Hikwalahokayini Yesu A File?
Nhlamulo ya Bibele
Yesu u file leswaku vanhu va kota ku rivaleriwa swidyoho ni ku kuma vutomi lebyi nga heriki. (Varhoma 6:23; Vaefesa 1:7) Rifu ra Yesu ri tlhele ri kombisa leswaku munhu a nga swi kota ku tshama a tshembekile eka Xikwembu hambiloko a langutane ni ndzingo wo tika swinene.—Vaheveru 4:15.
A hi voneni ndlela leyi rifu ra munhu un’we ri kotaka ku fikelela sweswo hayona.
Yesu u file leswaku “hi rivaleriwa swidyoho swa hina.”—Vakolosa 1:14.
Munhu wo sungula Adamu a a nga ri na xidyoho. Hambiswiritano, u hlawule ku nga xi yingisi Xikwembu. Xidyoho xa Adamu xi tlulele vana va yena hinkwavo. Bibele yi ri: “Vo tala va [ve] vadyohi hikwalaho ka leswi munhu un’we a nga yingisangiki.”—Varhoma 5:19.
Yesu a a nga ri na xidyoho naswona a nga xi endlanga xidyoho. Hikwalaho, u ve “gandzelo leri endliweke leswaku hi ta rivaleriwa swidyoho swa hina.” (1 Yohane 2:2) Leswi Adamu a nga yingisangiki, xidyoho xi tlulele vanhu hinkwavo, xisweswo rifu ra Yesu ri susa xidyoho xexo eka hinkwavo lava nga ni ripfumelo eka yena.
Hi ndlela yo karhi, Adamu u endle vanhu mahlonga ya xidyoho. Kutani hi ku va Yesu a hi ferile hi ku swi rhandza, u kutsule vanhu evuhlongeni byebyo. Hikwalaho ka sweswo, “loko mani na mani o endla xidyoho, hi ni mupfuni loyi a nga na Tatana, ku nga Yesu Kreste, loyi a lulameke.”—1 Yohane 2:1.
Yesu u file “leswaku loyi a pfumelaka eka yena a nga lovisiwi kambe a kuma vutomi lebyi nga heriki.”—Yohane 3:16.
Hambileswi Adamu a a vumberiwe ku hanya hilaha ku nga heriki, xidyoho xakwe xi endle leswaku a fa. Hikwalaho ka Adamu, ‘xidyoho xi nghene emisaveni hi munhu un’we, ni rifu ri nghene hikwalaho ka xidyoho, kutani rifu ri tlulele vanhu hinkwavo hikuva hinkwavo va dyohile.’—Varhoma 5:12.
Ku hambana ni rifu ra Adamu, rifu ra Yesu ri susa xidyoho ni ku tlhela ri endla leswaku hinkwavo lava nga ni ripfumelo eka yena va hanya hilaha ku nga heriki. Hi ku komisa Bibele yi ri: “Leswi xidyoho xi veke hosi swin’we ni rifu, hilaha ku fanaka musa lowukulu wu va hosi hikwalaho ka ku lulama loku yisaka evuton’wini lebyi nga heriki ha Yesu Kreste Hosi ya hina.”—Varhoma 5:21.
Namuntlha vanhu a va hanyi hilaha ku nga heriki. Hambiswiritano, Xikwembu xi tshembisa ku nyika vanhu vo lulama vutomi lebyi nga heriki ni ku pfuxa lava feke leswaku na vona va kota ku vuyeriwa eka rifu ra Yesu Kreste.—Pisalema 37:29; 1 Vakorinto 15:22.
Yesu u “yingis[e] ku ya fika eku feni,” hi ndlela yoleyo a a kombisa leswaku vanhu va nga swi kota ku tshama va tshembekile eka Xikwembu hambiloko va langutane ni miringo yo tika swinene.—Vafilipiya 2:8.
Adamu a nga xi yingisanga Xikwembu hambileswi a a nga ri na xidyoho hikwalaho ka leswi a a navela nchumu lowu nga n’wi fanelangiki. (Genesa 2:16, 17; 3:6) Hi ku famba ka nkarhi, nala lonkulu wa Xikwembu ku nga Sathana, u vule leswaku a ku na munhu loyi a nga ta yingisa Xikwembu mikarhi hinkwayo ngopfungopfu loko vutomi bya yena byi ri ekhombyeni. (Yobo 2:4) Nilokoswiritano, Yesu a a nga ri ni xidyoho naswona u yingise Xikwembu ni ku tshama a tshembekile eka xona hambileswi a a ta dlayiwa hi ndlela yo vava ni leyi nyumisaka. (Vaheveru 7:26) Leswi swi kombise leswaku munhu a nga swi kota ku tshama a tshembekile eka Xikwembu swi nga ri na mhaka leswaku u langutana ni miringo yo tika ku fikela kwihi.
Swivutiso leswi vanhu va tivutisaka swona mayelana ni rifu ra Yesu
Hikwalahokayini Yesu a boheke ku xaniseka ni ku tlhela a fa leswaku a kutsula vanhu? Hikwalahokayini Xikwembu xi nga ri herisanga kunene rifu?
Nawu wa Xikwembu wu vula leswaku “hakelo ya xidyoho i rifu.” (Varhoma 6:23) Ematshan’wini yo tumbetela Adamu nawu lowu, Xikwembu xi n’wi byerile leswaku loko o dyoha a a ta fa. (Genesa 3:3) Loko Adamu a dyoha, Xikwembu, “lexi nga hembiki,” xi endle leswi xi swi vuleke. (Tito 1:2) Adamu u tlulete vana vakwe xidyoho ni rifu.
Hambileswi vanhu lava dyohaka va faneriwaka hi rifu, Xikwembu xi va kombe “musa lowukulu.” (Vaefesa 1:7) Ku va Xikwembu xi rhumele Yesu leswaku a ta kutsula vanhu tanihi gandzelo leri nga riki na xidyoho, a swi kombisa leswaku xi lulamile naswona xi ni tintswalo letikulu.
Yesu u fe rini?
Yesu u fe hi awara ya vunharhu nindzhenga hi ku ya hi Paseka ya Vayuda. (Marka 15:33-37) Hi ku ya hi tikhalendara ta masiku lawa, leswi swi vula leswaku u fe hi ti 1 ta April ya 33 C.E., ku nga Ravuntlhanu.
Xana Yesu u fele kwihi?
Yesu u dlayeriwe eka “ndhawu ya Xipalapala, leyi hi Xiheveru yi vuriwaka Golgota.” (Yohane 19:17, 18) Enkarhini wa Yesu, ndhawu leyi a yi ri eYerusalema “ehandle ka gede ya muti.” (Vaheveru 13:12) Leswi Bibele yi vulaka leswaku van’wana a va langute Yesu loko a dlayiwa “va ri ekule,” swi nga endleka ndhawu yoleyo a yi ri exitsungeni. (Marka 15:40) Hambiswiritano, namuntlha a swi tiveki leswaku Golgota yi le kwihi.
Yesu u fe njhani?
Hambileswi vo tala va tshembaka leswaku Yesu u vambiwe exihamban’weni, Bibele yi ri: “Hi byakwe u rhwale swidyoho swa hina emirini wakwe emhandzini.” (1 Petro 2:24) Vatsari va Bibele va tirhise marito mambirhi ya Xigriki ku hlamusela swilo leswi tirhisiweke loko Yesu a dlayiwa ku nga stau·rosʹ na xyʹlon. Swidyondzeki swo tala swi vula leswaku marito lawa ma vula mhandzi leyi nga lo thwii, leyi nga hingakanyiwangiki.
Hi fanele hi ri tsundzuka njhani rifu ra Yesu?
Hi vusiku bya Paseka ya Vayuda, leyi a yi endliwa lembe ni lembe, Yesu u sungule xiendlakalo xo olova xa nkoka ni valandzeri vakwe naswona u va lerise a ku: “Tshamani mi ri karhi mi endla leswi leswaku mi ndzi tsundzuka.” (1 Vakorinto 11:24) Endzhaku ka tiawara, Yesu u dlayiwile.
Vatsari va Bibele va fanise Yesu ni xinyimpfana lexi a xi tlhaviwa hi Paseka. (1 Vakorinto 5:7) Ku fana ni leswi nkhuvo wa Paseka a wu tsundzuxa Vaisrayele leswaku va tshunxiwile evuhlongeni, swi tano ni hi Xitsundzuxo xa rifu ra Yesu Kreste, xi tsundzuxa Vakreste leswaku va tshunxiwile eka xidyoho ni rifu. Paseka a ku ri nkhuvo lowu a wu endliwa lembe ni lembe hi n’hweti ya Nisani 14 hi ku ya hi khalendara ya tin’hweti ta Bibele, hilaha ku fanaka ni Vakreste vo sungula a va endla Xitsundzuxo xa rifu ra Yesu Kreste kan’we hi lembe.
Lembe ni lembe, hi siku leri fanaka ni ra Nisani 14, vanhu va timiliyoni emisaveni hinkwayo va tsundzuka rifu ra Yesu..