leti tatana a nga ti laveki. Hi ku famba ka nkarhi u swi vonile naswona u engetele swipimelo hikuva a nga ha ndzi tshembi. A swi kahle ku endla swilo vatswari va nga swi tivi.”—Marie.

“Lehisa mbilu. Swi nga ha teka nkarhi leswaku vatswari va wena va cinca nawu kambe loko va vona leswaku u landzela milawu hinkwayo leyi va yi vekeke, va nga ha ku nyika tshunxeko lowu engetelekeke.”—Melinda.

Nsinya wa nawu wa le Bibeleni: “Yingisani vatswari va n’wina eka swilo hinkwaswo.”—Vakolosa 3:20.

U nga endli leswi: U nga tikiseli vatswari va wena kumbexana hi ku va byela leswi tintangha ta wena ti pfumeleriweke ku swi endla.

“Ku lava ku endla swilo hi ndlela ya wena swi nge ku oloviseli swilo kumbe ku endla leswaku u kuma leswi u swi lavaka.”—Natalie.

“Mutswari u lava ku vona loko u kota ku hambanisa leswinene ni leswi hoxeke, Kutani loko ndzi vulavula ni vatswari va mina ndzi ringeta ku tirhisa leswi ndzi swi twisisaka ku tlula ndlela leyi ndzi titwaka hayona hi mhaka yo karhi. Loko ndzi endla sweswo, ndza humelela swinene.”—Joseph.

Nsinya wa nawu wa le Bibeleni: “Xixima tata wa wena ni mana wa wena.”—Vaefesa 6:2.