Xana U Heleriwe Hi Ntirho? Milawu Ya Le Bibeleni Leyi Nga Ku Pfunaka

Loko u heleriwe hi ntirho swi nga ku tikela swinene, ku nga ri hi tlhelo ra timali ntsena kambe ku tiva leswaku a wu nge vi na yona mali yo xavela ndyangu wa wena leswi wu swi lavaka swi nga ku tshikilela emiehleketweni. Xiya swiringanyeto swa vutlhari leswi kumekaka eka milawu ya le Bibeleni leswi nga ku pfunaka leswaku u tiyisela xiyimo xexo.

• Vulavula ni van’wana hi ndlela leyi u titwaka hayona.

  Leswi Bibele yi swi vulaka: “Munghana wa ntiyiso u kombisa rirhandzu mikarhi hinkwayo.”—Swivuriso 17:17.

  Loko wa ha ku heleriwa hi ntirho, u nga ha hela matimba, u titwa u pfilunganyekile kumbe u ti vona u ri mutsandzeki. Loko u vulavula ni swirho swa ndyangu wa wena ni vanghana hi ndlela leyi u titwaka hayona, va ta ku seketela. Va ta tlhela va ku nyika ni switsundzuxo leswi nga ku pfunaka leswaku u kuma ntirho.

• Papalata ku tshamela ku vilela.

  Leswi Bibele yi swi vulaka: “Mi nga tshuki mi vilela hi siku leri landzelaka hikuva siku leri landzelaka ri ta va ni mivilelo ya rona.”—Matewu 6:34.

  Bibele yi hi khutaza ku kunguhata swa le mahlweni ka ha ri ni nkarhi. (Swivuriso 21:5) Kambe yi tlhela yi hi khutaza ku papalata ku tshamela ku vilela hi vumundzuku. Hakanyingi hi tikuma hi ri karhi hi vilela hi swilo leswi nga ta ka swi nga endleki. I swa nkoka ku dzikisa miehleketo ya wena eka siku leri u langutaneke na rona.

  Bibele yi ni switsundzuxo swa vutlhari leswi nga ku pfunaka u kota ku hlula xitirese lexi u nga ha vaka na xona sweswi. Leswaku u dyondza swo tala hi mhaka leyi, hlaya nhlokomhaka leyi nge: “U Nga Xi Hlula Njhani Xitirese?”

• Cinca ndlela leyi u yi tirhisaka hayona mali ya wena.

  Leswi Bibele yi swi vulaka: “Ndzi dyondze . . . ku va ni swo tala ni ku pfumala.”—Vafilipiya 4:12.

  Fambisana ni xiyimo lexi u nga eka xona sweswi. Leswi swi vula ku cinca ndlela leyi u yi tirhisaka hayona mali ya wena leswaku u nga tikumi u tirhise mali hinkwayo. Tivoneli eka ku tinghenisa eswikweletini swi nga bohi.—Swivuriso 22:7.

  Leswaku u kuma swiringanyeto leswi engetelekeke leswi nga ku pfunaka leswaku u fambisana ni xiyimo xa mali leyi u nga na yona sweswi, hlaya nhlokomhaka leyi nge: “Ndlela yo hanya hi swimalana.”

• Tirhisa nkarhi wa wena hi vutlhari.

  Leswi Bibele yi swi vulaka: “Yanani emahlweni mi hanya hi vutlhari . . . , mi wu tirhisa kahle nkarhi wa n’wina.”—Vakolosa 4:5.

  Hambileswi sweswi u nga ha riki na xona xiyimiso xa wena xo ya entirhweni kambe u fanele u pulana ndlela yo wu tirhisa kahle nkarhi wa wena. Sweswo swi ta ku pfuna leswaku u hleleka evuton’wini bya wena naswona swi ta ku endla u nga vileli hi nchumu.

• Fambisana ni ku cinca ka swiyimo.

  Leswi Bibele yi swi vulaka: “Swa vuyerisa ku endla ntirho wun’wana ni wun’wana wo tika.”—Swivuriso 14:23.

  Tiyimiseli ku endla leswi hambaneke ni leswi a wu tolovele ku swi endla. Swi nga ha lava u tiyimisela ku lava mitirho leyi vonakaka yi nga pfuni nchumu kumbe leyi holelaka swimalana leswi nga ringaniki ni mali leyi a wu yi hola.

• Yana emahlweni u lava ntirho.

  Leswi Bibele yi swi vulaka: “Byala mbewu ya wena nimixo naswona u nga wisi ku fikela nimadyambu; hikuva a wu swi tivi leswaku ku ta mila yihi.”—Eklesiasta 11:6.

  Yana emahlweni u lava ntirho. Byela van’wana leswaku u le ku laveni ka ntirho. Vulavula ni maxaka, vanghana, lava a wu tirha na vona khale ni vaakelani va wena. Tlhela u vulavurisana ni lava pfunaka vanhu ku kuma mitirho ni ku langutisa swinavetiso eka ti-website ta tikhampani leti nga ni mitirho. Tsundzuka leswaku u ta boheka ku kamberiwa eka mitirho yo hambanahambana naswona u fanele u hangalasa swikombelo swa ntirho etindhawini to hlaya.