Ntirho Wa N’wina Wu Seketeriwa Njhani Hi Timali?

Timbhoni ta Yehovha hi tona to sungula ku nyikela eka ntirho wa tona wa misava hinkwayo.a Etindhawini leti hi hlanganyelaka eka tona ku ni mabokisi ya minyikelo naswona tindlela tin’wana to nyikela ti xaxametiwe eka tluka ra hina leri nge Minyikelo. Eka tluka rolero ku ni tindlela to hambanahambana leti munhu a nga ti tirhisaka ku nyikela. A nga nyikela eka ntirho wa misava hinkwayo kumbe a nyikela eka mali ya swilaveko swa vandlha kumbe a ti tirhisa hinkwato.

Timbhoni ta Yehovha a ti languteriwanga ku humesa vukhume kumbe ku nyikela hi mali yo karhi kumbe tiphesente to karhi ta muholo wa tona. (2 Vakorinto 9:7) A hi hakerisa mali yo nghena etinhlengeletanweni ta hina naswona vatirheli va hina a va hakerisi mali loko va khuvula, loko va fambisa nkosi, mucato kumbe loko va endla mitirho yin’wana ya vukhongeri. A hi hlengeleti mali hi ku xavisa swakudya, hi famba hi kombela minyikelo eka vanhu kumbe hi tirhisa tin’wana tindlela to fana ni teto. A hi swi paluxi leswaku i mani loyi a nga nyikela. (Matewu 6:2-4) Tiwebsite ni mikandziyiso ya hina a swi na swinavetiso leswi hi kumaka mali eka swona loko hi swi navetisa.

Vandlha rin’wana ni rin’wana ra Timbhoni ta Yehovha ri tivisa swirho swa rona mali leyi nyikeriweke ni ndlela leyi yi tirhisiweke ha yona etinhlengeletanwini ta vandlha swi twiwa hi un’wana ni un’wana. Tirhekhodo ta timali ta vandlha rin’wana ni rin’wana ta kambisisiwa nkarhi na nkarhi ku tiyisekisa leswaku mali leyi nyikeriwaka yi tirhisiwa kahle.—2 Vakorinto 8:20, 21.

Tindlela To Nyikela

• Mabokisi ya minyikelo: U nga nyikela hi mali kumbe hi cheke emabokisini ya minyikelo eTiholweni ta Mfumo, eTiholweni ta Tinhlengeletano kumbe etindhawini tin’wana laha tinhlengeletano ta hina ti khomeriwaka kona.

• Ku nyikela eka Internet: Ematikweni yo tala, u nga ha tirhisa tluka leri nge “Donate to Jehovah’s Witnesses” leswaku u nyikela hi ku tirhisa ti-credit card, ti-debit card, ku rhumela mali hi bangi ni tindlela tin’wana ta elektroniki to nyikela ha tona.b Timbhoni tin’wana ti hlawula ku “veka swo karhi etlhelo” hi ku tirhisa maendlelo lama boxiweke laha henhla leswaku n’hweti yin’wana ni yin’wana ku va ni mali leyi kokiwaka ebangi leswaku ti nyikela.—1 Vakorinto 16:2.

  

• Ku nyikela loku kunguhatiweke: Maendlelo man’wana yo nyikela ma lava ku kunguhata ka ha ri emahlweni kumbe ku kuma xitsundzuxo eka swa nawu. Ndlela yoleyo yo kunguhata yi nga ha endla u hunguteriwa xibalo hi ndlela yo karhi etikweni ra ka n’wina. Vanhu vo tala va vuyeriwile hi ku va va tiva endlelo ro nyikela hi swilo swo karhi eka minhlangano yo karhi loko munhu a ha hanya kumbe loko se a file. Hi kombela u vulavurisana na rhavi ra Timbhoni ta Yehovha leswaku u kuma vuxokoxoko lebyi engetelekeke loko u tsakela ku nyikela hi swilo leswi landzelaka:

  • tiakhawunti ta bangi

  • mali ya ndzindzakhombo kumbe mali leyi munhu a yi kumaka loko a tshika ntirho

  • tindlu

  • tixere ni mali leyi lombisiweke hi ntswalo

  • tiwili

Leswaku u kuma rungula leri engetelekeke hi maendlelo yo nyikela lama tirhaka etikweni ra ka n’wina, vona tluka leri nge “Donate to Jehovah’s Witnesses.”