Xana U Kona Loyi Hakunene A Swi Tivaka Leswaku Mutsari Wa Bibele I Mani?

Nhlamulo ya Bibele

Vanhu vo tala va byeriwa leswaku a va nge swi tihi hi ku helela leswaku i mani la tsaleke Bibele. Kambe Bibele yi swi veka erivaleni leswaku i mani mutsari wa yona. Tibuku tin’wana ta yona ti sungula hi marito yo tanihi lama nge “marito ya Nehemiya,” “xivono xa Esaya,” ni lama nge “rito ra Yehovha leri fikeke eka Yuwele.”—Nehemiya 1:1; Esaya 1:1; Yuwele 1:1.

Vatsari vo tala va Bibele a va nga kanakani leswaku Yehovha, Xikwembu xi ri xin’we xa ntiyiso, hi yena loyi a a va kongomisa entirhweni wa vona wo tsala. Vaprofeta lava tsaleke Matsalwa ya Xiheveru va vule minkarhi leyi tlulaka 300 marito lama nge: “Yehovha u te.” (Amosi 1:3; Mikiya 2:3; Nahume 1:12) Vatsari van’wana a va kuma rungula ra Xikwembu eka tintsumi.—Zakariya 1:7, 9.

Bibele yi tsariwe hi vavanuna va kwalomu ka 40 hi nkarhi lowu ringanaka malembe ya 1 600. Van’wana va tirhisiwe ku tsala tibuku ta Bibele to tlula yin’we. Entiyisweni, Bibele i layiburari leyitsongo ya tibuku ta 66. Yi ni tibuku ta 39 ta Matsalwa ya Xiheveru, lawa vo tala va ma vitanaka Testamente ya Khale, naswona yi ni tibuku ta 27 ta Matsalwa ya Vukreste ya Xigriki, lawa hakanyingi ma vitaniwaka Testamente Leyintshwa.