Xana Vukhongeri, Xikwembu Kumbe Bibele Swi Nga Ndzi Pfuna Leswaku Ndzi Tsakela Vutomi?
Nhlamulo ya Bibele
Ina. Bibele, ku nga buku ya khale ya vutlhari, yi nyikela tinhlamulo ta swivutiso swa nkoka evuton’wini naswona yi nga ku pfuna leswaku u va ni ntsako ni rihanyo lerinene. Kambisisa swivutiso swin’wana leswi yi swi hlamulaka.
Xana Muvumbi u kona? Bibele yi ri Xikwembu xi “tumbuluxe swilo hinkwaswo.” (Nhlavutelo 4:11) Tanihi Muvumbi wa hina, Xikwembu xa swi tiva leswi hi swi lavaka leswaku hi titwa hi enerisekile ni ku kuma ntsako evuton’wini.
Xana Xikwembu xa khathala hi mina? Ematshan’weni yo va yi vulavula hi Xikwembu tanihi lexi nga riki na mhaka ni vanhu, Bibele yi ri: ‘A xi le kule ngopfu ni un’wana ni un’wana wa hina.’ (Mintirho 17:27) Xi swi tekela enhlokweni swilo leswi ku humelelaka naswona xi tiyimesele ku ku pfuna leswaku u humelela evuton’wini.—Esaya 48:17, 18; 1 Petro 5:7.
Ku tiva Xikwembu swi nga ndzi pfuna njhani ndzi tsaka? Xikwembu xi hi vumbe hi ri ni ‘xilaveko xa moya,’ ku nga ndlala yo lava ku twisisa hlamuselo ni xikongomelo xa vutomi. (Matewu 5:3) Xilaveko xa hina xa moya xi tlhela xi katsa ku navela ku tiva Muvumbi wa hina ni ku va ni vuxaka na yena. Xikwembu xi ta ma tsakela matshalatshala ya wena yo lava ku xi tiva ku antswa, hikuva Bibele yi ri: “Tshinelani eka Xikwembu, kutani xi ta tshinela eka n’wina.”—Yakobo 4:8.
Vanhu va timiliyoni va kume leswaku ku va ni vuxaka ni Xikwembu swi antswise rihanyo ra vona ni ku endla leswaku va tsakela vutomi. Hambileswi ku tiva Xikwembu swi nga ta ka swi nga endli leswaku swiphiqo swa wena swi nyamalala, vutlhari bya xona lebyi kumekaka eBibeleni byi nga ku pfuna
Ku va ni vutomi bya ndyangu lebyi tsakisaka.
Ku va ni ku rhula ni van’wana.
Ku langutana ni swiphiqo swo tanihi ntshikilelo, swiphiqo swa timali ni vuvabyi lebyi nga tshungulekiki.
Vukhongeri byo tala lebyi tirhisaka Bibele entiyisweni a byi ti landzeli tdyondzo ta yona. Kambe vukhongeri bya ntiyiso lebyi namarhelaka leswi Bibele yi swi vulaka, byi ta ku pfuna leswaku u tiva Xikwembu.