Xana Bibele Yi Yirisa Ku Titsakisa Hi Timhaka Ta Masangu?

Nhlamulo ya Bibele

Nikatsongo, hikuva Bibele yi vula leswaku i nyiko leyi humaka eka Xikwembu yi ya eka vanhu lava tekaneke. Xi vumbe “waxinuna ni waxisati” naswona xi vona hinkwaswo leswi xi swi endleke swi ri “swinene ngopfu.” (Genesa 1:27, 31) Loko Xikwembu xi catise wanuna wo sungula ni wansati, xi vule leswaku “va fanele va va nyama yin’we.” (Genesa 2:24.) Vuxaka bya vona a byi katsa ku va va tsakela timhaka ta masangu ni ku va ni xinghana lexikulu.

Bibele yi hlamusela ntsako lowu wanuna a wu kumaka evukatini yi ku: “Tsaka hi nsati wa vuntshwa bya wena . . . Mavele yakwe a ma ku pyopye minkarhi hinkwayo. Onge u nga tshama u nyanyukile nkarhi hinkwawo hi rirhandzu rakwe.” (Swivuriso 5:18, 19) Xikwembu xi lava leswaku vavasati na vona va tsakela timhaka ta masangu. Bibele yi ri: “Vavanuna ni vavasati va fanele va enerisana etimhakeni ta masangu.”—1 Vakorinto 7:3, God’s Word Bible.

Swipimelo eku titsakiseni hi timhaka ta masangu

Xikwembu xi endle leswaku timhaka ta masangu ti endliwa hi vanhu lava tekaneke ntsena hilaha Vaheveru 13:4 yi kombisaka ha kona, yi ri: “Vukati a byi xiximeke exikarhi ka hinkwavo, ni sangu ra vukati ri nga vi ni xilo lexi nyamisaka, hikuva Xikwembu xi ta avanyisa timbhisa ni vaoswi.” Vatekani va fanele va tshama va tshembekile evukatini bya vona. A va tsakisiwi hi ku va ni vutianakanyi kambe hi ku tirhisa nawu wa Bibele lowu nge: “Ku nyika swi tisa ntsako lowukulu ku tlula ku amukela.”—Mintirho 20:35.