Leswi Tameriweke Hi Buku Leyi

Munhu loyi a nghenaka elayiburari ro sungula a nga ha kuma nxaxamelo wa tibuku wu ri lowu pfilunganyaka. Kambe loko a hlamuseriwanyana hi ndlela leyi tibuku leti ti xaxametiweke ha yona, a nga hlweli ku dyondza ndlela leyi a nga kumaka tibuku to karhi ha yona. Hi ku fanana, ku lavisisa mhaka yo karhi eBibeleni swa olova loko u twisisa ndlela leyi leswi yi swi tameleke swi xaxametiweke ha yona.

RITO leri nge “Bibele” ri huma eka rito ra Xigriki bi·bliʹa, leri vulaka “swiputsa swa xitheve” kumbe “tibuku.”¹ Kahle-kahle Bibele i nhlengeleto—layiburari—wa tibuku ta 66, leti tsariweke malembe ya kwalomu ka 1 600, ku sukela hi 1513 B.C.E. ku ya kwalomu ka 98 C.E.

Tibuku to sungula ta 39, leti vumbaka xiphemu xa nharhu-xa-mune xa leswi tameriweke hi Bibele, ti vuriwa Matsalwa ya Xiheveru, tanihi leswi ngopfu-ngopfu a ti tsariwe hi ririmi rero. Hi ntolovelo tibuku leti ti nga avanyisiwa hi mintlawa yinharhu: (1) Matimu, Genesa ku ya eka Estere, tibuku ta 17; (2) Vutlhokovetseri, Yobo ku ya eka Risimu ra Tinsimu, tibuku ta ntlhanu; ni (3) Vuprofeta, Esaya ku ya eka Malakiya, tibuku ta 17. Matsalwa ya Xiheveru ma hlanganisa matimu yo sungula ya misava ni ya vanhu kun’we ni matimu ya tiko ra khale ra Israyele ku sukela eku simekiweni ka rona ku ya eka lembe-xidzana ra vuntlhanu B.C.E.

Tibuku letin’wana ta 27 ti tiviwa ti ri Matsalwa ya Vukreste ya Xigriki, hikuva a ti tsariwe hi Xigriki, ku nga ririmi leri a ri tirhisiwa ematikweni hinkwawo enkarhini wolowo. Kahle-kahle ti xaxametiwe hi ku landza tinhloko-mhaka ta kona: (1) tibuku ta ntlhanu ta matimu—Tievhangeli na buku ya Mintirho, (2) mapapila ya 21 na (3) buku ya Nhlavutelo. Matsalwa ya Vukreste ya Xigriki ngopfu-ngopfu ma vulavula hi tidyondzo ni mintirho ya Yesu Kreste ni vadyondzisiwa vakwe eka lembe-xidzana ro sungula C.E.