Ti Tirhise Kahle Tibuku Ta Khale

¹ Vanhu va hlayisa tibuku to tala swinene etilayiburari leti nga kona emisaveni hinkwayo. Kambe, xana ti ri nyikile rixaka ra vanhu mpfuno lowu nga heriki? (Ekl. 12:12) Tibuku leti nga ta nkoka swinene hi leti kokelaka nyingiso eka Mfumo wa Xikwembu ni le ka leswi wu nga ta swi endlela vanhu. Mavandlha yo tala ma na tona tibuku to tano to hambana-hambana, leti kandziyisiweke emahlweni ka 1986. Leswi n’hweti leyi yi nga yo hetelela eka tsima ra nsimu leyi nga aviwangiki, hi fanele hi xalamukela ku fambisela vanhu tibuku leti.

² Ti Ni Nkoka Wa Xiviri: Hambileswi van’wana va hina hi nga ha vaka ni langutelo ra leswaku tibuku leti ti hundzeriwe hi nkarhi loko ti pimanisiwa ni tibuku ta hina letintshwa, hi fanele hi tsundzuka leswaku tibuku leti ti ni ntiyiso wa Matsalwa. Hikwalaho, hi fanele hi endla matshalatshala lamakulu ya ku ti tirhisa kahle tibuku leti ta khale ensin’wini ya hina ni le nsin’wini leyi nga aviwangiki.

³ Lexi kandziyisaka nkoka wa tona i ntokoto wa wansati loyi a kumeke tibuku to hlayanyana ta Watch Tower eka kokwa wakwe. Mbhoni yin’wana yi vutise wansati loyi loko a tiva nkoka wa tibuku teto. Wansati loyi u hlamule a ku: “A ndzi wu tivi nkoka wa tona, kambe ndzi nga wu tiva njhani?” Wansati loyi u amukele dyondzo ya Bibele, a kuma ntiyiso kutani endzhaku ka sweswo a ti teka ti ri ta nkoka tibuku leti a ti kumeke eka kokwa wakwe. Kunene nhlengeleto wolowo wa tibuku ta khale wu ve ndzhaka ya nkoka!

⁴ Ti Fambise: Ku engetela eku fambiseni ka tibuku leti ta khale hi yindlu ni yindlu ni le nsin’wini leyi nga aviwangiki, tlhela u tiyiseka leswaku wa ti fambisa loko u endla maendzo yo vuyela eka vanhu lava u tivaka leswaku va rhandza ku hlaya tibuku ta hina, ku katsa ni lava va hambaka va kuma Xihondzo xo Rindza ni Xalamuka! ni lava va nga eka ntila wa wena ma timagazini. Eka lava u dyondzaka na vona Bibele, u nga ha hlawula tibuku tin’wana ta khale leti ti nga va nyikaka xisekelo xa vutivi lebyi nga ta va pfuna ku twisisa ntiyiso hi xitalo. U nga rivali ku tikumela tibuku ta khale leti wena hi wexe u nga riki na tona.

⁵ Ku ri ni ku tshama ni tibuku ta hina ta khale, a hi ti tirhiseni kahle leswaku ti susumeta vanhu lava hi hlanganaka na vona leswaku va ‘chava Xikwembu xa ntiyiso ni ku hlayisa swileriso swa xona.’—Ekl. 12:13.