Swivutiso Swa Vahlayi
◼ Yesu u te, “Loko a mi file mahlo, a mi nga ta va na nandzu.” (Yohane 9:41) Xana a a vula leswaku vanhu van’wana va hava xidyoho?
Doo, namuntlha vanhu hinkwavo i vadyohi, tanihi leswi a va ri xiswona hinkwavo eka lembe xidzana ro sungula, handle ka Yesu hi yexe. Eka marito lama ya Yohane 9:41 Yesu a a vulavula hi muxaka wun’wana wa xidyoho.
Kokwa wa hina loyi a tolovelekeke Adamu u byarhise vatukulu va yena hinkwavo xidyoho. Adamu u vumbiwe a hetisekile, a nga ri na xidyoho. (Deuteronoma 32:4; 2 Samuel 22:31) Loko a tlule swiletelo swa Yehova swa xisekelo, Adamu u hundzuke loyi a nga hetisekangiki. Ku dyoha entiyisweni ku vula “ku hupha mfungho.” Adamu entiyisweni u endle tano. Kutani hi ku tlula nawu wa Xikwembu, Adamu u ve mudyohi.
Hinkwerhu ka hina hi khumbekile hikuva hinkwerhu hi huma eka Adamu. U nga kombisa leswi hi ndlela leyi: Munhu la tswariweke a ri ni ku tsana lokukulu ka xitekela a a ta ku hundzisela eka vatukulu va yena hinkwavo; a va ta va ni ku tsana loku fanaka ka ndzhaka. Vativi va sayense va manguva lawa va nga hlamusela loko ku tsana ko karhi ka switsongwa-tsongwana swa tisele ku ri kona eka n’wana loyi a nga siki tswariwaka kumbe loyi a ha ku tswariwaka, kambe Yehova u tiva ku tlula sweswo. U hlavutela leswaku ku tsana lokukulu ku ve kona eka Adamu ni leswaku ku hundziseriwe eka hina hinkwerhu. Ku tsana loku i xidyoho. “Leswi ku dyoha ku ngheneke emisaveni hi munhu a ri un’we [Adamu], kutani rifu ri ngheneke hikwalaho ka ku dyoha, hi mukhuva wolowo rifu ri tlulele vanhu hinkwavo hikuva va dyohile hinkwavo.” (Varhoma 5:12) Xiyimo lexi xa xidyoho xi suse vanhu eku twananeni ni Muvumbi, ku tlhandlekela eka ku va tisela vuvabyi ni rifu. A ku na munhu la hetisekeke naswona a ntshunxekeke eku avanyisiweni ka rifu handle ka Yesu.—Varhoma 5:18-21; 6:23; 2 Tikronika 6:36.
Hambi swi ri tano, eBibeleni minkarhi yin’wana vanhu va vuriwa “vadyohi” hikwalaho ka ku va va xiyiwe tanihi vaendli lavakulu va xidyoho kumbe muxaka wo biha wa xidyoho. (Luka 19:2-7; Marka 2:16, 17; 14:41) Kavula, sweswo a swi vuli swona leswaku vanhu hinkwavo a va hetisekile, va ri hava xidyoho. Loko a va ri tano, a va ta va va nga dyuhalanga ivi eku heteleleni va fa.
Mhaka ya Yohane ndzima 9 yi katsa wanuna loyi a tswariweke a ri bofu kambe loyi mahlo ya yena ya hanyisiweke hi Yesu. Munhu loyi a a nga swi kotanga ku hlaya Matsalwa hi yexe, kambe a a ri ni vutivinyana. A a swi tiva leswaku Xikwembu a xi yingisi swikombelo swa lava dyohaka hi vomu. Ntiyiso wa leswaku Yehova u nyike Yesu matimba yo endla singita ro hanyisa mahlo wu kombe leswaku Yesu a a ri muprofeta. Hambi swi ri tano, Vafarisi vo tikukumuxa, va ale ku amukela vumbhoni lebyi twalaka bya wanuna loyi, naswona va n’wi humesele ehandle.—Yohane 9:13-17, 26-34.
Endzhaku ka leswi, Yesu u te: “Ndzi tile emisaveni leyi ku ta avanyisa, leswaku lava nga voniki va kota ku vona, ni leswaku lava vonaka va hundzuka lavo-fe-mahlo.” (Yohane 9:39) Ina, exisekelweni xa ku chumayela ka yena, swiendlakalo swin’wana ni ntirho eswikongomelweni swa Xikwembu, vanhu a va ta kuma ku vona ka moya kutani va famba eku vonakaleni kumbe a va ta va emunyameni wa moya. (Esaya 9:1, 2; 42:6, 7; Matewu 4:13-17; 6:23; 2 Petro 1:9; 2 Vakorinto 4:4) Loko varhangeri va vukhongeri a va ri Vayuda lava nga tivisiwangiki ndzhwalo lowu tolovelekeke wa xidyoho xa munhu, ku ala ka vona ku amukela Mesiya ingi ku twisisekile. Kambe vona, lava a va ku va “vona,” kumbe ku twisisa, a va bihe ngopfu hikuva a va ri ni vutivi ngopfu bya Nawu ni bya Rito ra Xikwembu ra vuprofeta. Kutani ku landzula ka vona Yesu a ku ri xidyoho lexikulu lexi va avanyiseke ku tlula leswi ku nga hetiseki ka vona loku tolovelekeke ka munhu ni xidyoho swi swi endleke. Xisweswo, Yesu u byele Vafarisi a ku: “Loko a mi file mahlo, a mi nga ta va na nandzu; kambe sweswi, leswi mi nge: ‘Ha vona,’ nandzu wa ha ri na n’wina.”—Yohane 9:41.