Vantshwa Va Vutisa

Ha Yini Vatswari Va Mina Va Nga Ndzi Pfumeleli Leswaku Ndzi Tiphina?

Allisona muntshwa wa le Australia, u tshamela ku va ni ntshikilelo Musumbhunuku wun’wana ni wun’wana exikolweni.

U ri: “Vanhu hinkwavo va vulavula hi leswi va swi endleke hi mahelo-vhiki. Va vulavula hi switori leswi tikombaka swi tsakisa nileswaku i swinkhubyana swingani leswi va yeke eka swona nileswaku i majaha mangani lawa va ntswontswaneke na wona—hambi ku ri ku vula leswaku va balekele maphorisa . . . Swi tikomba swi chavisa kambe swi tlhela swi tsakisa! Va vuya ekaya hi awara ya ntlhanu nimixo naswona vatswari va vona a va na mhaka na swona. Ndzi fanele ndzi va ndzi etlele va nga si sungula ku tiphina!

“Endzhaku ka loko vadyondzi-kulorhi va ndzi rungulele leswi va swi endleke hi mahelo-vhiki, va kombele leswaku ndzi va byela leswi ndzi swi endleke. Ni leswaku ndzi endle yini? Ndzi ye eminhlanganweni ya Vukreste ni le nsin’wini. A ndzi vona onge a ndzi tiphinanga. Hikwalaho a ndzi tala ku va byela leswaku a ndzi nga endli nchumu. Kutani va ndzi vutisa leswaku hikwalaho ka yini ndzi nga fambanga na vona.

“Loko Musumbhunuku wu hundzile, u ta ehleketa leswaku swi ta antswa. Kambe a swi tano. Hi Ravumbirhi, vanhu hinkwavo va vulavula hi mahelo-vhiki lama nga kwala nyongeni! A ndzi tala ku tshama ndzi va yingisela loko va ri karhi va vulavula. Ndzi titwa onge ndzi lahlekile!”

XANA hi Musumbhunuku wun’wana ni wun’wana ni mixo u titwa hi ndlela leyi fanaka loko u ri exikolweni? U nga ha vona onge ku ni swilo swo tala swo tsakisa kambe vatswari va wena a va ku pfumeleli leswaku u tiphina ha swona—kumbe u tivona onge u le ndhawini yo tlangela eka yona kambe a wu pfumeleriwi ku tlangisa swilo leswi nga kwalaho. Sweswo a swi vuli swona leswaku u lava ku endla swilo hinkwaswo leswi tintangha ta wena ti swi endlaka. Kambe u nga ha va u lava ku tiphina kan’we endzhaku ka nkarhi wo leha! Hi xikombiso, hi swihi swilo leswi u nga tsakelaka ku tiphina ha swona hi mahelo-vhiki lawa?

◯ ku cina

◯ khonsati

◯ tifilimi

◯ swinkhubyana

◯ swin’wana ․․․․․

Wa swi lava ku titsakisa. (Eklesiasta 3:1, 4) Kahle-kahle, Muvumbi wa wena u lava leswaku u tiphina hi vuntshwa bya wena. (Eklesiasta 11:9) Hambileswi minkarhi yin’wana u nga ha kanakanaka, vatswari va wena na vona va lava leswaku u tiphina. Hambiswiritano, vatswari va wena va nga ha karhateka hikwalaho ka swivangelo swimbirhi leswi twalaka: (1) hi leswi u nga ta swi endla ni (2) loyi u nga ta famba na yena.

Kambe ku vuriwa yini hi loko u rhambiwe endhawini yo karhi ni vanghana va wena kambe u nga tiyiseki hi leswi vatswari va wena va nga ta swi vula? Loko u fanele u endla xiboho, Bibele yi ku khutaza leswaku u kambisisa swiboho leswi u nga ha swi endlaka, leswinene ni leswo biha nileswaku u kambisisa vuyelo bya kona. (Deteronoma 32:29; Swivuriso 7:6-23) Hi xihi xiboho lexi u nga xi endlaka malunghana ni xirhambo lexi humaka eka vanghana va wena?

XIBOHO A: U NGA KOMBELI—FAMBA.

Leswi endlaka leswaku u kambisisa xiboho lexi: U lava ku komba vanghana va wena leswaku wa tilawula. U vona onge u tiva ku tlula vatswari va wena kumbe a wu swi xiximi swiboho swa vona.—Swivuriso 15:5.

Vuyelo bya kona: Vanghana va wena va ta dyondza swo karhi eka wena—leswaku u nga va xenga. Loko u kanganyisa vatswari va wena, swi vula leswaku u nga ha va kanganyisa ni vanghana va wena. Loko vatswari va wena va swi kuma, va ta twa ku vava naswona va ta vona onge u va xengile naswona a va nge he ku pfumeleli ku ya etindhawini teto! Ku honisa milawu ya vatswari va wena kutani u hlawula ku ti fambela u ya laha u lavaka kona handle ka mpfumelelo i vuphukuphuku.—Swivuriso 12:15.

XIBOHO B: U NGA KOMBELI—U NGA FAMBI.

Leswi endlaka leswaku u kambisisa xiboho lexi: U nga ha anakanya hi xirhambo xexo kutani u vona onge a hi xinene kumbe u vona onge vanhu van’wana lava rhambiweke a va na mahanyelo lamanene. (1 Vakorinto 15:33; Vafilipiya 4:8) Hi hala tlhelo u nga ha va u lava ku famba kambe u chava ku kombela eka vatswari va wena.

Vuyelo bya kona: Loko u nga yi hikwalaho ka leswi u swi vonaka leswaku swi hoxile, u ta va ni xivindzi loko u hlamula vanghana va wena. Kambe loko u nga yi hikwalaho ko pfumala xivindzi xo kombela eka vatswari va wena, u nga ha tikuma u tshame ekaya u ri eku vileleni u vona onge hi wena ntsena loyi a nga tiphiniki hi vutomi.

XIBOHO C: KOMBELA—U VONA LOKO VA TA KU PFUMELELA.

Leswi endlaka leswaku u kambisisa xiboho lexi: Wa byi xiya vutihlamuleri lebyi vatswari va wena va nga na byona eka wena naswona u xixima swiboho leswi va swi endlaka. (Vakolosa 3:20) Wa va rhandza naswona a wu swi lavi ku va twisa ku vava hi ku nyenga u famba ni vanghana va wena handle ka mpfumelelo wa vona. (Swivuriso 10:1) Na wena u ni nkarhi wo va byela ndlela leyi u titwaka ha yona.

Vuyelo bya kona: Vatswari va wena va swi xiya leswaku wa va rhandza naswona wa va xixima. Loko va xi twisisa xikombelo xa wena, va nga ha ku pfumelela.

Lexi Nga Ha Endlaka Leswaku Vatswari Va Ku Alela

Ku vuriwa yini loko vatswari va wena va ku alela? Sweswo swi nga ha ku heta matimba. Hambiswiritano, ku twisisa langutelo ra vona swi nga ha ku pfuna leswaku u kota ku pfumelelana ni swiboho swa vona. Hi xikombiso, va nga ha ala hikwalaho ka swin’wana swa swivangelo leswi landzelaka.

Vutivi ni ntokoto. Loko a wo kota ku tihlawulela, a swi kanakanisi leswaku a wu ta hlawula ku hlambela elwandle leri nga ni varindzi. Ha yini? Hikuva loko u ri karhi u tiphina hi ku hlambela, a wu swi koti ku vona makhombo lawa ma nga ha vaka kona kambe varindzi va yime endhawini leyinene laha va nga kotaka ku vona makhombo lama nga ha endlekaka.

Hilaha ku fanaka, hikwalaho ka vutivi ni ntokoto lowu va nga na wona, vatswari va wena va nga ha xiya makhombo lawa u nga ma voniki. Ku fana ni varindzi va le lwandle, xikongomelo xa vatswari va wena a hi ku ku tsona ntsako kambe va lava ku ku pfuna leswaku u papalata ku weriwa hi makhombo lama nga ha ku hetelaka ntsako evuton’wini.

Va ku rhandza. Vatswari va wena va tiyimisele ku ku sirhelela. Ndlela leyi va ku rhandzaka ha yona yi va susumetela ku pfumela ni ku ala loko swi fanerile. Loko u kombela mpfumelelo wo endla swo karhi eka vona, va ti vutisa loko va fanele va ku pfumelela leswaku u famba niloko va ta swi kota ku langutana ni vuyelo lebyi nga ha vaka kona. Va nga ha pfumelelana na wena loko va tiyiseka leswaku ku hava xo biha lexi nga ta ku humelela.

Loko u tumbeta swo karhi. Vatswari lava nga ni rirhandzu va ta ku pfumelela ku ya endhawini leyi sirhelelekeke. Loko va nga swi twisisi kahle leswi u swi kombelaka, kumbe loko va vona onge u tumbeta swo karhi, va nga ha ku alela ku famba.

Ndlela Yo Endla Leswaku Vatswari Va Wena Va Ku Pfumelela

Tinhla leti ta mune ti nga ku pfuna.

Ku tshembeka: Xo sungula u fanele u tivutisa: ‘Ha yini ndzi lava ku famba? Xana i ntlango lowu ndzi wu rhandzaka kumbe ndzo lava ku amukeleka eka tintangha ta mina? Ndzi ya kona hileswi ku nga ni munhu loyi ndzi n’wi rhandzaka?’ Kutani tshembeka eka vatswari va wena. Na vona va tshame va va vana naswona va ku tiva ku antswa. Xisweswo, va ta tsakela ku twisisa leswi ku susumetelaka ku lava ku ya endhawini yoleyo. Va ta tsaka loko u va byela ntiyiso naswona u ta vuyeriwa hi vutlhari lebyi va nga na byona. (Swivuriso 7:1, 2) Hi hala tlhelo loko u nga tshembeki, u endla leswaku vatswari va wena va nga ha ku tshembi naswona va ku alela ku ya laha u lavaka ku ya kona.

Vuxiya-xiya: Loko vatswari va wena va vuya hi le ntirhweni kumbe loko va ha khomekile hi timhaka tin’wana u nga nambi u va kombela ku ya endhawini yo karhi. Yana eka vona loko va nga khomekanga. Kambe u nga yimi kukondza ku fika siku leri u faneleke u famba ha rona kutani u va sindzisa ku hlamula hi ku hatlisa. Vatswari va wena a va nge swi tsakeli ku endla xiboho hi ku hatlisa. Kombela ka ha ri ni nkarhi, kutani va ta tsaka hileswi u va anakanyelaka.

Bana nhloko ya mhaka: U nga va tumbeteli nchumu. Va byele leswi u lavaka ku swi endla. Vatswari a va yi twisisi nhlamulo yo tanihi leyi nge, “A ndzi swi tivi,” ngopfu-ngopfu loko va vutisa leswaku: “I va mani lava nga ta va kona?” “Xana ku ta va ni munhu lonkulu loyi a nga ta lawula ntlangu wolowo?” kumbe “Wu ta hela nkarhi muni ntlango wa kona?”

Va na ni langutelo lerinene: U nga languti vatswari va wena tanihi valala. Va teke tanihi vanhu lava lavaka ku ku pfuna hikuva swilo hinkwaswo leswi nga ta ku humelela hi vona va nga ni vutihlamuleri. Loko u teka vatswari va wena tanihi vanghana, swi ta endla leswaku u vulavula na vona hi ndlela leyinene, xisweswo va ta kota ku ku pfuna. Loko va ala, hi ku titsongahata va vutise leswaku ha yini va ala. Hi xikombiso, loko va ku alela ku ya ekhonsatini, ringeta ku twisisa xivangelo xa vona. Xana va vilerisiwa hi xiyimbeleri? ndhawu? vanhu lava u nga ta famba na vona? kumbe, mali yo nghena? Papalata ku vula marito yo fana ni lawa “Xana a mi ndzi tshembi,” “Vanhu hinkwavo va ya kona” kumbe “Vatswari va vanghana va mina va va pfumelerile leswaku va famba!” Kombisa vatswari va wena leswaku se u kurile hi ku amukela xiboho xa vona ni ku xi xixima. Loko u endla tano na vona va ta ku xixima. Enkarhini lowu taka va nga ha ku pfumelela leswaku u famba.

Swihloko swin’wana leswi nge “Vantshwa Va Vutisa” swi kumeka eka Website leyi nge www.watchtower.org/ype

[Nhlamuselo ya le hansi]

[Bokisi/Xifaniso lexi nga eka tluka 11]

“Vatswari va mina va ndzi tshemba, ngopfu-ngopfu hileswi ndzi endlaka swilo hi laha va lavaka ha kona. Ndzi va byela xin’wana ni xin’wana hi vanghana va mina. Nakambe a ndzi chavi ku suka ndzi famba loko ndzi vona leswaku xinkhubyana lexi ndzi nga eka xona a xi lawuleki.”

[Xifaniso]

Kimberly

[Bokisi leri nga eka tluka 12]

HA YINI U NGA VUTISI VATSWARI VA WENA?

Xana u lava ku tiva leswaku vatswari va wena va ri yini hi mhaka leyi ku buriweke ha yona eka xihloko lexi? Ndlela leyinene yo kuma nhlamulo i ku va vutisa! Loko nkarhi wu pfumela, sungula bulo malunghana ni ndlela leyi va titwaka ha yona hi ndlela leyi u nga titsakisaka ha yona. Anakanya hi xivutiso lexi u lavaka ku va vutisa xona kutani u xi tsala laha hansi.

․․․․․

[Xifaniso lexi nga eka tluka 12]

Ku fana ni varindzi va le lwandle, vatswari va wena va le xiyin’weni lexinene xo ku tsundzuxa hi makhombo lama nga ha ku humelelaka