Ri Tsariwe Rini Rungula Leri Vulavulaka Hi Yesu?

Nhlamulo ya Bibele

Loko muapostola Yohane a vulavula hi swiendlakalo swa vutomi bya Yesu leswi a tsaleke ha swona, u te: “Loyi a swi voneke u nyikele vumbhoni, vumbhoni byakwe i bya ntiyiso, naswona munhu yoloye wa swi tiva leswaku u vula swilo swa ntiyiso, leswaku na n’wina mi kholwa.”—Yohane 19:35.

Xivangelo xin’wana xo tshemba rungula ra Tievhangeli leri tsariweke hi Matewu, Marka, Luka na Yohane hileswaku ri tsariwe enkarhini lowu vo tala va lava voneke swiendlakalo leswi va tsaleke ha swona a va ha hanya. Hi ku ya swihlovo swin’wana, Evhangeli ya Matewu yi tsariwe eku sunguleni ka lembe ra vunhungu endzhaku ka loko Kreste a file, ku nga kwalomu ka lembe ra 41 C.E. Swidyondzi swo tala swi vula leswaku yi tsariwe endzhaku ka lembe rero, kambe ku ni vumbhoni lebyi khomekaka bya leswaku tibuku hinkwato ta Matsalwa ya Vukreste ya Xigriki ti tsariwe hi lembe-xidzana ro sungula C.E.

Vanhu lava voneke Yesu loko a nga si dlayiwa, loko a fa niloko se a pfuxiwile, va nga tiyisekisa leswaku rungula ra Tievhangeli i ntiyiso. Nakambe a va ta vula loko ku tsariwe swin’wana leswi nga riki ntiyiso. Profesa F. F. Bruce u ri: “Vaapostola vo sungula a va chumayela rungula leri ana se vayingiseri va vona a va ri tiva; naswona a va vulanga ntsena va ku, ‘Hi timbhoni ta swilo leswi,’ kambe va tlhele va ku, ‘Hilaha na n’wina mi tivaka hakona’ (Mintirho 2:22).”