Ha Yini Vanhu Va Fa?

Nhlamulo ya Bibele

I swa ntumbuluko ku tivutisa leswaku ha yini vanhu va fa, ngopfu-ngopfu loko hi feriwa hi munhu loyi hi n’wi rhandzaka. Bibele yi ri: “Ndzhombo lowu tswalaka rifu i xidyoho.”—1 Vakorinto 15:56.

Ha yini vanhu hinkwavo va dyoha va tlhela va fa?

Vanhu vo sungula ku nga Adamu na Evha, va lahlekeriwe hi vutomi bya vona hikuva va dyohele Xikwembu. (Genesa 3:17-19) Rifu a ku ri vuyelo bya vona bya ku xandzukela Xikwembu lexi nga xona “xihlovo xa vutomi.”—Pisalema 36:9; Genesa 2:17.

Adamu u hundzisele xidyoho eka vatukulu vakwe hinkwavo. Bibele yi ri: “Leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) Vanhu hinkwavo va fa hikuva va dyohile.—Varhoma 3:23.

Ndlela leyi rifu ri nga ta herisiwa ha yona

Xikwembu xi tshembise nkarhi lowu ha wona xi nga “ta mita rifu hi masiku.” (Esaya 25:8) Leswaku xi susa rifu, xi fanele xi herisa nchumu lowu ri vangeke ku nga xidyoho. Xikwembu xi ta endla tano hi ku tirhisa Yesu Kreste, loyi a “susaka xidyoho xa misava.”—Yohane 1:29; 1 Yohane 1:7.