Ha Yini Vayuda Va Dlayeteriwile? Ha Yini Xikwembu Xi Nga Ku Sivelanga?
Vanhu vo tala lava vutisaka swivutiso leswi va twe ku vava swinene hikwalaho ka leswi va feriweke kutani a va lavi ntsena tinhlamulo kambe va lava nchavelelo. Van’wana va teka ku dlayeteriwa ka Vayuda tanihi xikombiso xa leswaku vubihi bya vanhu byi nyanye ngopfu, xisweswo swa va tikela ku pfumela leswaku Xikwembu xi kona.
Mavonelo lama tolovelekeke lama hoxeke hi Xikwembu ni ku dlayeteriwa ka Vayuda
Mavunwa: Swi hoxile ku vutisa leswaku ha yini Xikwembu xi pfumelela ku dlayeteriwa ka vayuda.
Ntiyiso: Vanhu lava a va ri ni ripfumelo leri tiyeke va vutise leswaku ha yini Xikwembu xi pfumelela vuhomboloki. Hi xikombiso, muprofeta Habakuku u vutise Xikwembu a ku: “Ha yini ku phanga ni madzolonga swi ri emahlweni ka mina, ha yini ku ri ni ku holova, naswona ha yini ku ri ni ku lwa?” (Habakuku 1:3) Ematshan’weni yo va Xikwembu xi tshinya Habakuku, xi pfumelele leswaku swivutiso leswi a swi vutiseke swi tsariwa eBibeleni leswaku vanhu va ta hlaya ha swona.
Mavunwa: Xikwembu a xi na mhaka ni ku xaniseka ka vanhu.
Ntiyiso: Xikwembu xi venga vubihi ni ku xaniseka loku byi ku vangaka. (Swivuriso 6:16-19) Emasikwini ya Nowa, Xikwembu xi ‘vavisekile embilwini ya xona’ hikwalaho ka leswi madzolonga a ma tele emisaveni. (Genesa 6:5, 6) A swi kanakanisi leswaku Xikwembu xi tlhele xi twa ku vava swinene hikwalaho ka ku dlayeteriwa ka Vayuda.—Malakiya 3:6.
Mavunwa: Ku dlayateriwa ka Vayuda a ku ri ndlela ya Xikwembu yo va xupula.
Ntiyiso: Hi lembe xidzana ro sungula, Xikwembu xi tshike muti wa Yerusalema wu lovisiwa hi Varhoma. (Matewu 23:37–24:2) Hambiswiritano, ku sukela enkarhini wolowo Xikwembu a xi hlawuli leswaku rixaka rin’wana swi ri fambela kahle kasi lerin’wana ri xupuriwa. Hi ku ya hi Xikwembu, “a ku na ku hambana exikarhi ka Vayuda ni Vamatiko.”—Varhoma 10:12, Bibele—Mahungu Lamanene.
Mavunwa: Loko Xikwembu xa rirhandzu ni xa matimba hinkwawo a xi ri kona, a xi ta va xi sivele ku dlayeteriwa ka Vayuda.
Ntiyiso: Hambileswi Xikwembu xi nga vangeliki vanhu ku xaniseka nikatsongo, minkarhi yin’wana xa ku pfumelela leswaku ku va kona swa xinkarhinyana.—Yakobo 1:13; 5:11.
Ha yini Xikwembu xi pfumelele ku dlayeteriwa ka Vayuda?
Xikwembu xi pfumelele ku dlayeteriwa ka Vayuda hikwalaho ka xivangelo lexi fanaka xo pfumela leswaku vanhu hinkwavo va xaniseka: leswaku xi lulamisa mphikamakeneta leyi veke kona khale. Bibele yi vula hi ku kongoma leswaku Diyavulosi hi yena a fumaka misava sweswi, ku nga ri Xikwembu. (Luka 4:1, 2, 6; Yohane 12:31) Hambileswi xihloko lexi fambisanaka ni nhloko-mhaka leyi xi hlamuselaka hi vuenti leswaku ha yini Xikwembu xi pfumelela ku xaniseka, tinhla timbirhi ta xisekelo leti nga eBibeleni ti nga pfuna ku hlamusela leswaku ha yini Xikwembu xi pfumelele ku dlayeteriwa ka Vayuda.
I xiboho xa mani lexi vangeke ku dlayeteriwa ka Vayuda? Xikwembu xi byele vanhu vo sungula, ku nga Adamu na Evha, leswi a xi swi langutele eka vona, kambe a xi va sindzisanga leswaku va xi yingisa. Va hlawule ku tiendlela xiboho xa leswinene ni leswo biha, kutani xiboho xa vona xo hlawula leswo biha—ni swiboho leswi fanaka leswi endliweke hi vanhu ematin’wini ya misava—swi vangele vanhu maxangu lamakulu swinene. (Genesa 2:17; 3:6; Varhoma 5:12) Buku leyi nge Statement of Principles of Conservative Judaism yi ri: “Ku xaniseka ko tala loku nga kona emisaveni ku vangiwa hileswi hi wu tirhisaka hi ndlela yo biha ntshunxeko wa ku tihlawulela lowu hi nyikiweke wona.” Ematshan’weni yo va Xikwembu xi tekela vanhu ntshunxeko wa vona wo tihlawulela, xi va nyike nkarhi wo ringeta ku kongomisa timhaka ta vona hi voxe.
Xikwembu xi ta lulamisa swilo swo biha leswi vangiweke hi ku dlayeteriwa ka Vayuda. Xikwembu xi tshembisa leswaku xi ta pfuxa vanhu va timiliyoni lava va feke, ku katsa ni Vayuda lava dlayeteriweke. Xi ta tlhela xi herisa ku vava loku Vayuda lava poneke eku dlayeteriweni koloko va ku twaka hikwalaho ka swilo swo chavisa leswi va swi tsundzukaka. (Esaya 65:17; Mintirho 24:15) Xikwembu xi ta hetisisa switshembiso leswi hikwalaho ka leswi xi va rhandzaka swinene vanhu.—Yohane 3:16.
Vayuda vo tala lava vavisiweke ni lava poneke loko ku dlayeteriwa Vayuda-kuloni va kote ku hlayisa ripfumelo ra vona naswona va tiva xikongomelo xa vutomi hileswi va twisisaka leswaku ha yini Xikwembu xi pfumelela vuhomboloki nileswaku xi ta byi herisa njhani.